កាលពីរសៀលថ្ងៃទី០៣ ខែកញ្ញា ឆ្នាំ២០២០ ឯកឧត្តមអ្នកឧកញ៉ា សៀង ណាំ ប្រធានកិត្តិយសសាខាកាកបាទក្រហមកម្ពុជា ខេត្តសៀមរាប និងលោកជំទាវ ទាង អេង ទៀសីហា អនុប្រធានគណៈកម្មាធិការសាខា តំណាងឯកឧត្តម ទៀ សីហា ប្រធានគណៈកម្មាធិការសាខា ព្រមទាំងសហការី បាននាំយកថវិកាសប្បុរសធម៌ ចំនួន២៥,០០០ដុល្លារ ឧបត្ថម្ភដល់ មន្ទីរពេទ្យគន្ធបុប្ផាទី៣ ឬហៅថា មន្ទីរពេទ្យជ័យវរ្ម័នទី៧ ក្នុងក្រុងសៀមរាប សម្រាប់ទ្រទ្រង់ការព្យាបាល និងថែរក្សាសុខភាពកុមារ និងស្ត្រីមានផ្ទៃពោះ ដោយមិនគិតថ្លៃ។
ឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប និង ជាប្រធានកិត្តិយស សាខាកាកបាទក្រហមកម្ពុជាខេត្តសៀមរាប មានប្រសាសន៍ថា៖ ដោយសារវិបត្តិនៃជំងឺកូវី១៩ សម្រាប់ឆ្នាំ២០២០នេះ សាខាកាកបាទក្រហមកម្ពុជាខេត្តសៀមរាប ក៏ដូចជាសាខាកាកបាទក្រហមកម្ពុជាទូទាំងប្រទេស ពុំអាចប្រារព្ឋពិធីទិវាពិភពលោក កាកបាទក្រហមអឌ្ឍចន្ទក្រហមលើកទី១៥៧ ដែលជាឱកាសគៀងគរមូលនិធិសប្បុរសធម៌បានទូលំទូលាយឡើយ។ ទោះបីស្ថិតក្នុងវិបត្តិនេះក្ដី ក៏ថ្នាក់ដឹកនាំ សាខាកាកបាទក្រហមកម្ពុជា ខេត្តសៀមរាប បន្តខិតខំស្វែងរកថវិកា ដើម្បីចូលរួមចំណែកគាំទ្រ ដល់មន្ទីរពេទ្យមួយនេះ ក្នុងការព្យាបាលកុមារកម្ពុជា ហើយនេះក៏ជាការបង្ហាញពីការយកចិត្តទុកដាក់ខ្ពស់ពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា និងគាំទ្រដល់សម្ដេច ក្នុងនាមជាឥស្សរជនឆ្នើមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិ ដើម្បីសុខភាព ស្ដ្រី និងកុមារផងដែរ។
លោកជំទាវ ទាង អេង ទៀសីហា អនុប្រធានគណៈកម្មាធិការសាខា បានបញ្ជាក់ថា ដោយមានកិច្ចសហការល្អរវាង រដ្ឋបាលខេត្ត សហភាពសហព័ន្ឋយុវជនកម្ពុជាខេត្ត អាជ្ញាធរជាតិអប្សរា និងវិស័យឯកជននានា បានធ្វើឲ្យកម្មវិធីជិះកង់សប្បុរធម៌ អំឡុងកម្មវិធី សម្រាកសៀមរាប មានការគាំទ្រយ៉ាងច្រើនកុះករ និងបានប្រមូលថវិកា មកប្រគល់ជូនមន្ទីរពេទ្យ នាពេលនេះ។
លោកសាស្ត្រាចារ្យ ឃុន លាងឈុន អនុប្រធានមន្ទីរពេទ្យជ័យវរ្ម័នទី៧ ជួសមុខឲ្យ មូលនិធិគន្ធបុប្ផាស្វីស អគ្កនាយក ប្រធានមន្ទិរពេទ្យជ័យវ្ម័នទី៧ និង តំណាងឲ្យបុគ្គលិកទាំងអស់ បានថ្លែងអំណរគុណដល់រាជរដ្ឋាភិបាលកម្ពុជា និង អរគុណដល់ ឯកឧត្តម ទៀ សីហា អភិបាល នៃគណៈអភិបាលខេត្ត និង ជាប្រធានគណៈកម្មាធិកាសាខាកាកបាទក្រហមកម្ពុជាខេត្តសៀមរាប ឯកឧត្តម អ្នកឧកញ៉ា សៀង ណាំ និងលោកជំទាវអនុប្រធាន ព្រមទាំងសមាជិក សមាជិកា សាខាកាកបាទក្រហមកម្ពុជាខេត្តសៀមរាបទាំងអស់ ដែលតែងតែបានជួយគាំទ្រ និង សម្រួលគ្រប់កាលៈទេសៈទាំងអស់ដល់មន្ទីរពេទ្យនេះ និង ជាពិសេស សកម្មភាពមនុស្សធម៌ ដែលមិនអាចកាត់ថ្លៃបាន របស់កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
