លោកបណ្ឌិត គង់ គា ប្រធាននាយកដ្ឋានដំណាំស្រូវ នៃអគ្គនាយកដ្ឋានកសិកម្ម នៃក្រសួងកសិកម្មរុក្ខាប្រមាញ់និងនេសាទ មានប្រសាសន៍ថា ពូជស្រូវសែនក្រអូប០១ ជាប្រភេទពូជស្រូវថ្មីដែលទើបតែបញ្ចេញដាក់ឱ្យប្រើប្រាស់នៅចុងឆ្នាំ២០១៩ដោយក្រសួងកសិកម្ម ក្រោយពីទទួលបានការបន្សុទ្ឋពីវិទ្យាស្ថានស្រាវជ្រាវអភិវឌ្ឍកសិកម្មកម្ពុជា ដែលប្រភេទពូជមិនប្រកាន់រដូវ មានទិន្នផលខ្ពស់មានលក្ខណៈស្តង់ដារទៅតាមតម្រូវការទីផ្សារ ទាំងក្នុងនិងក្រៅប្រទេស ដូច្នេះប្រជាកសិករ គួរតែងាកមកជ្រើសរើសយកពូជស្រូវសែនក្រអូប០១ នេះ ។
លោកបណ្ឌិត គង់ គា បានបញ្ជាក់ទៀតថា គោលបំណងសំខាន់របស់ក្រសួងកសិកម្ម គឺចង់ឃើញនិងចង់បានការងាកចេញពីទម្លាប់ចាស់របស់ប្រជាកសិករ ដែលប្រើប្រាស់ពូជមិនសុទ្ឋល្អ គ្មានប្រភព និង ដោយជឿតាមគ្នីគ្នាដែលពុំមានបទពិសោធន៍បច្ចេកទេសក្នុងការសម្រិតសម្រាំងពូជ ឱ្យងាកមករកពូជស្រូវសុទ្ឋល្អ ដូចជាប្រភេទពូជស្រូវសែនក្រអូប០១នេះជាដើម ខណៈដែលឆ្នាំមុនៗ យើងមានស្រូវផ្ការំដួលដែលជាពូជស្រូវប្រកាន់រដូវ យើងធ្វើបានតែម្តងក្នុងមួយឆ្នាំ ខុសពីពូជស្រូវសែនក្រអូប០១ ដែលយើងអាចដាំពេលណាក៏បាន ហើយរយៈពេលដាំដុះនិងទទួលផល ចំនួន១០៥ថ្ងៃ មិនប្រកាន់រដូវឡើយ ដែលវាមានរស់ជាតិឆ្ងាញ់ បាយទន់ក្លិនក្រអូប ពិសេសអង្គរប្រភេទពូជស្រូវនេះ កំពុងមានតម្រូវការខ្ពស់ចំពោះទីផ្សារនៅអឹរ៉ប និងនៅប្រទេសចិន ។
លោកបណ្ឌិត គង់ គា មានប្រសាសន៍យ៉ាងដូច្នេះ ក្នុងឱកាសចូលរួមក្នុងកម្មវិធីស្រែបង្ហាញ ជូនដល់ប្រជាសហគមន៍ និងប្រជាកសិករ នៅឃុំសំរោងយារ ស្រុកពួក ខេត្តសៀមរាប ដោយមានការគាំទ្រពីកម្មវិធីខ្សែសង្វាក់តម្លៃកសិកម្មកម្ពុជា អូស្ត្រាលី ហៅកាត់ថា CAVAK នាព្រឹកថ្ងៃទី០៤ ខែកញ្ញា ឆ្នាំ២០២០ ។
បើតាមប្រសាសន៍របស់លោក ទា គឹមសុទ្ឋប្រធានមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានឲ្យដឹងថា ការរៀបចំកម្មវិធីស្រែបង្ហាញនេះ ក្នុងគោលបំណងផ្សព្វផ្សាយ និងជំរុញការប្រើប្រាស់ប្រភេទពូជស្រូវសែនក្រអូប០១ឱ្យបានទូលំទូលាយដល់ប្រជាកសិករ ក្រុមផលិតគ្រាប់ពូជស្រូវ សហគមន៍កសិកម្ម អ្នកប្រមូលទិញស្រូវអង្ករ ម្ចាស់រោងម៉ាស៊ីនកីនស្រូវ និងភាគីពាក់ព័ន្ឋសំខាន់ៗដែលទាក់ទងទៅនឹងខ្សែសង្វាក់ផលិតកម្មស្រូវ អង្ករនៅកម្ពុជា ដូច្នេះតាមរយៈនេះ សូមឲ្យប្រជាកសិករនៅខេត្តសៀមរាប កែទម្លាប់ក្នុងការប្រើប្រាស់ពូជដែលមានប្រភពមិនច្បាស់លាស់ និងពូជមិនសុទ្ឋល្អ ងាកមកជ្រើសរើសពូជស្រូវដែលមានប្រភពច្បាស់លាស់និង ពូជសុទ្ឋល្អ ដើម្បីឱ្យការបង្កបង្កើនផលរបស់បងប្អូនទទួលបានទិន្នផលខ្ពស់ និងមានតម្លៃល្អនៅលើទីផ្សារ ។
លោក កង ប៊ុនធឿន ជាម្ចាស់ស្រែបង្ហាញនៅភូមិរកាយារ ឃុំសំរោងយារ បានឲ្យដឹងថា ពូជស្រូវសែនក្រអូប០១នេះ ពិតជាល្អពិតប្រាកដមែន ហើយវាខុសប្លែកពីពូជដែលលោកធ្លាប់ប្រើមុនៗ ព្រោះពូជសែនក្រអូបនេះ មានទិន្នផលខ្ពស់ខុសពីមុន ទោះជាមិនទាន់ច្រូតកាត់អស់មែន តែយើងអាចប៉ាន់ប្រមាណស្រូវនៅក្នុងស្រែបាន ដូច្នេះបងប្អូនប្រជាកសិករគួរតែជ្រើសរើសយកពូជស្រូវសែនក្រអូប០១នេះ ប៉ុន្តែសំខាន់ គឺត្រូវព្យាយាម ពិនិត្យមើលទឹក ដាក់ជី ដកស្មៅ មើលសត្វល្អិត ត្រួតពិនិត្យនិងដកចេញដើមស្រូវចំឡែកៗចេញ ដើម្បីការពារកំលាយពូជស្រូវ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
