ប្រជាពលរដ្ឋ១៥០គ្រួសារ សាទរដល់រដ្ឋបាលខេត្តសៀមរាប និងអាជ្ញាធរជាតិអប្សរា អនុញ្ញាតឲ្យបង្កើតសហគមន៍ទេសចរណ៍ធម្មជាតិក្នុងស្រុកប្រាសាទបាគង
ដើម្បីចូលរួមលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ ជាពិសេសក្នុងស្ថានភាពនៃជំងឺកូវីដ១៩ រដ្ឋបាលខេត្តសៀមរាប និងអាជ្ញាធរជាតិអប្សរា ដោយមានការសម្រួលពីអាជ្ញាធរស្រុកប្រាសាទបាគង បានសម្រេចអនុញ្ញាត ឲ្យបង្កើតសហគមន៍ទេសចរណ៍ធម្មជាតិ មានឈ្មោះថា បាគងភូមិខ្ញុំ ស្ថិតក្នុងភូមិថ្នល់ត្រង់ ឃុំបាគង ស្រុកប្រាសាទបាគង ខេត្តសៀមរាប ដែលមានប្រជាពលរដ្ឋចំនួន ១៥០គ្រួសារអាស្រ័យផល។
មានប្រសាសន៍ កាលរសៀលថ្ងៃទី០៥ ខែកញ្ញា ឆ្នាំ២០២០ លោក ពៅ ពិសិដ្ឋ អភិបាលរងខេត្តសៀមរាប លើកឡើងថា ក្រៅពីប្រាសាទអង្គរវត្ត ដ៏ល្បីល្បាញ ខេត្តសៀមរាប នៅមានតំបន់ទេសភាពធម្មជាតិ អេកូ-ទេសចរណ៍ជាច្រើនកន្លែងទៀត សម្រាប់ភ្ញៀវទេសចរទស្សនាកម្សាន្ត។ ទោះបី វិបត្តិនៃជំងឺកូវីដ១៩ បង្កឲ្យវិស័យទេសចរណ៍ទូទាំងពិភពលោក ក៏ដូចជានៅប្រទេសកម្ពុជារងផលប៉ះពាល់ធ្ងន់ធ្ងរក្ដី រាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្ត្រី នៅតែយកចិត្តទុកដាក់ខ្ពស់ លើវិស័យទេសចរណ៍ក្នុងខេត្តសៀមរាប ដោយបានទម្លាក់ថវិកាចំនួន ១៥០លានដុល្លារ ដើម្បីកសាងផ្លូវតូចធំក្នុងទីរួមខេត្ត ឲ្យមានសោភណ្ឌភាព សាកសមជាប៉ូលទេសចរណ៍ដ៏គួរឲ្យទាក់ទាញ។
តាមប្រសាសន៍របស់លោក សូរ ប្លាតុង អភិបាលស្រុកប្រាសាទបាគង បញ្ជាក់ផងដែរថា បច្ចុប្បន្នអាជ្ញាធរស្រុក កំពុងតែរៀបចំភូមិគម្រូចំនួន៤ ទី១ ស្ថិតក្នុងភូមិគោកស្រុក នៅឃុំរលួស, ទី២ ស្ថិតក្នុងភូមិស្ពានក្អែកនៅឃុំកណ្តែក ទី៣ ស្ថិតក្នុងភូមិព្រំកុដ្ឋ ឃុំបល្ល័ង និងទី៤ស្ថិតក្នុងភូមិថ្នល់ត្រង់ ឃុំបាគង។ ប៉ុន្តែគម្រោងនេះ អាចលេចឡើងបាន ទាមទារឲ្យមានការចូលរួមសហការយ៉ាងជិតស្និទជាមួយអាជ្ញាធរមូលដ្ឋាន អាជ្ញាធរជាតិអប្សរា និងមន្ទីរទេសចរណ៍ខេត្ត ក្នុងការរៀបចំសហគមន៍ទាំងនេះ ឲ្យស្របតាមការគោលការណ៍ណែនាំផ្សេងៗ ពិសេស ទទួលស្គាល់ដោយក្រសួងទេសចរណ៍។
សូមជម្រាបដែរថា ក្នុងឱកាស លោក សូត្រ សួរ តំណាងសហគមន៍បាគងភូមិខ្ញុំ ក៏បាននាំយកអំណោយ ចែកជូនដល់លោកយាយ លោកតា និងបងប្អូនប្រជាពលរដ្ឋ ក្នុងសហគមន៍បាគងភូមិខ្ញុំ ចំនួន ១៥០គ្រួសារ ដោយមួយគ្រួសារ ទទួលបាន អង្ករ, សារ៉ុង និងទឹកស៊ីអ៊ីវ។
អត្ថបទ និងរូបភាព: លោក យូ វង្ស
កែសម្រួលដោយ: សេង ផល្លី
