នៅព្រឹកថ្ងៃទី០២ ខែកញ្ញា ឆ្នាំ២០២០នេះ ឯកឧត្តម រដ្ឋមន្រ្តី ខៀវ កាញារីទ្ធ និងលោកជំទាវ ទេព រង្ស៊ី បានអញ្ជើញកាន់បិណ្ឌវេនទី១ នៅវត្តពិភទ្ធរង្សី ស្ថិតក្នុងសង្កាត់ ស្រះចក ខណ្ឌដូនពេញ រាជធានីភ្នំពេញ និងមានការអញ្ជើញចូលរួមពី ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ថ្នាក់ដឹកនាំ មន្រ្តីរាជការ នៃក្រសួងព័ត៌មានជាច្រើនរូប។
ក្នុងឱកាសនោះ ឯកឧត្តមរដ្ឋមន្រ្តី និងលោកជំទាវ ព្រមទាំងមន្ត្រីគ្រប់ជាន់ថ្នាក់ នៃក្រសួងព័ត៌មាន បានប្រគេនយាគូ រាប់បាត និងវេរភត្តហារ ព្រមទាំង និមន្តព្រះសង្ឃបង្សុកូលពហូទេវាឆ្លង ដើម្បីជាកិច្ចឧទ្ទិសកុសល ជូនចំពោះញាតិកាទាំង៧សណ្តាន ដែលបានចែក ឋានទៅកាន់លោកខាងមុខ សូមជួបតែសេចក្តីស្ងប់ ក្នុងសុខគតិភពជារៀងរហូត។
គួរជម្រាបថា បុណ្យ កាន់បិណ្ឌ ភ្ជុំបិណ្ឌ ជាពិធីបុណ្យមួយដែលធំជាងគេ នៅក្នុងចំណោម ពិធីបុណ្យទាំងអស់ ចំពោះអ្នកកាន់ ព្រះពុទ្ធសាសនា។ ជារៀងរាល់ឆ្នាំនៅ ពិធីបុណ្យកាន់បិណ្ឌ និងភ្ជុំបិណ្ឌ ប្រព្រឹត្តទៅចាប់ពីថ្ងៃ ១ រោច ដល់ថ្ងៃ ១៥ រោច ខែភទ្របទ សម្រាប់ឆ្នាំ២០២០នេះ ត្រូវនឹងថ្ងៃទី០៣ រហូតដល់ថ្ងៃទី ១៦ ខែកញ្ញា។
តាំងពីបុរាណកាលមក ពិធីបុណ្យភ្ជុំបិណ្ឌ តែងតែប្រារព្ធ នៅក្នុងរដូវវស្សា តាមជំនឿសាសនា អំឡុង១៥ថ្ងៃ នៃរដូវបុណ្យភ្ជុំបិណ្ឌ សាច់ញាតិ ទាំងប្រាំពីរសណ្ដាន ព្រមទាំងញាតិទាំងឡាយ ដែលបានចែកឋាន និងចាប់កំណើតជាប្រេត ត្រូវបានរួចផុតពីការឃុំឃាំង អនុញ្ញាតឲ្យមក ស្វែងរកសាច់ញាតិ នៅតាមវត្តអារាមផ្សេងៗ ដែលនាំយកចំណីអាហារ មកឧទ្ទិសកុសល ឲ្យខ្លួន។ ដោយឡែក ការជួបជុំ នាំយកចង្ហាន់ និងទេយ្យវត្ថុ ទៅប្រគេនដល់ព្រះសង្ឃ នៅទីអារាមរយៈពេល១៥ថ្ងៃនេះ គឺបានបំពេញកិច្ចឧបត្តម្ភ ចំពោះព្រះសង្ឃ កំពុងបដិបត្តិធម៌ គង់ចាំព្រះវស្សា រយៈពេល៣ខែ ដោយព្រះអង្គ ពុំអាចនិមន្តទៅបិណ្ឌបាតនៅទីណាបានឡើយ។
រូបភាព និងអត្ថបទ ៖ ក្រសួងព័ត៌មាន
