ថ្លែងបើកវគ្គសិក្ខាសាលាថ្នាក់តំបន់ ស្ដីពីការពង្រឹងភាពជាដៃគូការងារយុវជន និងសង្គមស៊ីវិល សម្រាប់ឆ្លើយតបទៅនឹងវិបត្តិអេកូឡូស៊ី អាកាសធាតុ និងយុត្តិធម៌បរិស្ថាន នៅថ្ងៃទី៣០ ខែកញ្ញា ឆ្នាំ២០២៥ លោក លី សារី អភិបាលរងខេត្តសៀមរាប បានបង្ហាញថា បញ្ហាអាកាសធាតុ គឺជាបញ្ហារួមដ៏ធំមួយ ហើយភាពជោគជ័យនៃការដោះស្រាយបញ្ហានេះ គឺត្រូវមានកត្ដាចូលរួមដែលមិនអាចខ្វះបានពីយើងទាំងអស់គ្នា ទាំងអង្គការដៃគូ និងអ្នកពាក់ព័ន្ធនានា។
លោក លី សារី បានជំរុញដល់ក្រុមការងារពាក់ព័ន្ធ អង្គការដៃគូ ត្រូវមានកិច្ចសហការរួម ជិតស្និទ្ធជាមួយថ្នាក់ជាតិ និងឆ្លងតំបន់ដើម្បីឆ្លើយតប និងកាត់បន្ថយការប្រែប្រួលអាកាសធាតុក្នុងតំបន់ ដែរការប្រែប្រួលអាកាសធាតុនេះ បណ្ដាលមកពីសកម្មភាពមនុស្ស ដូចជាការដុតប្រេងឥន្ធនៈហ្វូស៊ីល ការកាប់បំផ្លាញព្រៃឈើ កំណើនកំហាប់ឧស្ម័នផ្ទះកញ្ចក់នៅក្នុងបរិយាកាសជាដើម។
លោកអភិបាលរងខេត្ត មានប្រសាសន៍ថា តាមរយៈសិក្ខាសាលានាពេលនេះ ពិតជាមានសារសំខាន់ណាស់ពីព្រោះបានផ្ដល់នូវធាតុចូល ចំណេះដឹងពាក់ព័ន្ធទៅនឹងវិបត្តិអេកូឡូស៊ី ផលប៉ះពាល់នៃការប្រែប្រួលអាកាសធាតុ ព្រមទាំងបានបង្កើនចំណេះដឹងដល់យុវជនអំពីសិទ្ធសារធាតុសំខាន់ៗ ដូចជាសិទ្ធនីតិវិធីសម្រាប់សកម្មភាពតស៊ូមតិលើសកម្មភាពការងារបរិស្ថាន និងសកម្មភាពការងារប្រែប្រួលអាកាសធាតុ។ ជាមួយគ្នានេះ សិក្ខាកាមទាំងអស់ក៏អាចលើកឡើងពីបញ្ហាប្រែប្រួលអាកាសនៅក្នុងតំបន់របស់ខ្លួន ដើម្បីឱ្យវាគ្មិនជំនាញធ្វើការបកស្រាយ និងពន្យល់បានលម្អិតសម្រាប់យកទៅអនុវត្តបន្ថែមទៀត។
លោក គឹមសាន ច័ន្ទតារា នាយកប្រចាំប្រទេសស្ដីទី ActionAid Cambodia បានឱ្យដឹងថា វគ្គសិក្ខាសាលានេះធ្វើឡើងស្របពេលដែលផែនការជាតិ ឆ្លើយតបទៅនឹងការប្រែប្រួលអាកាសធាតុ(NDC 3.0) ដែលត្រូវបានបង្កើតឡើងថ្មីៗនេះ បង្ហាញលក្ខណគ្របដណ្ដប់ពហុវិស័យ និងប្រកបដោយមហិច្ឆតាខ្ពស់របស់រាជរដ្ឋាភិបាល ដើម្បីចូលរួមអភិវឌ្ឍ និងរួមចំណែកត្រួតពិនិត្យតាមដាន សម្រាប់សូចនាករដែលបានដាក់ចេញក្នុងសកម្មភាពក្នុងការកាត់បន្ថយភាពការប្រែប្រួលអាកាសធាតុ ការបន្សាំ និងការពង្រីកកត្ដាជុំវិញផ្សេងៗ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
