កាលពីល្ងាចថ្ងៃទី ០៥ ខែកញ្ញា ឆ្នាំ ២០២០ លោកជំទាវ ពេជ ចន្ទមុន្នី ហ៊ុន ម៉ាណែត អនុប្រធាន ក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ បាននាំយកអំណោយ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន រួមមានសម្ភារ:បរិក្ខារពេទ្យ និងគ្រឿងបរិភោគ ព្រមទាំងថវិកា របស់លោកជំទាវ ពេជ ចន្ទមុន្នី ហ៊ុន ម៉ាណែត និងសប្បុរសជន ចំនួន ១៥២,៩៥០ដុល្លារ និង៣៩លានរៀល ឧបត្ថម្ភជូនមន្ទីរពេទ្យកុមារអង្គរខេត្តសៀមរាប ក្នុងឱកាសដែល មន្ទីរពេទ្យនេះ ប្រារព្ធកម្មវិធី បុណ្យផ្កាប្រាក់មហាសាមគ្គី ឆ្នាំទី ៧ ដេីម្បីរកមូលនិធិសម្រាប់ការព្យាបាល និងថែទាំសុខភាពដោយឥតគិតថ្លៃ ដល់ កុមារ-ទារក ក្នុងប្រទេសកម្ពុជា។
ក្នុងឱកាសសំណេះសំណាលនោះ លោកជំទាវ ពេជ ចន្ទមុន្នី បានផ្តាំផ្ញេីសួរសុខទុក្ខ និង ថ្លែងអំណរគុណ ពីសំណាក់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតប៊ុន រ៉ានីហ៊ុន សែន ជូនចំពោះថ្នាក់ដឹកនាំ ក្រុមគ្រូពេទ្យ និងបុគ្គលិកទាំងអស់ នៃមន្ទីរពេទ្យកុមារអង្គរ ដែលបានខិតខំលះបង់កម្លាំងកាយ-ចិត្ត ជួយសង្រ្គោះព្យាបាល ដដោយក្តីអាណិតស្រឡាញ់ និងក្តីសង្ឃឹមដល់កុមារ ក៏ដូចជាក្រុមគ្រួសារអាណាព្យាបាលទាំងអស់ ជាមួយស្នាមញញឹមយ៉ាងកក់ក្ដៅ។
ក្នុងនាម ថ្នាក់ដឹកនាំ បុគ្គលិក និងក្រុមគ្រូពេទ្យ លោក ងួន ច័ន្ទភក្រ្តា នាយកមន្ទីរពេទ្យកុមារអង្គរខេត្តសៀមរាប បានថ្លែងអំណរគុណយ៉ាងជ្រាលជ្រៅ ចំពោះទឹកចិត្តសប្បុរសធម៌ដ៏ថ្លៃថ្លារបស់លោកជំទាវ ពេជ ចន្ទមុន្នី ហ៊ុន ម៉ាណែត និងសប្បុរសជនដទៃទៀត ដែលបានចូលរួមឧបត្ថម្ភគាំទ្រដល់សកម្មភាពមនុស្សធម៌របស់មន្ទីរពេទ្យមិនរកប្រាក់ចំណេញមួយនេះជាបន្តបន្ទាប់ ព្រមទាំងបានជំរុញទឹកចិត្ត ដល់ក្រុមគ្រូពេទ្យ ដើម្បីព្យាបាល និងថែទាំសុខភាពទារក និងកុមារកម្ពុជា ប្រកបដោយគុណភាព និងភាពកក់ក្ដៅ។
បើតាមការបញ្ជាក់ របស់ប្រធានមន្ទីរពេទ្យកុមារអង្គរ គិតត្រឹមខែកញ្ញា នៅឆ្នាំ២០២០ នេះមន្ទីរពេទ្យបានទទួលថវិកាជាង ៤០ម៉ឺនដុល្លារ ពីសប្បុរសជននៅក្នុងស្រុក សម្រាប់គាំទ្រដល់សកម្មភាពមនុស្សធម៌នៅក្នុងមន្ទីរពេទ្យមួយនេះ៕
អត្ថបទ និងរូបភាព: លោកបូ សាវី
កែសម្រួលដោយ: សេង ផល្លី
