ក្នុងដំណើរទស្សនកិច្ច នៅតាមបណ្តាខេត្តច្រកព្រំដែនកម្ពុជា-ថៃ ឯកឧត្តម ផាប្លូ កាំង ( Pablo Kang ) ឯកអគ្គរដ្ឋទូតអូស្ត្រាលីប្រចាំនៅកម្ពុជា នារសៀលថ្ងៃទី០៨ ខែកញ្ញា ឆ្នាំ២០២០ ស្ថិតនៅក្នុងមណ្ឌលចត្តាឡីស័កស្រុកឡាញ់ ខេត្តសៀមរាប បានវាយតម្លៃថា កម្ពុជាមានការគ្រប់គ្រង ការពារ និងទប់ស្កាត់ ការរីករាលដាលជំងឺកូវីត១៩ ទៅក្នុងសហគមន៍ បានល្អប្រសើរ ព្រមទាំងបានរក្សាការប្រុងប្រយ័ត្នយ៉ាងហ្មត់ចត់។
ដំណើរទស្សនកិច្ចនេះ ជាផ្នែកមួយនៃបេសកកម្មរបស់ប្រតិភូទូតអូស្រ្តាលី ដើម្បីនាំយកនូវមូលនិធិ សម្រាប់ការបណ្តុះបណ្តាលមន្រ្តីអង្គការអន្តរជាតិទេសន្តប្រវេសន៍ (IOM ) នៅច្រកព្រំដែនអន្តរជាតិកម្ពុជា-ថៃ និងផ្តល់សម្ភារៈការពារកូវីត១៩ដល់ក្រុមការងារ សម្រាប់ចែកជូនដល់ប្រជាពលរដ្ឋកម្ពុជា ដែលទើបត្រឡប់ពីប្រទេសថៃ ចូលមកកម្ពុជាវិញ។ ក្នុងនោះ មណ្ឌលចត្តាឡីស័កក្រឡាញ់ ក៏ជាចំណែកមួយ ដែលគាំទ្រដោយ អង្គការអន្តរជាតិទេសន្តប្រវេសន៍ (IOM ) ផងដែរ។
ឯកឧត្តមឯកអគ្គរដ្ឋទូត ក៏បានរំលឹកការចងចាំ ដែលមិនអាចបំភ្លេចបាននោះ គឺអ្នកទេសចរជនជាតិអូស្រ្តាលីចំនួន៨១នាក់ ដែលជាប់នៅលើនាវាវេសស្ទឺដាំ បានរួចផុតពីគ្រោះថ្នាក់ ហើយបានជាន់លើទឹកដីប្រទេសកម្ពុជា នៅក្រុងព្រះសីហនុ ប្រកបដោយសុវត្ថិភាព។ ទាំងអស់នេះ ក៏ដោយសារតែបេះដូងមនុស្សធម៌ នៃសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា។
ឯកឧត្តមឯកអគ្គរដ្ឋទូត បញ្ជាក់ថា ការបង្ហាញតួលេខពិតប្រាកដប្រចាំថ្ងៃ និងការក្រើនរំលឹករបស់ក្រសួងសុខាភិបាលកម្ពុជាជាប្រចាំ គឺជាវិធីសាស្រ្តដ៏សំខាន់ ដែលធ្វើឲ្យប្រជាពលរដ្ឋកម្ពុជាទទួលបាននូវការយល់ដឹង និងរួមគ្នាទប់ស្កាត់ជំងឺកូវីត១៩ នៅក្នុងសហគមន៍។ គិតមកទល់ពេលនេះ ប្រទេសអូស្រា្តលី និងកម្ពុជា បានរួមកិច្ចសហប្រតិបត្តិការជាមួយគ្នាជាង២០ឆ្នាំកន្លងមកហើយ ជាពិសេសក្នុងកាលៈទេសៈនេះ អូស្រា្តលីក៏នៅតែបន្តរួមកិច្ចសហប្រតិបត្តិការជាមួយកម្ពុជា ក្នុងការប្រយុទ្ធប្រឆាំងជំងឺកូវីត១៩នេះផងដែរ។
—— បទសម្ភាសន៍ ឯឧ ផាប្លូ កាង ២នាទី៥០វិនាទី——
ក្នុងឱកាសនោះ លោក ពិន ប្រាកដ អភិបាលរងខេត្តសៀមរាប និងជាអនុប្រធានគណៈកម្មការប្រយុទ្ធប្រឆាំងជំងឺកូវីត១៩ខេត្តសៀមរាប បង្ហាញថា ដំណើរទស្សនកិច្ចរបស់ឯកអគ្គរាជទូតអូស្រ្តាលីនៅមណ្ឌលចត្តាឡីស័កក្រឡាញ់ គឺជាការបង្ហាញនូវការរឹតចំណងការទូតកាន់តែរឹងមាំបន្ថែមទៀតរវាងប្រទេសទាំងពីរ។ ឆ្លៀតពេលនោះដែរ លោកអភិបាលរងបានជម្រាបថា បច្ចុប្បន្ន ជំងឺកូវីដ១៩នៅកម្ពុជា ភាពធូរស្រាល ដែលអនុគ្រោះដល់ការបើកទ្វារសាលារៀន ឲ្យដំណើរការជាបណ្តើរៗឡើងវិញ ដូច្នេះមណ្ឌលចត្តាឡីស័កដែលបានរៀបចំនៅក្នុងសាលារៀនមួយចំនួននោះ រដ្ឋបាលខេត្តកំពុងពិចារណាផ្លាស់ប្តូរទីតាំង ដើម្បីទំនុកចិត្តរបស់សិស្ស និងមាតាបិតាសិស្ស។
—– សម្ភាសន៍ លោក ពិន ប្រាកដ ២៥វិនាទី—–
គួរបញ្ជាក់ដែរថា ខេត្តសៀមរាប ចាប់គិតពីថ្ងៃទី១០ ខែមេសា មកដល់ថ្ងៃទី០៦ ខែកញ្ញា ឆ្នាំ២០២០នេះ មានប្រជាពលរដ្ឋធ្វើចំណូលស្រុកមកពីក្រៅប្រទេសសរុប ជាង ១ម៉ឺន ៧ពាន់នាក់ ក្នុងនេះដែរស្រុកក្រឡាញ់ មានចំណូលស្រុកចំនួន ៩៦៦នាក់ បានឆ្លងកាត់ការធ្វើចត្តឡីស័ក១៤ថ្ងៃ ចំនួន ៩៤៨នាក់ នៅសល់ ២៩នាក់៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
