ទោះបីជំងឺកូវីដ១៩ បានបង្កបញ្ហាប្រឈមដល់សេដ្ឋកិច្ចជាតិ ក៏ការអភិវឌ្ឍនៅតែបន្តទៅមុខដោយខានមិនបាន ជាក់ស្ដែង នៅព្រឹកថ្ងៃទី០៤ ខែកញ្ញា ឆ្នាំ២០២០នេះ តាមរយៈហ្វេសប៊ុកផ្លូវការរបស់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចផ្ដល់ថវិកា ១៥០លានដុល្លារ សម្រាប់អភិវឌ្ឍន៍ហេដ្ឋារចនាសម្ព័ន្ធផ្លូវតូចធំ ដែលមានចំនួន ៣៨ ខ្សែ នៅក្នុងទីរួមខេត្តសៀមរាប។
តាមរយៈហ្វេសប៊ុកដដែល សម្ដេចតេជោ នឹងអញ្ជើញបើកការដ្ឋាសាងសង់នេះ ដោយសង្ឃឹមថានៅចុងឆ្នាំ ២០២១ ទឹកដីអង្គរអច្ឆរិយនេះ នឹងមានផ្លូវស្អាត និងជួយលើកស្ទួយដល់ជីវភាពរស់នៅរបស់ប្រជាពលរដ្ឋ។ជាមួយនោះ សម្ដេច ក៏បានថ្លែងអំណរគុណ ចំពោះការរួមចំណែកពីគ្រប់ក្រសួងស្ថាប័នទាំងអស់ ដែលមិនខ្ជះខ្ជាយថវិកាជាតិ និងសន្សំបានថវិកាប្រមាណជាង ៦០០ លានដុល្លារ សម្រាប់យកមកអភិវឌ្ឍន៍ប្រទេស។
គួរជម្រាបដែរថា ក្រៅពីគម្រោងផ្លូវ៣៨ខ្សែ ផ្ដល់ដោយសម្ដេចតេជោ នាយករដ្ឋមន្ត្រីនេះ នៅក្នុងឆ្នាំ២០២០នេះ រដ្ឋបាលខេត្តសៀមរាប ក៏បាននិងកំពុងដំណើរការ សាងសង់ផ្លូវតូចធំ នៅតាមបណ្ដាសង្កាត់ ក្នុងក្រុងសៀមរាប សរុប២៨គម្រោងផងដែរ ដោយគម្រោងទាំងនោះ មួយចំនួនបានសាងសង់សម្រេច១០០ភាគរយ និងដាក់ឲ្យប្រជាពលរដ្ឋប្រើប្រាស់ផងដែរ។
ព័ត៌មានជាតិ ថ្មីៗ
អត្ថបទ ៖ មន្ទីរព័ត៌មានខេត្តសៀមរាប
