កាលពីព្រឹកថ្ងៃទី០៨ ខែកញ្ញា ឆ្នាំ២០២០នេះ នៅសាលប្រជុំធំសាលាខេត្តសៀមរាប មានបើកកិច្ចប្រជុំសាមញ្ញលើកទី១៦ របស់ក្រុមប្រឹក្សាខេត្តសៀមរាប អាណត្តិទី៣ ក្រោមអធិបតីភាពឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប ដោយមានការចូលរួមពីសំណាក់ឯកឧត្ដម លោកជំទាវ លោក លោកស្រី ជាសមាជិក សមាជិកាក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត និង អាជ្ញាធរក្រុង-ស្រុកក្នុងខេត្ត ។
សូមបញ្ជាក់ថា មានរបៀបវារ:ចំនួន៦ ដែលត្រូវបានលើកយកមកធ្វើការពិនិត្យ ពិភាក្សា ដោះស្រាយ និងអនុម័ត នៅក្នុងកិច្ចប្រជុំនេះ រួមមាន ៖ ១- ពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី១៥ របស់ក្រុមប្រឹក្សាខេត្ត អាណត្តិទី ៣ កាលពីថ្ងៃទី០៥ ខែសីហា ឆ្នាំ២០២០ , ២- ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំវិសាមញ្ញ របស់ក្រុមប្រឹក្សាខេត្ត អាណត្តិទី ៣ កាលពីថ្ងៃទី២៥ ខែសីហា ឆ្នាំ២០២០ , ៣- របាយការណ៍ ស្តីពីការដោះស្រាយសំណួរ- សំណូមពរដែលបានលើកឡើង ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០១៨ និង២០១៩ , ៤- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែសីហា ឆ្នាំ២០២០ ស្ដីពីការអនុវត្តការងារ របស់រដ្ឋបាលខេត្តសៀមរាប , ៥- ពិនិត្យ ពិភាក្សា និងអនុម័តលើសេចក្តីព្រាងកម្មវិធីវិនិយោគ ៣ឆ្នាំរំកិល (២០២០ -២០២២ )របស់រដ្ឋបាលខេត្ត និង ៦- បញ្ហាផ្សេងៗ ។
បន្ទាប់ពីធ្វើការពិនិត្យ ពិភាក្សា ដោះស្រាយ និងអនុម័តលើរបៀបវារ:ទាំងអស់រួចមក អង្គប្រជុំបានលើកយកនូវបញ្ហាមួយចំនួនមកពិភាក្សា ក្នុងនោះ ៖ អំពីវិធានការក្នុងការបង្ការ ការពារ និង ទប់ស្កាត់ការឆ្លងរាលដាលជំងឺកូវីដ១៩ ក្នុងឱកាសដែលសិស្សានុសិស្សគ្រប់កម្រិតបានចូលសិក្សាឡើងវិញ , បញ្ហាបទល្មើសកាប់ទន្ទ្រានព្រៃលិចទឹក , ការប្រើប្រាស់ឧបករណ៍នេសាទខុសច្បាប់ , ករណីល្បែងស៊ីសង , ការធ្វើកូដកម្មរបស់បុគ្គលិកសណ្ឋាគារ , សុវត្ថិភាពចរាចរណ៍ ,បញ្ហាផ្លូវថ្នល់ , បញ្ហាជីកដីធ្វើអាជីវកម្ម , ការធ្វើអាជីវកម្មបញ្ចូលហ្គាសរថយន្ត , ការធ្វើប័ណ្ណកម្មសិទ្ធិដីធ្លីមានការយឺតយ៉ាវ , បញ្ហាស្លាកសញ្ញាចរាចរណ៍ និងការលក់ដូរភាពអាណាធិបតេយ្យនៅក្រោយ មន្ទីរពេទ្យគន្ធបុប្ផា ។ល។
