កាលពីរសៀលថ្ងៃទី០១ ខែកញ្ញា ឆ្នាំ២០២០ នៅអង្គភាពពន្ធនាគរខេត្តសៀមរាប រៀបចំពិធីទទួលជំនួយជា ជាថ្នាំ និងគ្រឿងបរិក្ខារពេទ្យមួយចំនួន តាមរយៈការិយាល័យកុងស៊ុលសាធារណរដ្ឋប្រជាមានិតចិន ប្រចាំខេត្តសៀមរាប ក្រោមអធិបតី លោក ពៅ ពិសិដ្ឋ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប និងលោក លីវ ជឺជា (LIU ZHI JIE) ប្រធានការិយាល័យកុងស៊ុល នៃសាធារណរដ្ឋប្រជាមានិតចិន ប្រចាំខេត្តសៀមរាប និង លោក យ៉ាង ចៅ (YANG ZHAO) អនុប្រធានក្រុមប្រឹក្សាភិបាលអគ្គនាយក នៃក្រុមហ៊ុនវិនិយោគអាកាសយានដ្ឋានអន្តរជាតិអង្គរ និងប្រតិភូនៃសាធារណរដ្ឋប្រជាមានិតចិន ជាច្រើនរូប។
លោកអភិបាលរងខេត្ត បានសម្តែងនូវអំណរគុណ ចំពោះ ប្រជាជនចិន ក៏ដូចក្រុមហ៊ុនវិនិយោគអាកាសយានដ្ឋានអន្តរជាតិអង្គរ ដែលបាននាំយកជំនួយសប្បុរសធម៌ ជូនដល់អង្គភាពពន្ធនាគារខេត្តសៀមរាបនាពេលនេះ ដើម្បីសម្រួលដល់ការព្យាបាលបឋម ជូនដល់ជនជាប់ឃុំ នៅក្នុងអង្គភាពនេះផ្ទាល់។ ជាមួយនេះ លោក អភិបាលរងខេត្ត ក៏បានថ្លែងអំណរគុណ ចំពោះលោកប្រធានការិយាល័យកុងស៊ុល នៃសាធារណរដ្ឋប្រជាមានិតចិន ប្រចាំខេត្តសៀមរាប ដែលតែងតែជួយសម្របសម្រួល ដល់កិច្ចការសប្បុរសធម៌ទាំងនេះ។
លោកប្រធានការិយាល័យកុងស៊ុលចិន ប្រចាំខេត្តសៀមរាប លើកឡើងថា លោកពិតជាមានសេចក្ដីត្រេកអរ ចំពោះទំនាក់ទំនងរវាងប្រទេសចិន និងកម្ពុជា។ ជាពិសេស សម្រាប់ខេត្តសៀមរាប លោកនឹងបន្តសម្របសម្រួល និងជំរុញសហប្រតិបត្តិការល្អ ធ្វើយ៉ាងណាឲ្យខេត្តសៀមរាប កាន់តែមានការអភិវឌ្ឍន៍ឡើងថែមទៀត ក្នុងវិស័យទេសចរណ៍ ក៏ដូចជាវិស័យផ្សេងៗទៀតដែរ បន្ទាប់ពីការសាងសង់អាកាសយានដ្ឋានអន្តរជាតិអង្គរ បញ្ចប់ដោយជោគជ័យ៕
រូបថត ៖ រដ្ឋបាលខេត្តសៀមរាប
អត្ថបទ ៖ មន្ទីរព័ត៌មានខេត្តសៀមរាប
