ក្នុងរយៈពេល៩ខែ ក្នុងឆ្នាំ២០២០នេះ ក្រុមការងារអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានធ្វើការត្រួតពិនិត្យរថយន្តខុសលក្ខណៈបច្ចេកទេសចំនួន ២៧៩គ្រឿង , រថយន្តខ្វះឯកសារចំនួន ៨១គ្រឿង ,អ្នកបើកបរគ្មានបណ្ណបើកបរចំនួន ០៣គ្រឿង ,បណ្ណបើកបរខុសប្រភេទយានចំនួន ០៣គ្រឿង ,បើកបរមិនពាក់ខ្សែក្រវ៉ាត់សុវត្ថិភាព ចំនួន១២នាក់ ,បកស្កុតខ្មៅរថយន្តចំនួន ២៧គ្រឿង ,រថយន្តដឹកសំពីងសំពោងចំនួន ១១គ្រឿង រើទំនិញ និងដោះរានតក្រោយរថយន្តចំនួន០៦គ្រឿង ។ នេះបើតាមលោក ពិន ប្រាកដ អភិបាលរងខេត្ត និងជាអនុប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត ក្នុងឱកាសលោកដឹកនាំក្រុមការងារអនុគណៈកម្មការ សុវត្ថិភាពចរាចរណ៍ផ្លូវគោកខេត្ត ចុះធ្វើការត្រួតពិនិត្យលក្ខណៈបច្ចេកទេសយានយន្ត ការរឹតបណ្តឹងការអនុវត្តច្បាប់ចរាចរណ៍ និងពិនិត្យរកសាធាតុញៀនក្នុងខ្លួនអ្នកបើកបរ នៅតាមបណ្តោយផ្លូវជាតិលេខ៦ ត្រង់ចំណុចជញ្ជីងថ្លឹងរថយន្ត ក្នុងភូមិសាស្ត្រស្រុកពួក ខេត្តសៀមរាប នៅព្រឹកថ្ងៃទី០៦ ខែតុលា ឆ្នាំ២០២០នេះ។
លោក ពិន ប្រាកដ មានប្រសាសន៍ថា គោលបំណងសំខាន់នៃការត្រួតពិនិត្យលក្ខណបច្ចេកទេសយានយន្ត និងការរឹតបណ្តឹងការអនុវត្តច្បាប់ស្តីពីចរាចរណ៍ផ្លូវគោករបស់អាជ្ញាធរខេត្តសៀមរាបនៅពេលនេះ គឺផ្តោតសំខាន់ទៅលើកត្តា៣ រួមមាន ៖ ទី១. ទប់ស្កាត់ការកាត់បន្ថយគ្រោះថ្នាក់ចរាចរណ៍ឱ្យបានជាអតិបរិមា , ទី២. រក្សាសណ្តាប់ធ្នាក់ចរាចរណ៍ឱ្យបានល្អប្រសើរឱ្យមានកិត្យានុភាពជាតិ និងមានសេចក្តីថ្លៃថ្នូលរបស់សង្គមជាតិយើង និងទី៣. ទប់ស្កាត់នូវបទល្មើសចរាចរណ៍លើដងផ្លូវសាធារណៈឱ្យបានដាច់ខាត ដូច្នេះក្នុងឱកាសនេះ សូមអំពាវនាវដល់បងប្អូនអ្នកបើកបរទាំងអស់មេត្តាចូលរួមគោរពច្បាប់ចរាចរណ៍ផ្លូវគោកទាំងអស់គ្នា ជាពិសេសនៅក្នុងឱកាសបុណ្យភ្ជុំបិណ្ឌនេះ ដើម្បីខ្លួនយើងផ្ទាល់ ដើម្បីគ្រួសារយើង និងសង្គមជាតិរបស់យើង ។
សូមបញ្ជាក់ថា គិតចាប់ពីថ្ងៃទី២៦ ខែធ្នូ ឆ្នាំ២០១៩ រហូតដល់ថ្ងៃទី២៥ ខែកញ្ញា ឆ្នាំ២០២០ ក្រុមការងារអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានធ្វើការត្រួតពិនិត្យយានយន្ត សរុបបានចំនួន ៣៥៧៦គ្រឿង រថយន្តត្រឹមត្រូវចំនួន ៣២៩៧គ្រឿង ដោយក្នុងនោះក្រុមការងារបានធ្វើការចុះត្រួតពិនិត្យជាប្រចាំ នៅក្នុងភូមិសាស្រ្ត ស្រុកប្រាសាទបាគង , ជីក្រែង , ពួក និងស្រុកសូទ្រនិគម នៃខេត្តសៀមរាបផងដែរ ៕
អត្ថបទ និង រូបភាព៖ ស៊ាន សុផាត
កែសម្រួល៖ អ៊ុន ណារាជ្យ
