នៅសាលប្រជុំសាលាខេត្តសៀមរាប ថ្ងៃទី០៩ខែកញ្ញាឆ្នាំ២០២០ អគ្គលេខាធិការដ្ឋាននៃគណៈកម្មាធិការជាតិ ជំរុញចលនាភូមិមួយផលិតផលមួយ មានរៀបចំកិច្ចប្រជុំមួយ ស្តីពីការចុះតាមដាន ការងារជំរុញចលនាភូមិមួយផលិតផលមួយ ដើម្បីពិភាក្សា និងផ្សព្វផ្សាយគោលការណ៍ចងក្រង សមាជិកភូមិមួយផលិតផលមួយ ក្នុងខេត្តសៀមរាប។
ថ្លែងក្នុងឱកាសនោះ ឯកឧត្តម ផលសុជាតិ អគ្គលេខាធិការរង នៃអគ្គលេខាធិការដ្ឋាន ភូមិមួយផលិតផលមួយ មានបង្ហាញថា៖ ភូមិមួយផលិតផលមួយ សំដៅដល់ផលិតផលរបស់ខ្មែរទាំងឡាយណា ដែលត្រូវបានទទួលស្គាល់ដោយគណៈកម្មាធិការជាតិ ជំរុញចលនាភូមិមួយផលិតផលមួយ ដោយផលិតករដាក់ពាក្យស្នើសុំចូលជាសមាជិកភូមិមួយផលិតផលមួយ តាមរយៈក្រុមការងារ គណៈកម្មាធិការខេត្ត ជំរុញចលនាភូមិមួយផលិតផលមួយ ព្រមទាំងមានការចុះទៅសម្ភាសន៍ប្រមូលព័ត៌មាន បន្ទាប់មកទើបគណៈកម្មាធិការ ធ្វើការវាយតម្លៃលើលក្ខណៈវិនិច្ឆ័យអំពីផលិតផលណាមួយនោះ ថាតើសមស្របអាចទទួលយកជាផលិតផលមួយបានឬយ៉ាងណា។
ឯកឧត្តម បញ្ជាក់ថា សមាជិកភូមិមួយផលិតផលមួយ ត្រូវបានជួយគាំទ្រ ពីអង្គការដៃគូ អ្នកជំនាញទាំងក្នុងនិងក្រៅប្រទេសនានា ដើម្បីជួយពង្រឹងដល់ប្រជាកសិករក្នុងសហគមន៍ តាមរយៈការបណ្តុះបណ្តាលបច្ចេកទេសដាំដុះ បច្ចេកទេសផលិត ជួយរកទីផ្សារ និងឱ្យពួកគាត់យល់ដឹងបន្ថែមទៅលើការគ្រប់គ្រងអាជីវកម្ម។ ទាំងអស់នេះ វាបានចូលរួមកាត់បន្ថយ ការនាំចូលទំនិញប្រើប្រាស់មួយចំនួន ពីប្រទេសជិតខាង ដែលជាគោលដៅមួយមិនត្រឹមតែជួយកំណើនសេដ្ឋកិច្ចជាតិ ឬកំណើនម៉ាក្រូសេដ្ឋកិច្ចនោះទេ ប៉ុន្តែវាបានជួយដល់កំណើនសេដ្ឋកិច្ចគ្រួសារផងដែរ។
ឯកឧត្តម ក៏បានសង្កត់ធ្ងន់ផងដែរថា៖ ជាទិសដៅសម្រាប់ចុងឆ្នាំ២០២០ នៅតាមបណ្ដាខេត្តនីមួយៗ ធ្វើយ៉ាងណា ត្រូវចងក្រង ផលិតផល របស់សមាជិកនៃភូមិមួយផលិតផលមួយ ចន្លោះ ពី១០ ទៅ១៥ផលិតផល។ ចលនានេះ ទាមទារឱ្យមានការចូលរួមជាមួយក្រសួង ស្ថាប័ន អង្គភាព មន្ទីរពាក់ព័ន្ឋ ដើម្បីអភិវឌ្ឍន៍សមត្ថភាពប្រជាកសិករ ក្នុងសហគមន៍តាមមូលដ្ឋាន។ ក្នុងនោះ ការជំរុញសមាជិកនៃចលនាជំរុញភូមិមួយផលិតផលមួយ ត្រូវជួយធ្វើការ កែលម្អ ជំរុញ កែច្នៃសក្តានុពល ធនធានក្នុងគ្រួសារ និងក្នុងសហគមន៍របស់ប្រជាកសិករ ដើម្បីពួកគាត់ ប្រែក្លាយផលិតផលដែលមានក្នុងមូលដ្ឋានឱ្យទៅជាទំនិញ ដែលអាចទាញយកផលកម្រៃនៅលើទីផ្សារ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
