នៅព្រឹកថ្ងៃទី០១ ខែកញ្ញា ឆ្នាំ២០២០នេះ មន្ទីររៀបចំដែនដីនគរូបណីយកម្មសំណង និងសុរិយោដីខេត្តសៀមរាប សហការជាមួយរដ្ឋបាលសង្កាត់សំបួរ ក្នុងក្រុងសៀមរាប បានរៀបចំពិធីចែកប័ណ្ណកម្មសិទ្ធិដីធ្លីជូនដល់បងប្អូនប្រជាពលរដ្ឋចំនួន២ភូមិ ក្នុងសង្កាត់សំបួរ គឺភូមិជ្រៃ និងភូមិសំបួរ ដែលមានក្បាលដីចំនួន១.៥៨១ ក្បាលដី ខណៈការចែកប័ណ្ណនេះ បានចាប់តាំងពីថ្ងៃទី២៦ ខែសីហា ឆ្នាំ២០២០ មក ហើយនឹងបញ្ចប់នៅពេលដែលប្រជាពលរដ្ឋទទួលនៅប័ណ្ណកម្មសិទ្ធិដីធ្លីគ្រប់គ្នា ។
លោក ឆាន់ ឆាំ សមាជិកក្រុមប្រឹក្សាសង្កាត់សំបួរ មានប្រសាសន៍ថា រយៈកន្លងមក អាជ្ញាធរខេត្តតែងតែបានរៀបចំការចែកប័ណ្ណកម្មសិទ្ធិដីធ្លីជូនដល់បងប្អូនប្រជាពលរដ្ឋនៅតាមបណ្តាក្រុង ស្រុក ឃុំសង្កាត់ ក្នុងករណីបញ្ចប់ការបិទផ្សាយជាសាធារណៈ ដែលជាក់ស្ដែងនៅថ្ងៃនេះ អាជ្ញាធរខេត្តនិងមន្ត្រីជំនាញ បានធ្វើការចែកប័ណ្ណកម្មសិទ្ធិដីធ្លីជូនដល់បងប្អូនប្រជាពលរដ្ឋចំនួន២ភូមិ គឺភូមិជ្រៃ និងភូមិសំបួរ ដែលមានក្បាលដីរហូតទៅដល់១.៥៨១ ក្បាលដី ស្មើនឹង ១.៥៨១ ប័ណ្ណផងដែរ ។
លោក ឆាន់ ឆាំ បានបញ្ជាក់ទៀតថា ការចែកប័ណ្ណរហូតមកដល់ពេលនេះ បានលើសពីពាក់កណ្តាលនៃចំនួន ១.៥៨១ ក្បាលដីហើយ វាអាចនឹងចែករួចរាល់នៅដើមខែនេះ ប្រសិនបើប្រជាពលរដ្ឋគោរពទៅតាមពេលវេលាកំណត់របស់មន្ត្រីជំនាញដែលកំពុងធ្វើការជាប្រចាំនេះ ប៉ុន្តែអាចមានការយឺតយ៉ាវដោយសារតែមានបងប្អូនប្រជាពលរដ្ឋមួយចំនួន ពួកគាត់មានដីធ្លីនៅសៀមរាប តែម្ចាស់នៅតាមបណ្តាខេត្តនានា ឬក៏នៅទីក្រុងភ្នំពេញជាដើម ដូច្នេះ សម្រាប់ពលរដ្ឋដែលមិនទាន់បានមកទទួលនៅពេលនេះ អាចដាក់ពាក្យស្នើសុំទៅមន្ទីរនគរូបណីយកម្មសំណង់ និងសុរិយោដី ដើម្បីទទួលយកនៅប័ណ្ណកម្មសិទ្ធិដីធ្លីនេះ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
