យ៉ាងហោចណាស់អ្នកបើកបរយានយន្ត ៦នាក់ ក្នុងចំណោម ៤៩នាក់ ត្រូវបានមន្ត្រីជំនាញ នៃក្រុមការងារអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប ពិនិត្យឃើញមាន ផ្ទុកសារធាតុញៀនក្នុងខ្លួន ស្ថិតនៅលើកំណាត់ផ្លូវជាតិលេខ៦ ក្នុងភូមិសាស្ត្រ ស្រុកពួក ខេត្តសៀមរាប នេះបើតាមរបាយការណ៍ផ្ដល់ដោយមន្ត្រី នៃមន្ទីរសាធារណការ និងដឹកជញ្ជូន ខេត្ដសៀមរាប នៅល្ងាចថ្ងៃទី០៨ ខែកញ្ញា ឆ្នាំ២០២០។
បើតាមការលើកឡើងរបស់ លោក ពិន ប្រាកដ អភិបាលរងខេត្តសៀមរាប និងជាអនុប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បញ្ជាក់ថា គោលបំណងនៃការចុះត្រួតពិនិត្យ របស់អាជ្ញាធរខេត្តសៀមរាបនៅពេលនេះ គឺផ្តោតសំខាន់ទៅលើកត្តា៣ គឺទី១. ទប់ស្កាត់ និង កាត់បន្ថយគ្រោះថ្នាក់ចរាចរណ៍ឱ្យបានជាអតិបរិមា ទី២. រក្សាសណ្តាប់ធ្នាប់ចរាចរណ៍ឱ្យបានល្អប្រសើរ និងមានសេចក្តីថ្លៃថ្នូររបស់សង្គមជាតិ និងទី៣. ទប់ស្កាត់នូវបទល្មើសចរាចរណ៍លើដងផ្លូវសាធារណៈឱ្យបានដាច់ខាត។
តាមរយៈរបាយការណ៍ លោកអភិបាលរងខេត្ត សង្កេតឃើញថា ក្នុងចំណោមរថយន្តបានត្រួតពិនិត្យចំនួន ១១៧ គ្រឿងនៅថ្ងៃនេះ មានរថយន្តត្រឹមត្រូវតាមលក្ខណៈបច្ចេកទេសរហូតដល់ ១១៣ គ្រឿង វាបង្ហាញថា ពួកគាត់មានការយល់ដឹងច្រើនអំពីការរឹតបណ្តឹងការអនុវត្តច្បាប់ចរាចរណ៍ផ្លូវគោក។ ចំពោះអ្នកបើកបរ ដែលមានផ្ទុកសារធាតុញៀន ក្នុងខ្លួន កម្លាំងជំនាញ នឹងអនុវត្តន៍តាមនីតិវិធី។
ទោះជាយ៉ាងណាក៏ដោយ លោកក៏បានអំពាវនាវ ដល់អ្នកប្រើប្រាស់ផ្លូវទាំងអស់ ចូលរួមគោរពច្បាប់ចរាចរណ៍ផ្លូវគោកទាំងអស់គ្នា និងមានអធ្យាស្រ័យគ្នាទៅវិញទៅមក ជាពិសេសនៅក្នុងឱកាសបុណ្យភ្ជុំបិណ្ឌនេះ ចៀសវាងមានសោកនាដណាមួយ ចំពោះសមាជិកគ្រួសារ ញាតិសន្តាន រួមនិងខ្លួនឯងផ្ទាល់ ។
គួរជម្រាបថា ចាប់ពីថ្ងៃទី២៦ ខែកក្កដា រហូតដល់ថ្ងៃទី២៥ខែសីហាឆ្នាំ២០២០ ក្រុមការងារ បានចុះត្រួតពិនិត្យលក្ខណៈបច្ចេកទេសយានយន្ត បានចំនួន៥លើក ក្នុងភូមិសាស្រ្ត ស្រុកប្រាសាទបាគង ជីក្រែង ពួក សូទ្រនិគម ខេត្តសៀមរាប ដោយពិនិត្យរថយន្តបានចំនួន៦១៩គ្រឿង ក្នុងនោះរថយន្តមានលក្ខណៈបច្ចេកទេសត្រឹមត្រូវមានចំនួន៥៩០គ្រឿង និងខុសបច្ចេកទេសចំនួន២៩គ្រឿង៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក សេង ផល្លី
