គិតត្រឹមល្ងាចថ្ងៃទី២៨ ខែកញ្ញា ឆ្នាំ២០២៥ មានប្រជាជនភៀសសឹកចេញពីតំបន់សមរភូមិចំនួន៨៦គ្រួសារ ស្មើនឹង២០៨នាក់ បានចូលមកស្នាក់នៅក្នុងភូមិសាស្ត្រខេត្តសៀមរាប ដែលធ្វើឱ្យចំនួនជនភៀសសឹកកើនដល់ចំនួន ១ ១៥៤គ្រួសារ ស្មើនឹង ៣ ៧០១នាក់ នៅទូទាំងខេត្តសៀមរាប ក្រោមការយកចិត្តទុកដាក់ខ្ពស់ពីថ្នាក់ដឹកនាំខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ។
បើតាមរបាយការណ៍របស់រដ្ឋបាលខេត្តសៀមរាប ក្នុងចំណោម ១ ១៥៤គ្រួសារខាងលើ កំពុងស្នាក់នៅទីតាំងសុវត្ថិភាពចំនួន១៤១ទីតាំង ក្នុងនោះមាន ៦៥៦គ្រួសារ ស្មើនឹង ២ ១៥៤នាក់ កំពុងស្នាក់នៅតាមទីតាំងដែលរដ្ឋបាលក្រុងស្រុកបានរៀបចំ និងចំនួន ៤៩៨គ្រួសារ ស្មើនឹង ១ ៥៤៧នាក់ បានស្នាក់នៅតាមផ្ទះប្រជាពលរដ្ឋ។
ជាមួយនឹងការស្នាក់នៅនេះដែរ ដោយសារចំនួនកើនឡើងនៃអ្នកវិលត្រឡប់វិញ អាជ្ញាធរក៏បានជួបបញ្ហាមួយចំនួន ដូចជាពុំមានសម្ភារប្រើប្រាស់គ្រប់គ្រាន់ ដូចជាមុង ភួយ ថ្នាំមូស ធុងទឹក សម្ភារផ្ទះបាយ ខ្វះខាតបន្ទប់ទឹក បង្គន់អនាម័យ ទឹកស្អាត អគ្គិសនី និងការពារសត្វអាសិរពិសដើម។ ក្នុងន័យនេះ រដ្ឋបាលខេត្តសូមអំពាវនាវ ដល់សប្បុរសជន បន្ដជួយឧបត្ថម្ភ ជាសម្ភារ គ្រឿងឧបភោគ បរិភោគជាដើម ដើម្បីជួយសម្រាលការលំបាករបស់បងប្អូនជាជនភៀសសឹក៕
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
