នៅថ្ងៃទី២៩ ខែកញ្ញា ឆ្នាំ២០២៥ ក្រុមការងារចុះមូលដ្ឋានរបស់ក្រុមប្រឹក្សាខេត្តសៀមរាប អាណត្តិទី៤ បានចុះជួបសំណេះសំណាល ស្ដាប់សំណូមពរ និងដោះស្រាយបញ្ហានានារបស់ប្រជាពលរដ្ឋក្នុងស្រុកពួក ដែលនេះគឺជាកិច្ចការដ៏សំខាន់មួយ ដើម្បីធានាថាតម្រូវការ និងបញ្ហាប្រឈមរបស់ប្រជាពលរដ្ឋត្រូវបានទទួលស្គាល់ និងដោះស្រាយដោយអាជ្ញាធរមូលដ្ឋាន។
ឯកឧត្តម តោ គឹមស៊ាន ប្រធានក្រុមការងារ មានប្រសាសន៍ថា ការជួបគ្នារវាងអាជ្ញាធរ និងប្រជាពលរដ្ឋនាពេលនេះ គឺដើម្បីស្វែងយល់ពីជីវភាពរស់នៅ ប្រមូលព័ត៌មានផ្ទាល់មាត់ពីប្រជាពលរដ្ឋ អំពីបញ្ហាប្រឈមជាក់ស្ដែង និងតម្រូវការចាំបាច់ ដើម្បីចាត់វិធានការដោះស្រាយឱ្យបានទាន់ពេលវេលា ប្រកបដោយតម្លាភាព និងគណនេយ្យភាព ធានាថាការសម្រេចចិត្តនានាឆ្លើយតបនឹងផលប្រយោជន៍សាធារណៈ។
សូមជម្រាបថា វេទិកានាពេលនេះ បងប្អូនប្រជាពលរដ្ឋ និងអាជ្ញាធរមូលដ្ឋានដែលតំណាងឱ្យប្រជាពលរដ្ឋ បានលើកឡើងនូវបញ្ហា និងសំណូមពរមួយចំនួនដែលទាក់ទងនឹងវិស័យជាច្រើន រួមមាន វិស័យអប់រំ វិជ្ជាជីវៈ សុខាភិបាល រដ្ឋាករទឹក វប្បធម៌ ធម្មការ សាសនា ព័ត៌មាន កិច្ចការនារី និងសង្គមកិច្ច។ បញ្ហាទាំងនោះត្រូវបានលោក លោកស្រី ប្រធាន អនុប្រធាន ឬតំណាងមន្ទីរពាក់ព័ន្ធធ្វើការបកស្រាយ និងពន្យល់ណែនាំភ្លាមៗ។
ឯកឧត្តម តោ គឹមស៊ាន បានបញ្ជាក់ថា ក្រុមការងារចុះមូលដ្ឋាននាពេលនេះ បានទទួលទិន្នន័យជាក់ស្តែងពីមូលដ្ឋានសម្រាប់ការធ្វើផែនការអភិវឌ្ឍខេត្ត ដោះស្រាយបញ្ហាដែលកើតឡើងជាបន្ទាន់ និងពង្រឹងជំនឿទុកចិត្តរបស់ប្រជាពលរដ្ឋទៅលើក្រុមប្រឹក្សាខេត្ត និងរដ្ឋបាលសាធារណៈ។ ឯកឧត្តមបានគូសបញ្ជាក់ថា ក្រុមការងារនេះដើរតួជាស្ពានតភ្ជាប់ដ៏សំខាន់ រវាងអាជ្ញាធរខេត្ត និងប្រជាពលរដ្ឋ ក្នុងការជំរុញឲ្យមានការអភិវឌ្ឍន៍មូលដ្ឋានប្រកបដោយបរិយាប័ន្ន និងសមធម៌។
ក្នុងឱកាសនោះដែរ លោក យឿន ចាន់ អនុប្រធានមន្ទីរព័ត៌មានខេត្តសៀមរាប បានណែនាំដល់ប្រជាពលរដ្ឋ ត្រូវចេះពិចារណា និងចៀសវាងការជឿលើព័ត៌មានក្លែងក្លាយ (Fake News) ព្រោះព័ត៌មានក្លែងក្លាយ គឺជាការផ្សព្វផ្សាយនូវទិន្នន័យ រូបភាព វីដេអូ ឬសម្លេង ដែលត្រូវបានបង្កើតឡើងដោយចេតនាដើម្បីបោកប្រាស់ ឬបំភាន់សាធារណជន។ ក្នុងនាមជាពលរដ្ឋល្អម្នាក់ ការមិនជឿ និងមិនចែករំលែកព័ត៌មានក្លែងក្លាយ គឺជាការចូលរួមចំណែកដ៏ធំធេងក្នុងការរក្សាសណ្ដាប់ធ្នាប់ និងការអភិវឌ្ឍប្រទេសជាតិ។ បងប្អូនត្រូវប្រាកដថា ព័ត៌មាននោះផ្សាយលើគេហទំព័រ ឬហ្វេសប៊ុករបស់ស្ថាប័នរដ្ឋ ឬថ្នាក់ដឹកនាំរបស់យើង។ កុំចុច Like ឬ Share បើមិនប្រាកដថាជាព័ត៌មានពិតទេ ព្រោះការចែករំលែកនឹងជួយឱ្យព័ត៌មានក្លែងក្លាយរីករាលដាលកាន់តែលឿន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
