មុងចំនួន ៦០ការ៉ុង ស្មើ ៣ ០០០មុង ទឹកស៊ីអ៊ីវ ៥០កេស និងទឹកត្រី ៧៥យូរ ដែលជាអំណោយដ៏ថ្លៃថ្លារបស់ លោកជំទាវ បណ្ឌិតពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឬទ្ធិនារីកម្ពុជាអម ត្រូវបានផ្តល់ជូនដល់រដ្ឋបាលខេត្តសៀមរាប នៅថ្ងៃទី២៩ ខែកញ្ញា ឆ្នាំ២០២៥នេះ ដើម្បីយកទៅធ្វើការចែកជូនបន្តដល់បងប្អូនប្រជាពលរដ្ឋ ភៀសសឹកនៅតាមទីតាំងសុវត្ថិភាពក្នុងភូមិសាស្ត្រខេត្តសៀមរាប។
លោក ស៊ុន ចំណាន នាយករងរដ្ឋបាលសាលាខេត្តសៀមរាប បានឱ្យដឹងថា ក្រោមការយកចិត្តទុកដាក់ខ្ពស់របស់ប្រមុខរាជរដ្ឋាភិបាល និងលោកជំទាវទី១ ពីទុក្ខលំបាករបស់ប្រជាពលរដ្ឋរងគ្រោះដោយសង្គ្រាម ហើយអំណោយទាំងនេះត្រូវបានអាជ្ញាធរខេត្ត ធ្វើការបែងចែកជូនដល់បងប្អូននៅតាមមណ្ឌលសុវត្ថិភាពតាមក្រុងស្រុក ដែលពួកគាត់កំពុងស្នាក់នៅ។
លោក ស៊ុន ចំណាន បានបញ្ជាក់ថា ដោយសភាពការណ៍នៅតាមព្រំដែនមិនធានាសុវត្ថិភាព ដោយមានការរំលោភបំពានរបស់ពួកទាហានថៃ ក្រោយការឈប់បាញ់ ធ្វើឱ្យបងប្អូនបន្តរស់នៅក្នុងមណ្ឌល ដែលធ្វើឱ្យខាតពេលវេលារបស់បងប្អូនក្នុងការប្រកបរបរចិញ្ចឹមក្រុមគ្រួសារ ចាកឆ្ងាយផ្ទះសម្បែង ស្រែចម្ការ និងមុខរបរផ្សេងៗ។ សម្រាប់ការផ្តល់អំណោយមនុស្សធម៌នាពេលនេះដែរ គឺកើតចេញពីទឹកចិត្តសប្បុរសរបស់ថ្នាក់ដឹកនាំ ដោយមិនប្រកាន់និន្នាការនយោបាយអ្វីទាំងអស់ ក្នុងស្មារតីមហាគ្រួសារខ្មែរតែមួយ។
លោកនាយករងរដ្ឋបាលសាលា បានបញ្ជាក់បន្ថែមថា រាល់អំណោយដែលរដ្ឋបាលខេត្តសៀមរាប ទទួលបានពីបងប្អូនសប្បុរសជនក្នុង និងក្រៅប្រទេស ត្រូវបានក្រុមការងារខេត្ត ធ្វើការបែងចែកផ្គត់ផ្គង់ជូនដល់បងប្អូនដែលកំពុងស្នាក់នៅតាមមណ្ឌលភៀសសឹកតាមក្រុងស្រុក ព្រមទាំងបានផ្គត់ផ្គង់ដល់សមរភូមិមុខផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
