សៀមរាប៖ អាជ្ញាធរជាតិអប្សរា បានសម្ដែងការព្រួយបារម្ភខ្លាចប្រជាពលរដ្ឋមួយចំនួន ឆ្លៀតឱកាសលួចធ្វើសំណង់ខុសច្បាប់ នៅក្នុងតំបន់រមណីយដ្ឋានអង្គរ នៅថ្ងៃឈប់សម្រាកច្រើនថ្ងៃនេះ ខណៈដែលមន្ដ្រីរាជការទូទៅមិនបំរើការងារ ។ ការព្រួយបារម្ភនេះ កើតឡើងនៅពេលដែល ដែលរារដ្ឋាភិបាលបានអោយមន្ដ្រីរាជការ កម្មករ និយោជិតឈប់សម្រាកសងថ្ងៃចូលឆ្នាំខ្មែររយៈពេល៥ថ្ងៃ ចាប់ទីថ្ងៃទី១៧ដល់ថ្ងៃទី២១ខែសីហាឆ្នាំ២០២០នេះ ។
លោក ឡុង កុសល អ្នកនាំពាក្យ និងជាប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា បានមានប្រសាសន៍កាលពីចុងសប្ដាហ៍នេះថា កន្លងមករាលពេលដែលមន្ដ្រីរាជការឈប់សម្រាក តែងមានប្រជាពលរដ្ឋមួយចំនួន ឆ្លៀតឱកាសយកពេលវេលាដែលមន្ដ្រីរាជការឈប់សម្រាក ធ្វើសំណង់ខុសច្បាប់នៅក្នុងតំបន់ហាមឃាត់នៃរមណីយដ្ឋានអង្គរ ។ ករណីនេះ បើសិនមានប្រជាពលរដ្ឋលួចសាងសង់ កំឡុងពេលថ្ងៃឈប់សម្រាកចាប់ពីថ្ងៃទី១៧ ដល់ថ្ងៃ២១ សីហានេះ អាជ្ញាធរជាតិអប្សរា នឹងធ្វើការរុះរើដោយពុំមានលក្ខខណ្ឌអ្វីទាំងអស់នូវរាល់សំណង់ទាំងឡាយណាដែលខុសច្បាប់។ លោកបានអំពាវនាវដល់ប្រជាពលរដ្ឋ សូមមេត្ដា កុំធ្វើការសាងសង់សំណង់ខុសច្បាប់ណាមួយ ក្នុងរមណីយដ្ឋានអង្គរនៅពេលនេះ ថ្ងៃសម្រាក ព្រោះយើងមិនចង់ឱ្យមានការកើនឡើងនូវសំណង់ខុសច្បាប់ ដែលបង្កផលលំបាកដល់រមណីយដ្ឋានអង្គរទេ និងនាំឱ្យខូចខាតដល់ផលប្រយោជន៍ របស់បងប្អូនប្រជាពលរដ្ឋខ្លួនឯងផងដែរ។
លោក ឡុង កុសល បានបន្ថែមថា ប្រជាពលរដ្ឋដែលចង់រុះរើផ្ទះចាស់ សង់ផ្ទះថ្មី និងមានសំណើរជួសជុលផ្ទះជាដើម ត្រូវដាក់ពាក្យស្នើសុំមកកាន់អាជ្ញាធរជាតិអប្សរា ក៏ដូចជាតាមអាជ្ញាធរមូលដ្ឋាន។មន្ត្រីនៃអាជ្ញាធរជាតិអប្សរា ក៏ព្រមានពីវិធានការផ្លូវច្បាប់លើជនខិលខូចដែលលួចប្រើឈ្មោះស្ថាប័ននេះ ឆបោកពលរដ្ឋឱ្យធ្វើសំណង់ដោយពុំមានការស្នើសុំ មកស្ថាប័នជំនាញ ។ ជាមួយគ្នានោះ លោកក៍ស្នើឱ្យពលរដ្ឋទាំងអស់ កុំស្ដាប់ពាក្យឆបោករបស់បុគ្គលមួយចំនួន ដែលអះអាង ធានារត់ការដើម្បីបានាសាងសង់ ដែលនេះផ្ទុយពីគោលការណ៍របស់អាជ្ញាធរជាតិអប្សរា ហើយអាជ្ញាធរជាតិអប្សរា ក៏ស្នើសុំកិច្ចសហការជាមួយប្រជាពលរដ្ឋ ក្នុងការរាយការណ៍ករណីដឹងពីបុគ្គលិកឬសកម្មភាពខាងលើ ត្រូវប្រញាប់រាយការណ៍មកស្ថាប័នខ្លួន ដើម្បីមានវិធានការផ្លូវច្បាប់ ក៏ដូចជាបង្ការការខូចខាតផលប្រយោជន៍របស់ប្រជាពលរដ្ឋផ្ទាល់ ។
សូមបញ្ជាក់ថា តាមការកត់សំគាល់របស់អាជ្ញាធរជាតិអប្សរាកន្លងមក រាល់ពិធីបុណ្យជាតិម្ដងៗ តែងមានករណីលួចធ្វើសំណង់ខុសច្បាប់ ហើយការសាងសង់នេះមានលក្ខណៈលឿនបំផុត អាចមួយយប់បានកូនផ្ទះមួយខ្នង ដែលនេះ ជាចេតនាសុទ្ធសឹងមានការត្រៀមលក្ខណៈជាមុនរបស់ប្រជាពលរដ្ឋមួយចំនួន ។ ប៉ុន្ដែយ៉ាងនេះក្ដី អាជ្ញាធរជាតិអប្សរា នឹងចាត់វិធានការណ៍ សំណង់ទាំងនោះឱ្យរុះរើ វិញជាបន្ទាន់ផងដែរបើសិនប្រជាពលរដ្ឋទាំងនោះ មិននៅតែអនុវត្ដតាមការណែនាំរបស់ស្ថាប័នការពារបេតិកណ្ឌមួយនេះ៕
អត្ថបទ៖ ឈិត សាវី
