ឯកឧត្ដមឧត្តមសេនីយ៍ឯក ថោង សុគន្ធា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា ប្រទេសកម្ពុជាមិនមែនជាប្រទេសផលិតគ្រឿងញៀននោះទេ ប៉ុន្តែជាប្រទេសដែលឧក្រិដ្ឋជនគ្រឿងញៀន បាននាំចូលគ្រឿងញៀនមកធ្វើការចែកចាយបន្ត និង មានអ្នកប្រើប្រាស់បន្ត បើទោះជាមានការបិទទ្វារព្រំដែននៃប្រទេសនិមួយៗលើពិភពលោក បិទជើងហោះហើរជាអន្តរជាតិក្នុងដំណាក់កាលនៃការគម្រាមកំហែងធ្ងន់ធ្ងរដោយវិបត្តិកូវីដ១៩យ៉ាងណាក៏ដោយ ហើយបើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បានបង្ហាញថា ក្នុងឆមាសទី១ ឆ្នាំ២០២០នេះ ការបង្ក្រាបបទល្មើសគ្រឿងញៀនកើនជាង២២ភាគរយ បើធៀបនឹងឆមាសទី១ ឆ្នាំ២០១៩ ប៉ុន្តែចំពោះគ្រឿងញៀនដែលចាប់បាន គឺថយចុះជាង២៣ភាគរយ បើធៀបទៅនឹងឆមាសទី១ ឆ្នាំ២០១៩ ដូច្នេះតាមរយៈនៃលទ្ធផលខាងលើ បានឆ្លុះបញ្ចាំងអំពីចំណុចខ្លាំងរបស់កម្លាំងសមត្ថកិច្ច ក្នុងការពង្រឹងប្រសិទ្ធភាពនៃការអនុវត្តច្បាប់ ដើម្បីបំផ្លាញអង្គការចាត់តាំងឧក្រិដ្ឋជនគ្រឿងញៀន ទប់ស្កាត់ការហូរចូល និងឆ្លងកាត់គ្រឿងញៀន តាមតំបន់ព្រំដែន ។
ឯកឧត្ដមឧត្តមសេនីយ៍ឯក ថោង សុគន្ធា មានប្រសាសន៍យ៉ាងដូច្នេះ នៅក្នុងអញ្ជើញជាអធិបតីនៃកិច្ចប្រជុំផ្សព្វផ្សាយរបាយការណ៍ស្ដីពីលទ្ធផលការងារត្រួតពិនិត្យគ្រឿងញៀនឆមាសទី១ និង លើកទិសដៅការងារឆមាសទី២ឆ្នាំ២០២០ នៅសាលប្រជុំសាលាខេត្តសៀមរាប កាលពីព្រឹកថ្ងៃទី០៣ ខែកញ្ញា ឆ្នាំ២០២០ រួមជាមួយនឹងលោក ពិន ប្រាកដ អភិបាលរងខេត្ត និង ជាប្រធានលេខាធិការដ្ឋាននៃគណៈកម្មាធិការត្រួតពិនិត្យគ្រឿងញៀនខេត្តសៀមរាប ដោយមានការចូលរួមពីសំណាក់លោក លោកស្រី ជាសមាជិក សមាជិកានៃគណៈកម្មាធិការត្រួតពិនិត្យគ្រឿងញៀនខេត្តសៀមរាប ។
ឯកឧត្ដមឧត្តមសេនីយ៍ឯក ថោង សុគន្ធា មានប្រសាសន៍បន្ថែមថា ក្នុងឱកាសនេះសូមអាជ្ញាធរខេត្ត ជាពិសេសលេខាធិការដ្ឋាន នៃគណៈកម្មាធិការត្រួតពិនិត្យគ្រឿងញៀនខេត្តសៀមរាប សូមទុកបញ្ហាគ្រឿងញៀននេះ ជាបញ្ហាអាទិភាពមួយក្នុងចំណោមបញ្ហាអាទិភាពផ្សេងៗទៀត ដែលត្រូវធ្វើការដោះស្រាយជាបន្ទាន់ និង មានប្រសិទ្ធភាព ព្រោះថា រឿងគ្រឿងញៀននេះវាបានធ្វើឲ្យប៉ះពាល់ដល់គ្រប់ផ្នែកទាំងអស់នៃសង្គមជាតិយើង ក្នុងនោះប៉ះពាល់ដល់ការកាត់បន្ថយភាពក្រីក្ររបស់ប្រជាពលរដ្ឋ និង ប៉ះពាល់ដល់សុខុមាលភាពសង្គម ជាពិសេសប៉ះពាល់ដល់សន្តិសុខ សណ្ដាប់ធ្នាប់សាធារណៈ ព្រោះសន្តិសុខ សណ្ដាប់ធ្នាប់សាធារណៈនេះ វាជាមូលដ្ឋានគ្រឹះនៃការអភិវឌ្ឍន៍សង្គមជាតិទាំងមូលរបស់យើង ។
