តាមរបាយការណ៍របស់រដ្ឋបាលស្រុកស្វាយលើ បានឲ្យដឹងថា គិតត្រឹមរសៀលថ្ងៃទី១៨ ខែតុលា ឆ្នាំ២០២០នេះ ដោយមានស្ថានភាពភ្លៀងធ្លាក់នៅពេលយប់ បណ្តាលឲ្យមានប៉ះពាល់នៅឃុំចំនួន០៤ ក្នុងចំណោមឃុំទាំង០៥ ក្នុងទូទាំងស្រុក រួមមាន ៖ ១. ឃុំស្វាយលើ ៖ ទឹកហូរខ្លាំងបណ្តាលឲ្យបាក់ដាច់មុខទំនប់អូរដា ប្រមាណ៣០ភាគរយ ស្ថិតនៅភូមិបិតផ្កា និងទឹកហូររំលងផ្លូវចំនួន៣កន្លែង ប្រវែងប្រហែល៣០ម៉ែត្រ , ២. ឃុំខ្នងភ្នំ ៖ ទឹកភ្លៀងធ្លាក់ខ្លាំងធ្វើឲ្យទឹកស្ទឹងនៅចំណុចលឹងមួយពាន់ មានការហូរខ្លាំងតាមបណ្តាស្ទឹងផ្សេងៗក៏ដូចគ្នា , ៣. ឃុំតាសៀម ៖ ទឹកភ្លៀងបានហូរដាច់លូជ្រុងកាត់ផ្លូវប្រវែង១០ ម៉ែត្រ មិនអាចឆ្លងកាត់បាន ស្ថិតនៅភូមិត្រពាំងពេលឃុំតាសៀម តែបានធ្វើស្ពានឈើឆ្លងបណ្តោះអាសន្ន និងហូររំលងលើផ្លូវចំនួន ២កន្លែងប្រវែង១០០ម៉ែត្រ តែអាចធ្វើដំណើរឆ្លងបាន និង ៤. ឃុំកន្ទួត ៖ ស្ថានភាពទឹកហូរលើកផ្លូវចំនួន ២កន្លែង ស្ថិតនៅភូមិខ្នាក្រៅ , ទឹកហូរលើផ្លូវនៅក្បែរសាលាអនុវិទ្យាល័យប្រហែល៥០ម៉ែត្រ និងភូមិកន្ទួត ប្រវែង១៣០ម៉ែត្រ ព្រមទាំងបានជន់លិចទីស្នាក់សង្កាត់រដ្ឋបាលព្រៃឈើកន្ទួត ខ្នារក្រៅ ផងដែរ ។
មួយទៀតនោះ ទឹកបានជន់លិចហូរកាត់លើផ្លូវជាតិលេខ ៦៤ ចំនួន ២កន្លែង ដែលមួយកន្លែងៗ ប្រវែង ១៥០ម៉ែត្រ កម្ពស់ ១តឹក នៅចំណុចក្បាលប្រើស ភូមិអង្កាញ់ ឃុំស្វាយលើ ផ្លូវទៅព្រះវិហារ ។
នៅពេលនេះ គណៈកម្មាធិការស្រុក បានចុះពិនិត្យតាមបណ្ដាប្រឡាយសំខាន់ៗ ដើម្បីកាយសំរាមឱ្យទឹកហូរបានលឿន ស្រកលឿន និង បានកាយមុខបង្វែររំដោះទឹកចេញបណ្តោះអាសន្នកុំឲ្យបាក់ទំនប់ ព្រមទាំងបានណែនាំដល់ប្រជាពលរដ្ឋ ឱ្យមានការប្រុងប្រយ័ត្នខ្ពស់លើការការពារសុខភាព និងជាពិសេសគឺកូនៗតូចរបស់ពួកគាត់ ចៀសវាងមានហានីភ័យណាមួយកើតមានឡើង ៕
#មន្ទីរព័ត៌មានខេត្តសៀមរាប
