នៅថ្ងៃទី០៧ ខែសីហា ឆ្នាំ២០២០នេះ ប្រជាពលរដ្ឋ នៅទូទាំងប្រទេស បានបន្តទៅវត្តអារាម និងកាន់បិណ្ឌវេនទី៥ នៃពិធីបុណ្យភ្ជុំបិណ្ឌ ដែលជាបុណ្យដ៏ធំមួយក្នុងចំណោមពិធីបុណ្យធំៗនៅកម្ពុជា។ ក្នុងថ្ងៃនេះដែរ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និង លោកជំទាវ បានអញ្ជើញជាអធិបតីក្នុងពិធីកាន់បិណ្ឌវេនទី៥នេះ ស្ថិតក្នុងវត្តកេសរារាម ក្រុងសៀមរាប ព្រមទាំងវត្តមានចូលរួមពី ឯកឧត្តម លោកជំទាវ សមាជិកសមាជិកាក្រុមប្រឹក្សាខេត្ត គណៈអភិបាលខេត្ត អស់លោក លោកស្រីថ្នាក់ដឹកនាំមន្ទីរ-អង្គភាពជុំវិញខេត្តផងដែរ។
មានមតិសំណេះសំណាលនាឱកាសនោះ ឯកឧត្តមប្រធានក្រុមប្រឹក្សាខេត្ត មានប្រសាសន៍ថា៖ ពិធីកាន់បិណ្ឌនេះ ពុទ្ធសាសនិកជនខ្មែរ ត្រូវបានប្រារព្ធបដិបត្តិធ្វើឡើងចាប់ពីថ្ងៃ១រោច ដល់ថ្ងៃ១៤រោច ខែភទ្របទ និងត្រូវប្រារព្ធថ្ងៃបុណ្យភ្ជំបិណ្ឌធំ ត្រូវថ្ងៃ១៥រោច ខែភទ្របទ ទន្ទឹមនោះ រដ្ឋបាលខេត្តបានកំណត់កម្មវិធីរបស់ខ្លួន ចូលរួមជាមួយប្រជាពុទ្ធបរិស័ទតាមទីអារាមនានាក្នុងក្រុងសៀមរាប ដោយបានបន្តបិណ្ឌសរុបចំនួន៧វេន ដោយបាននាំយកនូវចង្ហាន់ ទេយ្យវត្ថុ និងបច្ច័យមួយចំនួន ទៅវេរប្រគេនព្រះសង្ឃ ដើម្បីសម្រួលដល់ការបដិបត្តិធម៌ តាមគន្លងព្រះពុទ្ធសាសនា អំឡុងគង់ចាំវស្សា រួមនិងពិធីបង្សុកូល រាប់បាត្រព្រះសង្ឃ ឧទ្ទិសកុសលផលបុណ្យ ជូនដល់ដួងវិញ្ញាណក្ខ័ន្តអ្នកមានគុណ មានមាតាបិតា ជីដូនជីតា និង ញាតិការទាំង៧សណ្តាន ដែលបានចែកឋានទៅកាន់បរលោកខាងមុខនោះ ព្រមទាំងឧទ្ទិសដល់ដួងវិញ្ញាណក្ខ័ន្តដល់កម្មាភិបាល យុទ្ធជន ដែលបានពលីជីវិត ក្នុងបុព្វហេតុការពារកសាង អភិវឌ្ឍន៍ជាតិមាតុភូមិកម្ពុជា។
ឯកឧត្តមបញ្ជាក់ថា៖ អ្វីៗទាំងអស់ដែលប្រទេសជាតិកំពុងទទួលបានពីការអភិវឌ្ឍ ប្រជាពលរដ្ឋកំពុងទទួលបាននូវការរីកចម្រើនលើគ្រប់វិស័យ និងសេចក្តីសុខក្សេមក្សាន្តគ្រប់ប្រការ ទាំងអស់នេះកើតចេញពីកត្តាសន្តិភាព ដែលមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាស្ថាបនិក ក្នុងនោះវិស័យពុទ្ធចក្រ ក៏មានការរីកចម្រើន ស្របគ្នាជាមួយវិស័យអាណាចក្រផងដែរ។
ទន្ទឹមនោះ ជាមួយនឹងសេចក្ដីរីករាយ និងជ្រះថ្លារបស់ប្រជាពលរដ្ឋក្នុងប្រទេស ក្នុងការប្រារព្ធពិធីកាន់បិណ្ឌ នៃបុណ្យភ្ជុំបិណ្ឌ រាជរដ្ឋាភិបាល ក៏ដូចជាអាជ្ញាធរខេត្ត បានយកចិត្តទុកដាក់ទៅវិធានសុវត្ថិភាពនានា នៅតាមទីវត្តអារាម រមណីយដ្ឋានកម្សាន្តនានា ស្របតាមសេចក្ដីណែនាំរបស់ក្រសួងសុខាភិបាល ដើម្បីបង្ការទប់ស្កាត់ ការឆ្លងរីករាលដាលនៃជំងឺកូវីត១៩។
អត្ថបទ និងរូបភាព: លោក ងិន គឺមឡេង
កែសម្រួលដោយ: សេង ផល្លី
