តាមរបាយការណ៍បូកសរុបលទ្ធផលការងារឆ្នាំ២០២៥ កម្ពុជាបានសម្រេចសមិទ្ធផលយ៉ាងធំធេងក្នុងការបោសសម្អាតមីន និងសំណល់ជាតិផ្ទុះពីសង្គ្រាម ដោយបានរំដោះផ្ទៃដីមានសុវត្ថិភាពជូនប្រជាពលរដ្ឋបានរហូតដល់ ១៥ ៩០២ ២០៨ ម៉ែត្រការ៉េ រកឃើញមីនប្រឆាំងមនុស្ស ៣៥៤គ្រាប់ មីនប្រឆាំងរថក្រោះ ៤គ្រាប់ សំណល់ជាតិផ្ទុះពីសង្គ្រាម ៤០៤គ្រាប់ និងអំបែងគ្រាប់ចំនួន ៣២ ២៤៥គ្រាប់ ខណៈអត្រាជនរងគ្រោះថ្នាក់ដោយសារមីនទូទាំងប្រទេសក្នុងឆ្នាំ២០២៥ មានចំនួន ២០នាក់ ដែលចំនួននេះមានការថយចុះ ៣៣ភាគរយ បើធៀបនឹងឆ្នាំ២០២៤ ដែលមានជនរងគ្រោះចំនួន ៣០នាក់។
ក្នុងឱកាសដឹកនាំកិច្ចប្រជុំបូកសរុបលទ្ធផលបោសសម្អាតមីនឆ្នាំ២០២៥ និងដាក់ទិសដៅយុទ្ធសាស្ត្រ ឆ្នាំ២០២៦ របស់គណៈកម្មាធិការសកម្មភាពកម្ចាត់មីនខេត្តសៀមរាប នៅថ្ងៃទី១១ ខែកុម្ភៈ ឆ្នាំ២០២៦នេះ លោក សំកុល សុចិត្រា អភិបាលរងខេត្ត បានគូសបញ្ជាក់ថា ទោះបីជាកម្ពុជាសម្រេចបានលទ្ធផលល្អប្រសើរក្ដី តែការគំរាមកំហែងនៅតែមាន ដោយសារកំណើនប្រជាជន និងតម្រូវការផ្ទៃដីបង្កបង្កើនផល។ បន្ថែមលើនេះ សកម្មភាពវាយប្រហារពីភាគីយោធាថៃក្នុងឆ្នាំ២០២៥ បានបន្សល់ទុកនូវគ្រាប់បែកចង្កោម និងគ្រាប់យុទ្ធភណ្ឌមិនទាន់ផ្ទុះជាច្រើន ដែលបង្កគ្រោះថ្នាក់ដល់ជនស៊ីវិល និងប្រជាពលរដ្ឋភៀសសឹក។
លោក សំកុល សុចិត្រា បានសង្កត់ធ្ងន់ថា ដើម្បីធានាសុវត្ថិភាពជូនប្រជាពលរដ្ឋ អាជ្ញាធរត្រូវចុះអប់រំពីគ្រោះថ្នាក់យុទ្ធភណ្ឌគ្រឿងផ្ទុះដល់មណ្ឌលសុវត្ថិភាព និងតាមខ្នងផ្ទះឱ្យអស់លទ្ធភាព ហើយអភិបាលក្រុងស្រុក ត្រូវតាមដាន និងរាយការណ៍អំពីវឌ្ឍនភាពការងារអប់រំក្នុងមូលដ្ឋានឱ្យបានហ្មត់ចត់ ជាពិសេសត្រូវបន្តកៀងគរជំនួយបន្ថែមសម្រាប់សកម្មភាពកាត់បន្ថយគ្រោះថ្នាក់។
លោកអភិបាលរងខេត្ត ក៏បានបញ្ជាក់ថា កម្ពុជានៅតែរក្សាជំហររឹងមាំក្នុងការសម្រេចឱ្យបាននូវគោលដៅ “កម្ពុជាគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម” នៅត្រឹមឆ្នាំ២០៣៥ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
