រយៈពេល៨ខែ ចាប់ពីខែមករា រហូតដល់ខែសីហា ឆ្នាំ២០២៥ ក្រុមការងារនៃមន្ទីរសុខាភិបាលខេត្តសៀមរាប រួមមានមន្ទីរពេទ្យបង្អែក មណ្ឌលសុខភាព ព្រមទាំងអ្នកស្ម័គ្រចិត្តភូមិ បានធ្វើការស្រាវជ្រាវ និងធ្វើតេស្ដរកជំងឺគ្រុនចាញ់សរុបបានចំនួន ៨២ ២៩៣ ករណី ហើយក្នុងនោះក្រុមការងារបានរកឃើញករណីវិជ្ជមានជំងឺគ្រុនចាញ់តែ ៣ករណីប៉ុណ្ណោះ ដែលសុទ្ធតែជាប្រភេទ វីវ៉ាក់ (Pv)។
ក្នុងកិច្ចប្រជុំប្រចាំត្រីមាសទី៣ ឆ្នាំ២០២៥ របស់ក្រុមការងារពិសេសលុបបំបាត់ជំងឺគ្រុនចាញ់ថ្នាក់ខេត្ត នៅថ្ងៃទី៣០ ខែកញ្ញា ឆ្នាំ២០២៥ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាល នៃរដ្ឋបាលខេត្តសៀមរាប បានឱ្យដឹងថា ករណីទាំង៣ខាងលើនេះដែរ ត្រូវបានកំណត់ថាជាករណីនាំចូល ដោយ ២ករណី នាំចូលមកពីប្រទេសថៃ និង ១ករណីទៀតនាំចូលមកពីខេត្តស្ទឹងត្រែង ដែលករណីនេះ បានបង្ហាញពីភាពជោគជ័យក្នុងការទប់ស្កាត់ការចម្លងក្នុងសហគមន៍។
លោកវេជ្ជបណ្ឌិត ក្រុស សារ៉ាត់ បញ្ជាក់ថា ទោះជាយ៉ាងនេះក្ដី ក្នុងត្រីមាសចុងក្រោយនៃឆ្នាំ២០២៥នេះ ក្រុមការងារខេត្តសៀមរាប នឹងអនុវត្តន៍យ៉ាងតឹងរ៉ឹងនូវចរាចរណ៍ណែនាំ ស្ដីពីការគ្រប់គ្រងករណីជំងឺគ្រុនចាញ់នាំចូល។ សកម្មភាពនេះរួមមាន ការធ្វើការពិនិត្យ ស្រាវជ្រាវ និងព្យាបាលជំងឺគ្រុនចាញ់រាល់អ្នកធ្វើដំណើរមកពីក្រៅប្រទេស ឬតំបន់ប្រឈម។ ជាមួយគ្នានេះ យើងត្រូវពង្រឹងសមត្ថភាពក្រុមការងារបន្ថែម ក្នុងការធ្វើបច្ចុប្បន្នភាពទិន្នន័យនៃជំងឺគ្រុនចាញ់ ស្វែងរកដំណោះស្រាយ និងបន្តសម្រេចឱ្យបាននូវគោលដៅលុបបំបាត់ជាស្ថាពរ។
លោកវេជ្ជបណ្ឌិត ក៏បានអំពាវនាវសុំកិច្ចសហការពីគ្រប់អ្នកពាក់ព័ន្ធ បន្តជួយផ្សព្វផ្សាយ អំពីវិធីបង្ការជំងឺដែលឆ្លងដោយសារសត្វមូស ដូចជា ការគេងក្នុងមុង ការសម្អាតបរិស្ថាន និងកម្ចាត់ជម្រកមូសជាដើម។ ជំរុញបញ្ហានេះបន្ថែមទៅតាមសាលារៀន, អប់រំផ្សព្វផ្សាយដល់ភ្ញៀវទេសចរដែលទៅតំបន់ប្រឈម, ផ្សព្វផ្សាយតាមមូលដ្ឋាន ជាពិសេសជំរុញជាសំខាន់តាមប្រព័ន្ធផ្សព្វផ្សាយ៕
អត្ថបទ និងរូបភាព៖ លោក ឡេង ពិសិដ្ឋ
កែសម្រួល៖ លោក អ៊ុន ណារាជ្យ
