ព្រះគ្រូវិមលសំវរ នឿម វុទ្ធី ព្រះគ្រូចៅអធិការវត្តស្វាយរមៀត ស្ថិតនៅក្នុងសង្កាត់ទឹកវិល ក្រុងសៀមរាប ខេត្តសៀមរាប បានមានសង្ឃដីការថា ដោយអនុវត្តតាមការណែនាំរបស់រាជរដ្ឋាភិបាល ក្រសួងសុខាភិបាល គណៈសង្ឃខេត្ត និង មន្ទីរធម្មការ និង សាសនាខេត្តសៀមរាប លើវិធានការការពារ និងទប់ស្កាត់ការឆ្លងរាលដាលជំងឺកូវីដ១៩ នៅក្នុងអំឡុងពេលបុណ្យកាន់បិណ្ឌ និងភ្ជុំបិណ្ឌនេះ ចាប់ពីថ្ងៃទី០៣ ដល់ថ្ងៃទី១៧ ខែកញ្ញា ឆ្នាំ២០២០នេះ ក្នុងខណៈពេលបច្ចុប្បន្នកំពុងមានការរាតត្បាតជាសកលនោះ សម្រាប់វត្តស្វាយរមៀតនេះ ទាំងនៅកន្លែងរៀបចំកម្មវិធីពូនភ្នំខ្សាច់ , កន្លែងបោះបាយបិណ្ឌ និងកន្លែងប្រគេនចង្ហាន់សុទ្ធតែដាក់ទឹកអាល់កុលទុកឱ្យពុទ្ធបរិស័ទលាងដៃ និងបានរៀបចំកន្លែងលាងសម្អាតដៃជាមួយសាប៊ូ និងដាក់ទឹកអាកុលសម្រាប់ពុទ្ធបរិស័ទ បានលាងដៃសម្អាតមេរោគជាច្រើនកន្លែង រួមជាមួយការចាក់សារអប់រំ ស្ដីអំពីវិធានការការពារជំងឺកូវីដ១៩ តាមរយៈមីក្រូរបស់វត្តផងដែរ។
ព្រះតេជគុណមានសង្ឃដីកាបន្តថា ព្រះអង្គបានបង្រៀនដល់កូននេនតូចៗ ឱ្យចេះលាងដៃឱ្យបានស្អាត និងត្រឹមត្រូវតាមការណែនាំរបស់ក្រសួងសុខាភិបាល ព្រោះការធ្វើអនាម័យឱ្យបានស្អាតជាប្រចាំនេះ គឺជាកត្តាមួយដ៍សំខាន់ក្នុងការការពារឆ្លងមេរោគកូវីដ១៩នេះ ហើយសម្រាប់ព្រះសង្ឃគ្រប់អង្គដែលគង់នៅក្នុងវត្តស្វាយរមៀតនេះ គឺព្រះអង្គតែងតែណែនាំជាប្រចាំដើម្បីឱ្យអនុវត្តជានិច្ច ក្នុងការសាងសម្អាតដៃឱ្យបានស្អាត ជាពិសេសយាយជីតាជីរួមជាមួយពុទ្ធបរិស័ទ ដែលមកកាន់បិណ្ឌ គឺត្រូវបានឱ្យលាងសម្អាតដៃជាមួយ អាកុលឬសាប៊ូ មុនពេលឡើងទៅស្តាប់លោកសូត្រមន្ត ឬទៅប្រគេនចង្ហាន់ដល់ព្រះសង្ឃ ដោយមានគម្លាតសុវត្ថិភាពផងដែរ។
សូមបញ្ជាក់ថា ពិធីបុណ្យកាន់បិណ្ឌ ឬដាក់បិណ្ឌ ឬអ្នកស្រុកខ្លះហៅថាបុណ្យកាន់វេន ជាបុណ្យតាមកាល និងតាមគន្លងប្រពៃណីព្រះពុទ្ឋសាសនា ដែលកើតមានឡើងតាំងពីសម័យពុទ្ឋកាលមកម្ល៉េះ ដែលកាលនោះមានរយៈពេល៣ខែគិតចាប់ពីថ្ងៃចូលព្រះវស្សារហូតដល់ថ្ងៃចេញព្រះវស្សា គេហៅថាបុណ្យបវរណាបច្ច័យបួន ដើម្បីផ្គត់ផ្គង់ភត្តាហារប្រចាំថ្ងៃដល់ព្រះសង្ឃដោយសារភ្លៀងជោគជាំ លំបាកក្នុងការត្រាចរបិណ្ឌបាត្រ ប៉ុន្តែចាប់ពីក្នុងរជ្ជកាលព្រះបាទអង្គដួងមកដល់បច្ចុប្បន្ន ពិធីនេះត្រូវបានប្រារព្ឋឡើងចាប់ពីថ្ងៃ១រោចដល់ថ្ងៃ១៤រោចខែភទ្របទ ដោយព្រះអង្គឈ្វេងយល់ថា ពិធីនេះមិនអាចធ្វើរយៈពេល៣ខែបានឡើយ ដោយសារប្រជានុរាស្ត្រជាប់រវល់ក្នុងការងារបង្កបង្កើនផល ទើបព្រះអង្គកំណត់ឱ្យធ្វើតែរយៈពេល១៥ថ្ងៃប៉ុណ្ណោះ ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