ជាការឆ្លើយតបឯកឧត្តម ទៀ សីហា បានមានប្រសាសន៍ថា ចំពោះសិស្សានុសិស្សនៅកម្រិតមត្តេយ្យសិក្សា និង បឋមសិក្សា សង្គេតឃើញថា គ្រប់គ្រឹះស្ថានសិក្សាទាំងអស់ បានអនុវត្តយ៉ាងតឹងរឹង នូវវិធានការសុវត្ថិភាពតាមសេចក្តីណែនាំរបស់ក្រសួងសុខាភិបាល ដោយលោកគ្រូអ្នកគ្រូ បានយកចិត្តទុកដាក់ខ្ពស់ចំពោះសិស្សរបស់ខ្លួន ដោយធ្វើអនាម័យ និង ការវាស់កម្តៅ ព្រមទាំងពាក់ម៉ាស់បានត្រឹមត្រូវ ប៉ុន្តែអ្វីដែលជាការព្រួយបារម្ភនោះ គឺក្នុងពេលសិស្សចេញលេង ពួកគាត់នឹងមានភាពស្និទ្ធស្នាលគ្នាជាមួយមិត្តភ័ក្ត ដោយមិនបានរក្សាគន្លាតពីគ្នាឡើង ដែលជាបញ្ហានោះ ទោះបីកូនៗបាន ទទួលបានការអប់រំពីឳពុកម្តាយ អាណាព្យាបាល លោកគ្រូអ្នកគ្រូ ក៏យើងមិនអាចគេចផុតពីបញ្ហាទាំងនេះឡើយ ។
ក្នុងឱកាសនោះដែរ ឯកឧត្តមអភិបាលខេត្តសៀមរាប បានធ្វើការក្រើនរំលឹកដល់អាជ្ញាធរមូលដ្ឋានក្រុង ស្រុក និង កម្លាំងសមត្ថកិច្ចទាំងបី រួមទាំងមន្ទីរ អង្គភាពពាក់ព័ន្ធទាំងអស់ ត្រូវតែបង្ក្រាបឲ្យខាងតែបាននូវបទល្មើសកាប់ទន្រ្ទានព្រៃលិចទឹក និង តំបន់ឧទ្យានជាតិ , ការប្រើប្រាស់ឧបករណ៍នេសាទខុសច្បាប់ដែលធ្វើឲ្យពូជត្រីនៅបឹងទន្លសាបហិនហោចវិនាស , បញ្ហាល្បែងស៊ីសង គ្រឿងញៀន និង ត្រូវធ្វើពីបច្ចុប្បន្នភាពចំនួនគ្រួសារដែលនៅលើដីរដ្ឋ នៅក្នុងតំបន់ឧទ្យានជាតិឲ្យបានច្បាស់ពីប្រវត្តិសាវតា បើមិនមានប្រវត្តិសាវតាច្បាស់លាស់នោះទេ គឺត្រូវអនុវត្តតាមវិធានការរដ្ឋបាល ។
ឯកឧត្តម ទៀ សីហា អភិបាលខេត្តសៀមរាប មានប្រសាសន៍បន្ថែមថា ចំពោះការវិវាទរបស់និយោគជិកជាមួយវនិយោជកនោះ ត្រូវបានធ្វើការដោះស្រាយបានជាបណ្តើរៗហើយ ប៉ុន្តែបញ្ហាសំខាន់ទៀតនោះ គឺសុំឲ្យមន្ទីរ អង្គភាពពាក់ព័ន្ធត្រូវធ្វើការពង្រឹងបន្ថែមទៀត អំពីសុវត្ថិភាពចរាចរណ៍ , ការរៀបចំដាក់ស្លាកសញ្ញាចរាចរណ៍ ត្រូវពង្រឹងឲ្យបានពីច្បាប់អនុញ្ញាតការបើកធ្វើអាជីវកម្មបញ្ចូល ឬ ស្តុបហ្គាសក្នុងក្រុង និង ជំរុញការធ្វើប័ណ្ណកម្មសិទ្ធិដីធ្លីជូនប្រជា ពលរដ្ឋបានយកទៅប្រើប្រាស់ ក្នុងនោះអាជ្ញាធរក្រុង ត្រូវរៀបចំឲ្យមានសណ្តាប់ធ្នាប់ឡើងវិញ ចំពោះភាពអាណាធិបតេយ្យ ក្នុងការយកផ្លូវថ្នល់ក្រោយមន្ទីរពេទ្យគន្ធបុប្ផា ជាកន្លែងលក់ដូរ ដែលធ្វើឲ្យកកស្ទះចរាចរណ៍ទៅមក ៕
អត្ថបទ ៖ លោក ម៉ី សុខារិទ្ធ និង លោក ឈិត សាវី
រូបថត ៖ រដ្ឋបាលខេត្ត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
