ឈានចូលដល់ពិធីកាន់បិណ្ឌវេនទី៧ ត្រូវនឹងថ្ងៃទី០៩ ខែកញ្ញា ឆ្នាំ២០២០នេះ ឯកឧត្តម អ៊ាន ឃុន សមាជិកក្រុមប្រឹក្សាខេត្ត តំណាងឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប លោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដឹកនាំប្រតិភូមន្រ្តីរាជការ រៀបចំពិធីកាន់បិណ្ឌវេនទី៧ នៅវត្តចំនួន២ រួមមាន វត្តព្រះឥន្ទកោសីយ៍ និងវត្តពុទ្ធស្ថាននគរាជ ធម្មមេត្តា ស្ថិតនៅក្នុងក្រុងសៀមរាប។
មតិសំណេះសំណាល ជាមួយមន្ត្រីរាជការ ពុទ្ធបរិស័ទ នាឱកាសនោះ លោក ពិន ប្រាកដ លើកឡើងថា៖ ពិធីបុណ្តនេះ គឺជាអភិលក្ខិត(អៈភិល័ក-ខិតៈ) ជាសម័យដ៏បវរ ដែលពុទ្ធសាសនិកជន តែងតែប្រារព្ធធ្វើមិន ដែលអាក់ខានឡើយ គឺចាប់ពីថ្ងៃ១រោច ដល់ថ្ងៃ១៥រោច ខែភទ្របទ។ បុណ្យភ្ជុំបិណ្ឌ មានកំណើតកើតឡើងតាំងពីសម័យពុទ្ធកាល មកម្ល៉េះ តែកាលនោះគេមិនហៅថាបុណ្យភ្ជុំបិណ្ឌនោះទេ តែជាបុណ្យវេរបច្ច័យបួន ប្រគេនចំពោះព្រះសង្ឃពេញក្នុងរយៈពេលនៃការចូលកាន់វស្សា។ ឈ្មោះថាពិធីបុណ្យកាន់បិណ្ឌ ឬដាក់បិណ្ឌ និងបុណ្យភ្ជុំបិណ្ឌនេះ ត្រូវបានបង្កើតឡើង នៅក្នុងរាជ្យ ព្រះបាទអង្គឌួងនិងកំណត់យករយៈពេល១៥ថ្ងៃ គឺចាប់ពីថ្ងៃ១រោច ដល់ថ្ងៃ១៥ ខែភទ្របទ ។
បុណ្យដាក់បិណ្ឌ កាន់វេន ដែលបានកើតឡើងក្នុងពេលនេះ គឺជាទានដ៏ប្រសើរថ្លៃថ្លា ផុសចេញពីទឹកចិត្តដ៏ជ្រះថ្លាបរិសុទ្ធនៃក្រុមប្រឹក្សា គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធចំណុះរដ្ឋបាលខេត្ត ដែលបានមូលមតិគ្នាជាឯកច្ឆ័ន្ធ បរិច្ចាគសទ្ធា ទំនុកបម្រុងបច្ច័យ៤ចំពោះព្រះសង្ឃ ដែលគង់ចាំវស្សាអស់កាលត្រីមាសនោះ។
គោលបំណងសំខាន់នៃពិធីកាន់បិណ្ឌនេះ ទី១ គឺដើម្បីតបសងគុណ ឧទ្ទិសកុសលទៅដល់បុព្វការីជន ដែលបានចែកឋានទៅកាន់លោកខាងមុខ ទី២ គឺដើម្បីទាញយកយកផលអានិសង្ឃ ដែលកើតចេញពីកិរិយាសាងកុសល សន្សំសេចក្តីសុខ សេចក្តីចម្រើន ជាប្រយោជន័សម្រាប់ខ្លួនឯងផង និងបានទៅដល់អ្នកមានគុណផង និងទី៣ ដើម្បីបង្កើតសាមគ្គីធម៌នៃប្រជាពុទ្ធបរិស័ទ ព្រោះថាពិធីកាន់វេន ឬភ្ញុំបិណ្ឌ ពុំអាចធ្វើឡើងដោយដោយបុគ្គលម្នាក់ឯងបាននោះទេ គឺរមែងតែងតែមានការចូលរួមពីសំណាក់ពិទ្ធបរិស័ទចំណុះជើងវត្តជិតឆ្ងាយ ដោយចៀសមិនផុតនោះឡើយ ហើយកាន់តែមានអត្ថន័យដ៏ប្រពៃនោះ ពិធីបុណ្យនេះក៏ជាឱកាសផ្សាភ្ជាប់កាន់តែរឹងមាំថែមទៀត រវាងវិស័យអាណាចក្រនិងវិស័យពុទ្ធចក្រ។
ឆន្ទៈទាំងបីនេះហើយ ដែលជាមូលហេតុដ៏សំខាន់ ក្នុងការជួយជំរុញឲ្យមហាកុសលចេតនា នៃមន្រ្តីរាជការចំណុះរដ្ឋបាលខេត្ត ផ្តើមធ្វើបុណ្យកាន់បិណ្ឌ ដាក់បិណ្ឌ ភ្ជុំបិណ្ឌ ក្នុងពេលនេះ។ ក្នុង១វត្តៗ ដែលត្រូវបានវេរប្រគេនចំពោះព្រះសង្ឃ រួមមានទយ្យវត្ថុ និង គ្រឿងឧបភោគបរិភោគ សារុបចំនួន១១មុខ និង បច្ច័យ២លានរៀល។ សីលវ័ន្ត សីលវន្តី ចំនួន៥០នាក់ ម្នាក់ៗ ទទួលបានជាទាន នូវក្រណាត់ស ១ដុំ និងថវិកា១ម៉ឺនរៀលផងដែរ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
