នៅព្រឹកថ្ងៃទី០១ ខែកញ្ញា ឆ្នាំ២០២០នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអញ្ជើញជា អធិបតីក្នុងពិធីប្រគល់ពានរង្វាន់ ក្នុងការប្រកួតប្រជែង សរសេរអត្ថបទសារព័ត៌មាន លើប្រធានបទ កូវីដ១៩ ពានរង្វាន់ក្លឹបអ្នកកាសែតកម្ពុជា ដែលបានធ្វើឡើងនៅ ភោជនីយដ្ឋាន ទន្លេបាសាក់២។
តាមការបញ្ចាក់របស់ លោក ប៉ែន បូណា ប្រធានក្លឹបអ្នកកាសែតកម្ពុជា បានលើក ឡើងថា ការរៀបចំកម្មវិធីប្រកួតប្រជែងអត្ថបទសារព័ត៌មានទាក់ទងនឹង «កម្ពុជាក្នុងបរិបទកូវី ១៩ »នេះ សម្រាប់ អ្នកសារព័ត៌មានខ្មែរ ដែលកំពុងបំពេញការងារនៅតាមអង្គភាពទូរទស្សន៍ វិទ្យុ កាសែតបោះពុម្ព សារព័ត៌មានអនឡាញ និងអ្នកកាសែតឯករាជ្យ (Freelance Journalists) នៅកម្ពុជា ដោយឡែកអត្ថបទព័ត៌មានប្រចាំថ្ងៃ (hard news) មិនត្រូវទទួលយកមកប្រកួតឡើយ។ អត្ថបទដែលត្រូវ ដាក់ចូលរួមក្នុងការប្រកួត ត្រូវតែជាអត្ថបទភាសាខ្មែរ ត្រូវបានចុះផ្សាយនៅតាមអង្គភាពរបស់ខ្លួន ឬអង្គភាពសារព័ត៌មានណាមួយរួចរាល់ហើយ មុនថ្ងៃទី១៣ ខែកក្កដា ឆ្នាំ ២០២០។
លោក ពុយ គា អគ្គលេខាធិការ ក្លឹបអ្នកកាសែតកម្ពុជា និងជា ប្រធានគណៈកម្មការកំណែ បានបញ្ជាក់ថា សម្រាប់ការប្រកួតប្រជែងសរសេរអត្ថបទព័ត៌មាន ពាក់ព័ន្ធជំងឺកូវីត១៩ នេះ មានបេក្ខជន បេក្ខនារី ដាក់ពាក្យចូលរួមចំនួន ២៥ រូប ក្នុងនោះ មកពីស្ថានីយទូរទស្សន៍ចំនួន ៩ រូប គេហទំព័រ ឬសារព័ត៌មានអនឡាញចំនួន ៨រូប ស្ថានីយវិទ្យុចំនួន ៥រូប និងកាសែតបោះពុម្ព ចំនួន ៣ រូប។
ឯកឧត្តមរដ្ឋមន្រ្តី ខៀវ កាញារីទ្ធ មានប្រសាសន៍លើកឡើងថា កាលពីសម័យមុន មេរោគឆ្លង ដែលល្បីជាងគេ គឺជំងឺអេដស៏ និងជំងឺសារស៍ ហើយពីពេលនោះដែរ ប្រព័ន្ធផ្សព្វផ្សាយ សង្គមក៏មិនសូវមាននោះទេ តែអ្វីសំខាន់គឺមានកិច្ចសហការគ្នាជាអន្តរជាតិ ដើម្បីស្វែងរកវិធីទប់ទល់ និងព្យាបាលនូវជំងឺទាំងនោះបានឆាប់រហ័ស។ ប៉ុន្តែនៅក្នុងដំណាក់កាលថ្មីនេះ ចំពោះជំងឺកូវីត១៩ បានផ្ទុះឡើង ស្របពេលដែលប្រព័ន្ធផ្សព្វផ្សាយសង្គម មានភាពទូលំទូលាយ ដែលធ្វើឲ្យព័ត៌មានពិត និងព័ត៌មានមិនពិត មានភាពច្របូកច្រប់គ្នា។ ជាងនេះទៅទៀត បណ្តាប្រទេសនៅលើពិភពលោក ពុំមានការសហការគ្នាល្អជាអន្តរជាតិ ក្នុងការរកវិធានការ ការពារ និងទប់ស្កាត់នៃការឆ្លងរីករាលនៃជំងឺកូវីត១៩ នេះទេ តែបែរ ជាចោទប្រកាន់គ្នាទៅវិញទៅមក ហើយប្រទេសទាំងនោះមួយចំនួន បានបង្ហាញពីការរកឃើញវ៉ាក់សាំងរៀងៗខ្លួន ដែលរហូតមកដល់ពេលនេះ មន្ទីរពិសោធន៍ជាង ១០០ បានអះអាងថា បានរកឃើញវ៉ាក់សាំងការពារជំងឺកូវីដ១៩។ ទាំងនេះបានបង្ហាញថា ជាតិនិយមក្នុងការស្វែងរកវ៉ាក់សាំង ការពារជំងឺកូវីត១៩ ជាងនេះ គឺ
