ក្នុងឱកាសផ្ដល់អំណោយជូនគ្រួសាររងផលប៉ះពាលដោយជំនន់ទឹកភ្លៀង និងមានជីវភាពខ្វះខាត ៤៦គ្រួសារ ក្នុងសង្កាត់សៀមរាប ក្រុងសៀមរាប នៅថ្ងៃទី២៨ ខែកញ្ញា ឆ្នាំ២០២៥ លោក ម៉ៃ សាមេត ចៅសង្កាត់សៀមរាប បានអំពាវនាវឱ្យបងប្អូនប្រជាពលរដ្ឋ ត្រូវយកចិត្តទុកដាក់ថែទាំសុខភាពជាប្រចាំ ជាពិសេសក្នុងអំឡុងពេលកើតមានជំនន់ទឹកភ្លៀងនេះ នឹងត្រូវប្រុងប្រយ័ត្នខ្ពស់ចំពោះមនុស្សចាស់ ពិសេសកុមារតូចៗ កុំឱ្យចុះលេងទឹកដោយមិនមានមនុស្សធំនៅមើល។
លោកចៅសង្កាត់ ក៏បានថ្លែងអំណរព្រះគុណដល់ ព្រះចៅអធិការអារញ្ញសាគរ និងអាចារ្យគណៈកម្មការវត្ត ដែលជារឿយៗតែងតែយកព្រះទ័យទុកដាក់ចំពោះទុរគតជន ជនមានពិការភាព ចាស់ជរា ដែលមានលំនៅឋានក្បែរៗវត្ត។ ជាក់ស្ដែងនាពេលនេះ ព្រះអង្គបានផ្តល់នូវទេយ្យទាន ថវិកា គ្រឿងឧបភោគបរិភោគ តាមលទ្ធភាពដែលព្រះអង្គមាន ដែលនេះជាវប្បធម៌ចែករំលែក និងជាការស្គាល់ទុកធុរៈគ្នាទៅវិញទៅមកតាមលំអានដូនតាខ្មែរយើងធ្លាប់ធ្វើពីមុនមក។
ព្រះវិភត្តិមុនីញាណ ហ៊ាក់ គឹមហ៊ត់ វិសារទោ ព្រះចៅអធិការវត្តអារញ្ញសាគរ មានសង្ឃដីកាថា ដោយមើលឃើញពីផលប៉ះពាល់ និងភាពលំបាកជាក់ស្ដែងរបស់បងប្អូនប្រជាពលរដ្ឋទាំង៤៦គ្រួសារ ដែលពួកគាត់រស់នៅ និងអាស្រ័យផលលើទឹកក្នុងភូមិសាស្ត្រក្បែរបឹងទន្លេសាប និងគ្រួសារខ្លះជួបផលប៉ះពាល់ដោយសារជំនន់ទឹកភ្លៀងបណ្ដាលឱ្យជួបការលំបាកលើជីវភាពប្រចាំថ្ងៃ ទើបព្រះសង្ឃ និងគណៈកម្មការវត្តធ្វើការបែងចែកទេយ្យទានដែលទទួលបានពីការប្រគេនរបស់ប្រជាពុទ្ធបរិស័ទជិតឆ្ងាយក្នុងអំឡុងពេលបុណ្យភ្ជុំបិណ្ឌយកមកចែកជូន ដើម្បីជួយសម្រាល និងដោះស្រាយជីវភាពប្រចាំថ្ងៃដល់ពួកគាត់បានមួយគ្រា។
សូមបញ្ជាក់ថា បងប្អូនប្រជាពលរដ្ឋទាង ៤៦គ្រួសារ ក្នុងមួយគ្រួសារទទួលបាន៖ អង្ករ១០គីឡូក្រាម មី ទឹកត្រី ទឹកស៊ីអ៊ីវ ត្រីខ ស្ករស ទឹកដោះគោ សាប៊ូ ថ្នាំសង្កូវ និងថវិកា២ម៉ឺនរៀល៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