ព័ត៌មានជាតិ ថ្មីៗ
ឯកឧត្ដមឧត្តមសេនីយ៍ឯកអគ្គលេខាធិការរង បានមានប្រសាសន៍បន្ថែមទៀតថា ការប្រយុទ្ធប្រឆាំងគ្រឿងញៀននៅតែជាអទិភាពក្នុងការស្រាវជ្រាវបន្ត និងបង្ក្រាបករណីផលិតកែច្នៃ បន្តពង្រឹងសមត្ថភាព ឆន្ទៈ គុណធម៌ស្មោះត្រង់ចំពោះវិជ្ជាជីវៈរបស់មន្រ្តីអនុវត្តច្បាប់តាមទិសស្លោករបស់សម្តេចក្រឡាហោម ស ខេង ( ៣កុំ ១រាយការណ៍ ) គឺ កុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍គ្រប់ករណីបទល្មើសគ្រឿងញៀន ហើយរឿងសំខាន់នៃការឆ្លើយតប គឺជាយន្តការ ដូច្នេះផ្អែកតាមសមាភាពនៃគណៈកម្មាធិការត្រួតពិនិត្យគ្រឿងញៀនខេត្តសៀមរាប ដែលមានតាំងពីថ្នាក់ខេត្តដល់មូលដ្ឋាននោះ សូមសហការឲ្យបានជិតស្និទ្ធជាមួយនឹងសមត្ថកិច្ចគ្រប់ផ្នែកគ្រប់ថ្នាក់ បន្តធ្វើការស្រាវជ្រាវ បង្ការ បង្ក្រាប និង ទប់ស្កាត់ឲ្យបានទាន់ពេលវេលា ចំពោះសកម្មភាពជួញដូរ ចែកចាយ និង ប្រើប្រាស់គ្រឿងញៀន ។
នៅក្នុងឱកាសនោះដែរ លោក ពិន ប្រាកដ អភិបាលរងខេត្ត និងជាអនុប្រធានគណៈកម្មាធិការត្រួតពិនិត្យគ្រឿងញៀនខេត្តសៀមរាប បញ្ជាក់ថា គ្រឿងញៀនវាជាឧបករណ៍រារាំងដល់ការអភិវឌ្ឍជាតិ រួមទាំងសន្តិសុខ សណ្តាប់ធ្នាប់សង្គមផងដែរ ហើយរយៈកាលកន្លងមករដ្ឋបាលខេត្ត ជាពិសេសគណៈកម្មាធិការត្រួតពិនិត្យគ្រឿងញៀនខេត្តសៀមរាប បាន យកចិត្តទុកដាក់ខ្ពស់បំផុត ក្នុងការចុះអប់រំ ផ្សព្វផ្សាយ បង្ការ និង ទប់ស្កាត់ ដោយមានការចូលរួមបណ្តាមន្ទីរ អង្គភាព ស្ថាប័នពាក់ព័ន្ធ និងកម្លាំងមានសមត្ថកិច្ច ដោយសហការជាមួយអាជ្ញាធរមូលដ្ឋានគ្រប់លំដាប់ថ្នាក់ ដែលជាលទ្ធផលក្នុងឆមាសទី១ ឆ្នាំ២០២០នេះ យើងបង្ក្រាបបទល្មើសគ្រឿងញៀនបាន ២.៣៥ករណី , ឃាត់ខ្លួនជនសង្ស័យបានជាង៨០០នាក់ និងដកហូតវត្ថុតាងគ្រឿងញៀនបានជិត ៩.០០០ក្រាម ។
លោក ពិន ប្រាកដ បញ្ជាក់បន្ថែមថា រដ្ឋបាលខេត្ត នឹងមិនបន្ធូរដៃឡើយចំពោះការស្រាវជ្រាវ ការបង្ការ ការបង្ក្រាប និង ការទប់ស្កាត់នូវរាល់សកម្មភាពនៃការជួញដូរ ការចែកចាយ និង ការប្រើប្រាស់គ្រឿងញៀន ជាពិសេសបង្កើនការផ្សព្វផ្សាយតាមគ្រប់រូបភាព ឲ្យបានដល់ប្រជាពលរដ្ឋគ្រប់ៗរូបនៅមូលដ្ឋាន អំពីផលវិបាក និង ផលប៉ះពាល់នៃការប្រើប្រាស់គ្រឿងញៀន ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