កត្តាទាំងនេះ បានបង្ហាញថា ពិភពលោក បច្ចុប្បន្ន គិតខ្លួនឯងជាមុន មុននឹងគិតអ្នកដទៃទៀត ឬមានន័យម្យ៉ាងទៀតថា លុយធំជាង កិច្ចសហការគ្នា ក្នុងការទប់ស្កាត់មេរោគ ។ ទាំងនេះមានន័យថា បុគ្គលនិយម កំពុងដើរតូនាទី ធំ អាស្រ័យការរីកភាយ នៃប្រព័ន្ធផ្សព្វផ្សាយសង្គម។
ឯកឧត្តមរដ្ឋមន្រ្តី លើកឡើងថា នៅពេលមានការផ្ទុះឡើងនូវជំងឺកូវីត១៩ មានអ្នកប្រឆាំងជំទាស់ មិនឲ្យមានការពាក់ម៉ាស់ ការពារ និងការជំទាស់គ្រប់បែបយ៉ាង ដែលបានបង្ហាញពីការមិនទុកចិត្តទៅលើរដ្ឋាភិបាល អ្នកនយោបាយ អ្នកឯកទេស រីឯព័ត៌មានលើប្រព័ន្ធផ្សព្វផ្សាយច្របូកច្របល់គ្នា ដោយព័ត៌មានពិត និងព័ត៌មានមិនពិត ដែលបានធ្វើឲ្យគុណតម្លៃសារព័ត៌មានធ្លាក់ចុះ។ ចំពោះការរៀបចំឡើងនូវការប្រកួតប្រជែងសរសេរអត្ថបទទាក់ទង ជំងឺកូវីត១៩ នេះ គឺជាប្រការដ៏ល្អ ដើម្បីជាការពង្រីក ការផ្សព្វផ្សាយបានកាន់តែទូលំទលាយ ទាក់ទងការបង្ការ ការពារ ការឆ្លងរីករាលដាលនៃជំងឺកូវីត ១៩ ហើយក៏ជាឱកាសក្នុងការរួម ចំណែកលើកតម្លៃ ស្នាដៃរបស់អ្នកសារព័ត៌មាន ឡើងវិញ បន្ទាប់ពីមានការធ្លាក់ចុះមួយចំនួន នៃតម្លៃអ្នកសារព័ត៌មាន ដោយសារ បុគ្គលគ្មានសណ្ដាប់ធ្នាប់មួយចំនួន បូកផ្សំនឹងភាពគ្មានវិជ្ជាជីវៈជាអ្នកសារព័ត៌មានផងដែរ។
គួរជម្រាបថា ជ័យលាភី ដែលផ្ដល់ដោយ ក្លឹបអ្នកកាសែតកម្ពុជា សម្រេចយកចំនួន៥ ក្នុងនោះ ជ័យលាភីលេខ ១ បានទៅលើ កញ្ញា សៅ សុខហេង អ្នកសារព័ត៌មាន ថ្មី ថ្មី សរសេរអត្ថបទមានចំណងជើងថា ឪពុកម្តាយ ក្លាយជាសិស្សផង និងជាគ្រូផង សម្រាប់ការសិក្សាតាមប្រព័ន្ធ អនឡាញ របស់កូនៗនាកំឡុងកូវីត១៩ ដោយ ទទួលបានរង្វាន់ ជាទឹកប្រាក់ចំនួន ២លាន រៀល និងពាន១ ។ ជ័យលាភីលេខ ២ បានទៅលើ លោក ម៉ៅ សំណាង មកពីទូរទស្សន៍ PNN ទទួលបានរង្វាន់ជាទឹកប្រាក់ចំនួន ១ លាន ២សែនរៀល និងពាន ១ ។ លេខ ៣ បានទៅលើ អ្នកស្រី មុំ គន្ធា មកពីវិទ្យុផ្កាឈូក ទទួលបាន រង្វាន់ជាទឹកប្រាក់ចំនួន ៨ សែនរៀល និងពាន ១។ ជ័យលាភីលេខ ៤ អ្នកស្រី ស៊ន សុខឃាង អ្នករាយការណ៍ព័ត៌មាន និងផលិតបទយកការណ៍សង្គម មកពីទូរទស្សន៍ CNC និង លេខ ៥ អ្នកស្រី អេង គឹមហុង មកពីវិទ្យុបារាំងអន្តរជាតិ ដោយម្នាក់ៗទទួលបានរង្វាន់ លើកទឹក ចិត្តជាទឹកប្រាក់ ៤ សែនរៀល ក្នុងឱកាសនោះ ឯកឧត្តមរដ្ឋមន្ត្រីក្រសួងព័ត៌មាន ក៏បានចូលរួមនូវថវិកា ១លានរៀល សម្រាប់ដំណើរការងារក្នុងកម្មវិធីផងដែរ៕
អត្ថបទ និងរូបភាព: ក្រសួងព័ត៌មាន
