នៅព្រឹកថ្ងៃទី០៣ ខែកញ្ញា ឆ្នាំ២០២០នេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និងលោកជំទាវ បានអញ្ជើញជាអធិបតីក្នុងពិធីកាន់បិណ្ឌវេនទិ១ នៅវត្តព្រះព្រហ្មរ័ត្ន ស្ថិតក្នុងក្រុងសៀមរាបខេត្តសៀមរាប និងមានវត្តមានចូលរួមពីសំណាក់ ឯកឧត្ដម លោកជំទាវ សមាជិកាក្រុមប្រឹក្សាខេត្ត លោក លោកស្រី ជាអភិបាលរងខេត្ត មន្ត្រីសាលាខេត្ត ប្រធាន អនុប្រធានមន្ទីរ អង្គភាពជុំវិញខេត្ត ព្រមទាំងពុទ្ធបរិស័ទជាច្រើនរូប។
មានថ្លែងសំណេះសំណាលនាពេលនោះ ឯកឧត្តម ប្រធានក្រុមប្រឹក្សា មានប្រសាសន៍ថា ពិធីកាន់បិណ្ឌ ឬដាក់បិណ្ឌ និងភ្ជុំបិណ្ឌ គឺជាពិធីបុណ្យធំដ៏មួយក្នុងចំណោមពិធីបុណ្យធំៗ ដទៃទៀត ដែលពុទ្ធសាសនិកជនកម្ពុជា នាំគ្នាប្រារព្ធធ្វើមិនដែលអាក់ខានឡើយ។ ពិធីបុណ្យកាន់បិណ្ឌនេះ រដ្ឋបាលខេត្ត នឹងរៀបចំឡើងចំនួន៧វេន តាមបណ្ដាវត្តអារាមនានា ដើម្បីទំនុកបម្រុងបច្ច័យ៤ ចំពោះព្រះសង្ឃ ដែលគង់ចាំវស្សាក្នុងទីវត្តអារាម និងមានគោលបំណងធំៗ ៣យ៉ាងគឺ៖
ទី១- តបសងគុណ ឧទ្ទិសកុសលទៅឱ្យបុព្វការីជន ដែលបានចែកឋានទៅកាន់លោកខាងមុខហើយ។
ទី២- សន្សំបុណ្យកុសល សេចក្តីសុខ សេចក្តីចម្រើន សម្រាប់ខ្លួនយើងម្នាក់ៗ និង មានគុណរបស់យើង ព្រមទាំងបានចូលស្ដាប់ឱវាទសម្ដែងដោយព្រះសង្ឃ សម្រាប់អប់រំខ្លួនឯង ក្នុងនាមអ្នកកាន់ព្រះពុទ្ធសាសនា។
និងទី៣- បង្កើតសាមគ្គីធម៌ រវាងព្រះពុទ្ធសាសនា និងពុទ្ធបរិស័ទនៅជិតឆ្ងាយ ជាពិសេសវាបានបង្ហាញពី ការសាមគ្គីភាព រវាងរដ្ឋបាលខេត្ត ជាមួយថ្នាក់ដឹកនាំខេត្ត មន្ទីរ-អង្គភាពជុំវិញខេត្ត។
ឯកឧត្តម ក៏បានរំលឹកពីអតីតកាល ដ៏ជូរចត់របស់កម្ពុជាយើង ក្នុងរបប ប៉ុល ពត ចន្លោះពី១៩៧៥ ដល់ឆ្នាំ១៩៧៩ ដោយពួកវាបានបំបិទសិទ្ធិសេរីភាព របស់ប្រជាជនគ្រប់បែបយ៉ាង ទាំងខាងជំនឿសាសនា ការដើរហើរ និងការនិយាយស្ដី ចំណែកព្រះសង្ឃវិញ ក៏ត្រូវបានចាប់ផ្សឹក ជម្លៀសចេញពីវត្ត រីឯទីអារាម ក៏ក្លាយជាទីឃុំឃាំងប្រជាជនស្លូតត្រង់ កាប់សម្លាប់ ឬជាកន្លែងចិញ្ចឹមសត្វ។ លើសពីនោះ ប្រជាជនត្រូវបានបង្អត់អាហារ ធ្វើការលើសកម្លាំង គ្មានថ្ងៃសម្រាក និងភ័យព្រួយ ពីការយកទៅសម្លាប់ចោល គ្រប់ពេលវេលា។ ដោយសារគុណថ្ងៃរំដោះ ៧មករា ១៩៧៩ រណសិរ្សសាមគ្គីសង្គ្រោះជាតិកម្ពុជា ក្រោមការដឹកនាំរបស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសង្គ្រោះប្រទេស និងប្រជាជនកម្ពុជា ឱ្យរួចផុតពីការបំផ្លិចបំផ្លាញ និងកាប់សម្លាប់ ។ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន ផ្នែកអាណាចក្រ និងពុទ្ធចក្រ មានការរីកចម្រើនយ៉ាងឆាប់រហ័ស ព្រមទាំងបានធ្វើឲ្យជីវភាពប្រជាពលរដ្ឋ មានភាពល្អប្រសើរជាលំដាប់ និងមានការកោតសរសើរលើឆាកអន្តរជាតិ។ បច្ចុប្បន្នវិស័យពុទ្ធិកសិក្សា ក៏មានការរីកចម្រើនជាបន្តបន្ទាប់ ដោយយើងមានសាលាធម្មវិន័យ ចាប់ពីថ្នាក់ត្រី ថ្នាក់ទោ ថ្នាក់ឯក និងសាលាពុទ្ធិកបឋមសិក្សា រហូតដល់ពុទ្ធិកវិទ្យាល័យ និងមានពុទ្ធិកសាកលវិទ្យាល័យថែមទៀតផង ។
គួរជម្រាបថា ពិធីកាន់បិណ្ឌ ឬដាក់បិណ្ឌ និងភ្ជុំបិណ្ឌ សម្រាប់ឆ្នាំ២០២០ ចាប់ផ្ដើមពីថ្ងៃទី០៣ ដល់ថ្ងៃទី១៧ ខែកញ្ញា ឆ្នាំ២០២០ ក្នុងនោះរដ្ឋបាលខេត្តសៀមរាប នឹងធ្វើការកាន់បិណ្ឌចំនួន៧វេនផងដែរ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
