ក្នុងរយៈពេលពេញមួយថ្ងៃទី១៨ ខែតុលា ឆ្នាំ២០២០នេះ ឯកឧត្ដម ទៀ សីហា អភិបាលខេត្តសៀមរាប អមដំណើរដោយលោក លោកស្រី ជាអភិបាលរងខេត្ត ថ្នាក់ដឹកនាំមន្ទីរ អង្គភាពនានាក្នុង និង ក្រុមការងារនៃគណៈកម្មាធិការគ្រប់គ្រងគ្រោះមហន្តរាយខេត្ត បានអញ្ជើញចុះជួបសំណេះសំណាល និង សួរសុខទុក្ខដល់បងប្អូនប្រជាពលរដ្ឋដែលកំពុងរងផលប៉ះពាល់ដោយសារជំនន់ទឹកភ្លៀង ដែលបានធ្លាក់ក្នុងកម្រិតខ្លាំងប៉ុន្មានថ្ងៃៗជាប់គ្នា នៅក្នុងស្រុកចំនួន៣ រួមមាន ៖ ស្រុកបន្ទាយស្រី , ស្រុកវ៉ារិន និង ស្រុកអង្គរជុំ ដោយនាំទៅជាមួយនូវគ្រឿងឧបភោគ បរិភោគ និង ថវិកា ដែលជាអំណោយសង្គ្រោះបន្ទាន់ផងដែរ ។
ក្នុងឱកាសជួបសំណេះសំណាលផ្ទាល់ជាមួយប្រជាពលរដ្ឋ ឯកឧត្ដម ទៀ សីហា អភិបាលខេត្តសៀមរាប បានសម្ដែងនូវការអាណិតអាសូរ និងសូមចូលរួមការសោកស្តាយជាមួយប្រជាពលរដ្ឋ ដែលបានរងគ្រោះដោយសារទឹកជំនន់នេះ ហើយឯកឧត្ដមបញ្ជាក់ថា ប្រមុខរាជរដ្ឋាភិបាលកម្ពុជា ក៏ដូចជាអាជ្ញាធរខេត្ត និង អាជ្ញាធរគ្រប់លំដាប់ថ្នាក់ មិនបោះបង់ និង រត់ចោលបងប្អូន ក្នុងខណៈពេលដែលបងប្អូនប្រជាពលរដ្ឋយើងកំពុងជួបប្រទះនូវការលំបាកនោះទេ ពេលណាដែលបងប្អូនប្រជាពលរដ្ឋយើងកំពុងជួបប្រទះនូវការលំបាកកាន់តែខ្លាំង សម្ដេចតេជោ ហ៊ុន សែន ក៏ដូចជាអាជ្ញាធរខេត្ត និង អាជ្ញាធរគ្រប់លំដាប់ថ្នាក់ តែងតែចុះមកជួបផ្ទាល់ជាមួយបងប្អូន ដោយមិនធ្វើឲ្យបងប្អូនអស់សង្ឃឹម និង ខកបំណងឡើយ ។
ក្នុងឱកាសនោះដែរ ឯកឧត្ដម ទៀ សីហា បានអំពាវនាវដល់បងប្អូនប្រជាពលរដ្ឋទាំងអស់ សូមបង្កើនស្មារតីប្រុងប្រយ័ត្នបន្ថែមទៀត ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតឡើងជាយថាហេតុ ព្រមទាំងចូលរួមសហការ និងផ្តល់ព័ត៌មានជូនដល់អាជ្ញាធរមានសមត្ថកិច្ចដែលនៅជិតបំផុត ដើម្បីជួយអន្តរាគមន៍ឱ្យបានទាន់ពេលវេលា ជាពិសេសត្រូវបន្តរក្សាអនាម័យដោយពិសារទឹកស្អាតឬទឹកដាំពុះ ចម្អិនអាហារឱ្យបានឆ្អិនល្អ និងត្រូវលាងដៃនិងសាប៊ូឱ្យបានជាប់ជានិច្ច ហើយក៏ត្រូវប្រុងប្រយ័ត្នខ្ពស់ចំពោះសត្វអាសិរពិស និងសត្វផ្សេងៗទៀតដែលអាចធ្វើឱ្យមានគ្រោះថ្នាក់នៅក្នុងអំឡុងពេលទឹកឡើងនេះ។
ជាមួយគ្នានេះដែរ ឯកឧត្ដម ទៀ សីហា អភិបាលខេត្តសៀមរាប បានដឹកនាំប្រតិភូ បន្តចុះត្រួតពិនិត្យស្ថានភាពជំនន់ទឹកភ្លៀង ព្រមទាំងបានណែនាំដល់មន្ទីរធនធានទឹកនិងឧតុនិយមខេត្ត ត្រូវបន្តតាមដាន និងពិនិត្យកម្ពស់ទឹកឱ្យបានជាប់ប្រចាំ ប្រសិនបើទឹកឡើងដល់កម្រិតមួយត្រូវប្រកាសអាសន្ននោះ ត្រូវឆាប់ជូនដំណឹងដើម្បីធ្វើជម្លៀសប្រជាពលរដ្ឋរកកន្លែងសុវត្ថិភាព ហើយត្រូវសហការនិងត្រួតពិនិត្យនូវទ្វារទឹកដែលអាចបើកបញ្ជៀសទឹក និងជៀសវាងក្នុងការបាក់ទំនប់ឬទឹកឡើងដល់កម្រិត ជាពិសេសគណៈបញ្ជាការឯកភាពរដ្ឋបាល និងគណៈកម្មការគ្រប់គ្រងគ្រោះមហន្តរាយរដ្ឋបាលក្រុងស្រុកឃុំ សង្កាត់ ត្រូវអន្តរាគមន៍ប្រជាពលរដ្ឋរកទីទួលសុវត្ថិភាពឱ្យបានទាន់ពេលវេលា ជៀសវាងមានគ្រោះថ្នាក់ដល់អាយុជីវិតនិងគ្រោះថ្នាក់ផ្សេងៗទៀត ៕
អត្ថបទ និង រូបថត៖មន្ទីរព័ត៌មានខេត្តសៀមរាប
