នៅព្រឹកថ្ងៃទី០៩ ខែកញ្ញា ឆ្នាំ២០២០នេះ ឯកឧត្តម លីវ សុខុន ទីប្រឹក្សាក្រសួងព័ត៌មាន ជាប្រធានមន្ទីរព័ត៌មានខេត្តសៀមរាប និង ជាប្រធានក្រុមការងារថ្នាក់ខេត្តចុះឃុំស្លែងស្ពាន ប៉ែកខាងលិច បានដឹកនាំមន្ត្រីរាជការក្រោមឱវាទ នាំយកថវិការបស់ឯកឧត្តមផ្ទាល់ និងថវិការបស់អង្គភាព ប្រគេនដល់ព្រះសង្ឃគង់ប្រចាំនៅវត្តចំនួន២ ក្នុងឃុំស្លែងស្ពាន នៃស្រុកស្រីស្នំ គឺវត្តត្រោះ និង វត្តធ្លក ក្នុងឱកាសកាន់វេនបិណ្ឌទី៧ នៃពិធីបុណ្យភ្ជុំបិណ្ឌ ដើម្បីជួយសម្រួលដោះស្រាយការលំបាកប្រចាំថ្ងៃ ក្នុងអំឡុងពេលដែលជំងឺកូវីដ១៩ កំពុងរាតត្បាតជាសកលនៅឡើយ ព្រមទាំងបានជូនថវិកាដល់តាជីយាយជីចំណុះជើងវត្តទាំងពីរ និង កម្លាំងប្រជាការពារផងដែរ ។
មានមតិសំណេះសំណាលនាឱកាសនោះ ឯកឧត្តម លីវ សុខុន មានប្រសាសន៍ថា៖ ពិធីកាន់វេនបិណ្ឌនេះ ពុទ្ធសាសនិកជនខ្មែរ ត្រូវបានប្រារព្ធបដិបត្តិធ្វើឡើងចាប់ពីថ្ងៃ១រោច ដល់ថ្ងៃ១៤រោច ខែភទ្របទ និងត្រូវប្រារព្ធថ្ងៃបុណ្យភ្ជុំបិណ្ឌធំ ត្រូវថ្ងៃ១៥រោច ខែភទ្របទ ហើយការនាំយកបច្ច័យប្រគេនព្រះសង្ឃនាពេលនេះ គឺជាការចូលរួមជាមួយប្រជាពុទ្ធបរិស័ទតាមទីអារាម ដោយការជួបជុំគ្នា នាំយកនូវចង្ហាន់ ទ័យ្យវត្ថុ និងបច្ច័យផងដែរ ទៅវេរប្រគេនចំពោះព្រះសង្ឃតាមសទ្ធាជ្រះថ្លារៀងៗខ្លួន ដើម្បីធ្វើពិធីបង្សុកូល រាប់បាត្រព្រះសង្ឃ ឧទ្ទិសកុសលផលបុណ្យ ជូនដល់ដួងវិញ្ញាណក្ខ័ន្តអ្នកមានគុណ មានមាតាបិតា ជីដូនជីតា និងញាតិកាទាំង៧សណ្តាន ដែលបានចែកឋានទៅកាន់បរលោកខាងមុខនោះ ព្រមទាំងឧទ្ទិសដល់ដួងវិញ្ញាណក្ខ័ន្តដល់កម្មាភិបាល យុទ្ធជន ដែលបានពលីជីវិត ក្នុងបុព្វហេតុការពារកសាង អភិវឌ្ឍន៍ជាតិមាតុភូមិកម្ពុជា។
ឯកឧត្តម លីវ សុខុន បានបញ្ជាក់ទៀតថា៖ អ្វីៗទាំងអស់ដែលប្រទេសជាតិកំពុងទទួលបានពីការអភិវឌ្ឍន៍ ប្រជាពលរដ្ឋកំពុងទទួលបាននូវការរីកចម្រើន និងសេចក្តីសុខក្សេមក្សាន្តគ្រប់ប្រការនាពេលនេះ គឺកើតចេញពីកត្តាសន្តិភាព ដែលមានសម្តេចតេជោ ហ៊ុន សែន ជាស្ថាបនិក ដោយការដាក់អាយុជីវិតជាដើមទុន ក្នុងនោះដែរក៏បានធ្វើឲ្យវិស័យព្រះពុទ្ធចក្រមានការរីកចម្រើន ដើរទន្ទឹមគ្នាជាមួយវិស័យអាណាចក្រ ហើយកម្ពុជាពិតជាមានមោទនភាពខ្លាំងណាស់ ដែលមានប្រមុខដឹកនាំដ៏ឈ្លាសវៃក្នុងការដឹកនាំគ្រប់គ្រងប្រទេសជាតិ ឲ្យបានស្ថិតក្នុងស្ថានភាពមួយដែលអាចទប់ទល់បានជាមួយវិបត្តិកូវីដ១៩ ខណៈពេលដែលពិភពលោកកំពុងទទួលនូវការកៀបសង្កត់យ៉ាងធ្ងន់ធ្ងរដោយជំងឺកូវីត១៩ ដែលក្នុងកាលៈទេសៈនេះ រាជរដ្ឋាភិបាលបានអនុញ្ញាតឲ្យប្រជាពុទ្ធសបរិស័ទ ប្រើប្រាស់ឱកាសនេះបានប្រារព្ធបុណ្យភ្ជុំបិណ្ឌ ក៏ប៉ុន្តែជាស្មារតី និងការយល់ដឹងរបស់ប្រជាពលរដ្ឋ គឺមិនអាចឃ្លាតឆ្ងាយបាននោះទេ ពីការអនុវត្តក្រោមការណែនាំរបស់ក្រសួងសុខាភិបាល លាងដៃ ពាក់ម៉ាស និងរក្សាគម្លាតសុវត្ថិភាព ៕
អត្ថបទ ៖ លោក លីវ សាន្ត
