រាជរដ្ឋាភិបាលបានអនុញ្ញាតអោយគ្រិះស្ថានឯកជនបើកដំណើរឡើងវិញនៅដំណាក់កាលទី២ នៅក្នុងខែតុលា ឆ្នាំ២០២០នេះ ខណៈដែលជំងឺកូវីដ១៩មានស្ថានភាពធូរស្រាល។ ប៉ុន្ដែការអោយដំណើរការបើកសាលារៀនឡើងវិញនេះ ត្រូវធ្វើឡើងទៅតាមការណែនាំរបស់ក្រសួងសុខាភិបាល និងក្រសួងអប់រំយុវជនិងកីឡា ដើម្បីទប់ស្កាត់ការឆ្លងជំងឺដល់សិស្សានុសសិស្ស។
លោក លាវ ឱរ៉ា នាយកវិទ្យាស្ថានអប់រំសាំងហ្គាពួរ ខេត្តសៀមរាប បានអោយដឹងនៅព្រឹកថ្ងៃចន្ទនេះថា វិទ្យាស្ថានអប់រំសាំងហ្គាពួរនេះ ត្រូវបានក្រសួងអប់រំយុវជននិងកីឡា អនុញ្ញាអោយបើកដំណើរឡើងវិញកាលពីថ្ងៃទី២៨ ខែកញ្ញា ប៉ុន្ដែអ្នកគ្រប់គ្រងសាលានឹងឲ្យសិស្សចូលបវេសនាកាលថ្មីនៅថ្ងៃទី១៩ ខែតុលា ឆ្នាំ២០២០ខាងមុខ ដោយត្រូវអនុវត្ដតាមការណែនាំរបស់ក្រសួងសុខាភិបាល ដោយរៀបចំបរិស្ថានសិក្សាប្រកបដោយសុវត្ថិភាព រួមមានវាស់កំដៅពេលបំពេញការងារ ត្រូវអនុវត្តវិធានរម្លាប់មេរោគ-ធ្វើអនាម័យបោសសម្អាតបន្ទប់រៀន អាគារ និងបរិវេណគ្រឹះស្ថានសិក្សា និងត្រូវគ្រប់គ្រង ការទុកដាក់សំរាមឱ្យបានត្រឹមត្រូវប្រចាំថ្ងៃ -ត្រូវបើកទ្វា បង្អួច ឬវាំងននឱ្យបានធំទូលាយ ដើម្បីឱ្យពន្លឺថ្ងៃ និងខ្យល់អាកាសចេញចូលរគ្រប់គ្រាន់។ ក្នុងនោះសម្រាប់សិស្សានុសិស្សត្រូវពាក់ម៉ាស់ មានធានាសុវត្ថិភាពពេលម៉ោងធ្វើការ និងមានត្រូវគូសសញ្ញាសម្គាល់ ដើម្បីធានាគម្លាតសុវត្ថិភាព-ផ្អាកដំណើរការបណ្ណាល័យ-បិទទ្វាររបងគ្រឹះស្ថានសិក្សា ព្រមទាំងបាត់តាំងការយាមកាមឱ្យ ដោយមិនអនុញ្ញាតឱ្យអ្នកគ្មានការកិច្ចចេញចូលឡើយ។
លោកបានបន្ដថា ជាមួយគ្នានោះដែរមិនមានការប្រមូលផ្ដុំគ្រប់រូបភាព ត្រូវរក្សាគម្លាតសុវត្ថិភាពយ៉ាងហោច១,៥ ម៉ែត្រឡើងទៅ ហើយមានគ្រូពេទ្យប្រចាំផងដែរ។ ក្នុងបរិវេណគ្រឹះស្ថានសិក្សាបានត្រូវផ្អាកកន្លែងកំសាន្ត ឬទីលានកីឡា ដែលមានលក្ខណៈប្រមូលផ្តុំក្នុងបរិវេណគ្រឹះស្ថានសិក្សាផងដែរ ដើម្បីចៀសវាងហានិភ័យនៃការឆ្លងជំងឺកូវីដ១៩។
បើតាមលោក លី ប៊ុនណា ប្រធានមន្ទីរអប់រំយុវជន និងកីឡាខេត្ដសៀមរាប បានអោយដឹងថា សាលារៀនឯកជននៅក្នុងខេត្ដសៀមរាប នឹងបើកអោយដំណើរការឡើងវិញមានប្រមាណ ១០សាលា ប៉ុន្ដែមានអ្នកដាក់ពាក្យស្នើរសុំបើកសាលាជិត៤០សាលារៀន។ ជាមួយគ្នានោះ អ្នកគ្រប់គ្រងសាលាត្រូវរៀបចំ និងពង្រឹងការអប់រំផ្សព្វផ្សាយខ្លឹមសារសុខភាពសំខាន់ៗពាក់ព័ន្ធនឹងការបង្ការទប់ស្កាត់ជំងឺកូវីដ ១៩ឬជំងឺឆ្លងស្រួចស្រាល់នានាដល់អ្នកសិក្សា បុគ្គលិកអប់រំ និងបុគ្គលិកផ្សេងទៀតក្នុងគ្រឹះស្ថានសិក្សា ។ ណែនាំពីសារៈសំខាន់នៃ ការរក្សាគម្លាតសុវត្ថិភាព ការបង្ការជំងឺកូដ១៩ និងការសម្លាប់មេរោគនៅតាមគ្រឹះស្ថានសិក្សា។ ឱ្យអ្នកសិក្សា បុគ្គលិកអប់រំ និងបុគ្គលិកផ្សេងទៀតក្នុងគ្រឹះស្ថានសិក្សា អនុវត្តវិធានការអនាម័យជាប់ជា តាមខ្លួនជានិច្ចនូវទឹកអាល់កុល ឬទឹកដែលលាងដៃ សម្រាប់ប្រើប្រាស់ផ្ទាល់ខ្លួន ព្រមទាំងពាក់ម៉ាសការពារ នៅគ្រប់ពេលចេញពីផ្ទះ ពេលបំពេញការងារ ពេលធ្វើដំណើរ និងនៅក្នុងបរិវេណគ្រឹះស្ថានសិក្សាផងដែរ ៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
