នៅថ្ងៃទី៣០ ខែកញ្ញា ឆ្នាំ២០២៥ លោក ចឹក គឹមជុន នាយករង រដ្ឋបាលសាលាខេត្តសៀមរាប បានដឹកនាំបើកកិច្ចប្រជុំក្រុមការងារកសាងផែនការយុទ្ធសាស្ត្រ ដើម្បីរំលឹកឡើងវិញពីគម្រោងផែនការអភិវឌ្ឍន៍ដោយនិរន្តរភាព និងសុវត្ថិភាពប្រព័ន្ធស្បៀងរបស់គម្រោងប្រព័ន្ធស្បៀង និងអាហាររូបត្ថម្ភប្រចាំខេត្តសៀមរាប ដើម្បីពង្រឹងលើតួនាទី និងការទទួលខុសត្រូវរបស់អ្នកពាក់ព័ន្ធជុំវិញខេត្ត។
កញ្ញា សន ស្រីលក្ខណ៍ មន្ត្រីអភិវឌ្ឍន៍ប្រព័ន្ធស្បៀងថ្នាក់ខេត្ត នៃអង្គការហ្រ្គេត បានបង្ហាញថា ការអនុវត្តគម្រោងផែនការអភិវឌ្ឍន៍ដោយនិរន្តរភាព និងសុវត្ថិភាពប្រព័ន្ធស្បៀង គឺដើម្បីធានាដល់ភាពយូរអង្វែង ចំពោះប្រជាពលរដ្ឋដែលស្ថិតក្នុងតំបន់រងផលប៉ះពាល់ដោយកង្វះស្បៀងអាហារ, បង្កើនការយល់ដឹងទៅដល់អ្នកប្រើប្រាស់ទៅលើនិរន្តរភាព និងផលជះទៅដល់បរិស្ថាន, កាត់បន្ថយភាពក្រីក្រ និងបង្កើនឱកាសការងារក្នុងវិស័យកសិកម្ម, បង្កើនផលិតផលកសិកម្មក្នុងខេត្ត ជាតម្រូវការចាំបាច់ក្នុងការឆ្លើយតបនឹងតម្រូវការប្រជាជនក្នុងខេត្ត និងភ្ញៀវទេសចរ និងសារៈសំខាន់នៃការអនុវត្តសកម្មភាពផ្សេងៗ ដែលមិនប៉ះពាល់ដល់បរិស្ថាន និងធ្វើឱ្យមានការបន្សាំទៅនឹងការប្រែប្រួលអាកាសធាតុ។
លោក ចឹក គឹមជុន នាយករងរដ្ឋបាលសាលាខេត្តសៀមរាប មានប្រសាសន៍ថា កិច្ចប្រជុំនាពេលនេះ ធ្វើឡើងដើម្បីរំលឹកអំពីតួនាទីភារកិច្ច របស់ក្រុមការងារតាមវិស័យទាំងអស់ និងផ្នែកពាក់ព័ន្ធ ក្នុងការរៀបចំសម្របសម្រួលធ្វើផែនការសន្ដិសុខស្បៀងនៅក្នុងខេត្ត ដែលនឹងធានានិរន្តរភាព និងសុវត្ថិភាពប្រព័ន្ធស្បៀង ក្នុងគោលដៅស្វែងរកធាតុចូលសំខាន់ៗ ពីគម្រោងផែនការនេះ។ លោកបន្តថា ដើម្បីធានាបាននូវស្បៀងអាហារ ប្រកបដោយគុណភាព និងសុវត្ថិភាព ទាមទារឱ្យក្រុមកាងារតាមវិស័យ ត្រូវយល់ដឹងឱ្យបានច្បាស់ពីតួនាទីភារកិច្ចរបស់ខ្លួន។
សូមបញ្ជាក់ថា បច្ចុប្បន្នគម្រោងប្រព័ន្ធស្បៀងកំពុងតែដឹកនាំ និងសម្របសម្រួលដោយរដ្ឋបាលខេត្តសៀមរាប ក្រោមការជួយគាំទ្របច្ចេកទេសពីអង្គការហ្គ្រេត និងអង្គការអាគ្រីស៊ុត ដែលមានក្រុមការងារតាមវិស័យចំនួន១០ រួមមាន៖ ១.ក្រុមពង្រឹងសមត្ថភាព វគ្គបណ្ដុះបណ្ដាល, ២.បរិយាបន្ន សង្គមសមធម៌ និងយេនឌ័រ, ៣.ក្រុមការងារកែច្នៃ និងសុវត្ថិភាពស្បៀងអាហារ, ៤.ក្រុមទីផ្សារ និងការផ្សព្វផ្សាយ, ៥.ក្រុមគ្រប់គ្រងទឹក ធនធាន និងការអភិរក្ស, ៦.ក្រុមសុខភាព និង អាហារូបត្ថម្ភ, ៧.ក្រុមអេកូទេសចរណ៍ កសិទេសចរណ៍, ៨.ក្រុមឥណទាន មីក្រូហិរញ្ញវត្ថុ, ៩.ក្រុមគ្រប់គ្រងសំណល់រឹងទីប្រជុំជន និងទី១០.ក្រុមប្រែប្រួលអាកាសធាតុ៕
អត្ថបទ៖ លោកស្រី ហែម បូរ៉ាន្នី
រូបភាព៖ លោក អ៊ុន ណារាជ្យ
