គិតត្រឹមថ្ងៃទី៣០ ខែសីហា ឆ្នាំ២០២០ អាជ្ញាធរស្រុកបន្ទាយស្រី បានចាប់ផ្ដើមប្រមូលផលស្រូវ ពីស្រែសង្គម ជុំទី១ លើផ្ទៃដី១០ហិកតា នៃផ្ទៃដីសរុប៤០ហិកតា ។ តាមការប៉ាន់ស្មាន ទិន្នផលសរុបអាចទទួលបានប្រហែល ១០០តោន នេះបើតាមប្រសាសន៍ លោក ឃឹម ហ្វីណង់ អភិបាលស្រុកបន្ទាយស្រី។
លោកអភិបាលស្រុក បង្ហាញថា ស្រែសង្គម ដែលអាជ្ញាធរបានធ្វើនៅជុំទី១នេះ គឺទទួលបានផលល្អប្រសើរ ដោយក្នុងមួយហិកតាទទួលបានផលស្រូវចន្លោះ ២តោនកន្លះ ទៅ៣តោន។ ប្រសិនបើទិន្នផលស្រូវសរុបទទួលបាន ១០០តោន នោះអង្ករដែលកិនហើយ អាចទទួលបានប្រហែល ៥០តោន។ ចំពោះផលស្រូវ ដែលទទួលបាន ជំហានដំបូង ត្រូវបែងចែក ជូនម្ចាស់ស្រែ ដែលបានផ្តល់ដីស្រែ ឱ្យអាជ្ញាធរធ្វើការដាំដុះ ទៅតាមកិច្ចសន្យាដែលបានព្រមព្រៀង។ បន្ទាប់មកអាជ្ញាធរស្រុក នឹងយកស្រូវនៅសល់ ទៅកិន ជាអង្ករ សម្រាប់យកទៅចែកជូនដល់ប្រជាពលរដ្ឋ មានជីវភាពខ្វះខាតនៅក្នុងស្រុកបន្ទាយស្រី ដែលមានចំនួនប្រមាណ២ពាន់គ្រួសារ។
លោកអភិបាលស្រុក បញ្ជាក់បន្ថែមថា ដោយសារតែទិន្នផលស្រូវជុំទី១នេះ ទទួលបានផលល្អ រដ្ឋបាលស្រុក នឹងបន្តអនុវត្តន៍ស្រែសង្គមជុំទី២បន្តទៀត ដែលគ្រោងនឹងចាប់ផ្តើមនៅខែមករា ឆ្នាំ២០២១ ក្នុងគោលបំណង ជួយឧបត្ថម្ភ ដល់ប្រជាពលរដ្ឋ ក្រមួយ និងក្រពីរ នៅក្នុងស្រុកបន្ទាយស្រី។ ទន្ទឹមនោះ លោក ក៏បានថ្លែងអំណរគុណ ដល់អ្នកពាក់ព័ន្ធទាំងអស់ ជាពិសេសសប្បុរសជនដែលបានជួយឧបត្ថម ធ្វើឱ្យស្រែសង្គមនេះទទួលបានផលល្អប្រសើរ។
គួររំលឹកថា ស្រែសង្គម មានទីតាំងស្ថិតនៅឃុំព្រះដាក់ ស្រុកបន្ទាយស្រី ខេត្តសៀមរាប ចាប់ផ្ដើមអនុវត្តន៍ការដាំដុះកាលពីដើមខែឧសភា ឆ្នាំ២០២០ ក្រោមគំនិតផ្ដួចផ្ដើមរបស់រដ្ឋបាលស្រុកបន្ទាយស្រី និងចូលរួមធ្វើការដាំដុះពី អាជ្ញាធរស្រុក-ឃុំ យុវជន និងប្រជាពលរដ្ឋក្នុងស្រុកបន្ទាយស្រីផងដែរ។
អត្ថបទ និងរូបភាព: លោក ឃុត សៅ
កែសម្រួលដោយ៖ លោក សេង ផល្លី
