នៅព្រឹកថ្ងៃទី២២ ខែតុលា ឆ្នាំ២០២០នេះ គណៈកម្មាធិការបច្ចេកទេសរបស់ក្រុមប្រឹក្សាខេត្តសៀមរាប អាណត្តិទី៣ បានរៀបចំកិច្ចប្រជុំរបស់ខ្លួន ដើម្បីត្រួតពិនិត្យ និង ស្វែងរកដំណោះស្រាយ ទៅលើសំណួរនិងសំណូមពររបស់ប្រជាពលរដ្ឋ ដែលបានលើកឡើងនៅក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តសៀមរាបអាណត្តិទី៣ លើសំណួរ-និងសំណូមពរ ក៍ដូចជាបញ្ហាប្រឈមនានាដែលបានកើតមានក្នុងពេលអនុវត្តការងារភារកិច្ចរបស់មន្ត្រី ជំនាញកាលពី ខែសីហា ឆ្នាំ២០២០កន្លងទៅ។ ពីធីនេះដែរប្រព្រឹត្តិទៅក្រោមការដឹកនាំរបស់លោក ង៉ាន់ ភិរុណ អភិបាលរងខេត្តសៀមរាប ដោយមានការចូលរួមពីសំណាក់ឯកឧត្ដម លោក លោកស្រី ជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត អាជ្ញាធរជាតិអប្សរា និងអាជ្ញាធរក្រុង-ស្រុកទាំងអស់ក្នុងខេត្ត សរុបចំនួនជាង៦០នាក់។
បន្ទាប់ពីស្ដាប់ការលើកឡើងពីបញ្ហា និងមតិយោបល់ផ្សេងៗពីសំណាក់លោកលោកស្រីដែលបានចូលរួមក្នុងឱកាសនោះ
លោក ង៉ាន់ ភិរុណ ក៏បានធ្វើការស្នើដល់តួអង្គមន្ទីរអង្គភាពស្ថាប័នពាក់ព័ន្ឋ សហការគ្នាក្នុងការបំពេញតួនាទីភារកិច្ច ប្រកបដោយតម្លាភាព គណនេយ្យភាព ច្បាស់លាស់ លឿន រហ័ស និងទាន់ពេលវេលា ព្រមទាំងត្រូវសហការគ្នា ទៅតាមជំនាញរៀងៗខ្លួន ពិនិត្យទៅលើសំណុំឯកសារ របស់អ្នកមកទទួលសេវា និងត្រូវពន្យល់ប្រាប់អ្នកមកទទួលសេវា ឱ្យបានដឹងអំពីតម្រូវចាំបាច់មួយចំនួនការលើពាក្យស្នើសុំនិងលិខិតពាក់ព័ន្ឋនានាក៍ដូចជាការបង់សេវាចូលថវិកាជាតិមុននឹងផ្តល់អាជ្ញាប័ណ្ណឱ្យជាដើម។
លោក ង៉ាន់ ភិរុណ បន្ថែមថា ចំពោះបញ្ហាប្រឈម មួយចំនួនមានលក្ខណៈជាអន្តរវិស័យ ដែលស្នងការរងនៃស្នងលការដ្ឋានខេត្ត ស្នើដោះស្រាយ ដូចជា ការងារសន្តិសុខ សណ្តាប់ធ្នាប់សាធារណៈ សុវត្ថិភាពសង្គម នៅក្នុងខេត្តសៀមរាប រដ្ឋបាលខេត្តស្នើឱ្យសរសេរលិខិតជាលាយលក្ខ័អក្សរ នូវបញ្ហាប្រឈមសំខាន់ៗ ដើម្បីដាក់ជូនទៅអភិបាលនៃគណៈអភិបាលខេត្ត ព្រោះមានចំណុចសំណូមពរជាច្រើនខុសពីតួនាទី និងដែនសមត្ថកិច្ចដែលលោកត្រូវទទួល។
សូមបញ្ចាក់ថា ក្នុងឱកាសនោះដែរ អង្គប្រជុំ ក៏បានធ្វើការពិភាក្សាពិនិត្យ និងអនុម័តលើសេចក្តីព្រាងរបៀបវារៈមួយចំនួនរួមមាន៖១.ពិនិត្យ ពិភាក្សា និងផ្តល់យោបល់កិច្ចសន្យាការពារបរិស្ថាន ដែលតម្រូវឱ្យម្ចាស់គម្រោង អនុវត្តសម្រាប់គម្រោងសិប្បកម្មអាជីវកម្មរ៉ែសំណង់ និងគម្រោងសាងសង់សំណង់អគារក្រឡាផ្ទៃតូចជាង៣០០០ ម៉ែត្រការ៉េ និងក្រឡាផ្ទៃតូចជាង៥០០ម៉ែត្រការ៉េ
,២. ពិនិត្យ ពិភាក្សា និងផ្តល់យោបល់សេវាកិច្ចសន្យាការពារបរិស្ថានសម្រាប់គម្រោងអាជីវកម្ម រ៉ែសំណង់គ្រប់ប្រភេទ និងរ៉ែផ្សេងទៀតដែលជាសិប្បកម្មក្រោម ១ហិកតា ,៣. ពិនិត្យ ពិភាក្សា និងផ្តល់យោបល់បញ្ហាការកាប់ រុករានទន្ទ្រានដីរដ្ឋក្នុងតំបន់មជ្ឈមណ្ឌល ស្រាវជ្រាវ និងអភិរក្សកេសរកូល សុខ អាន ភ្នំគូលែន និង ឧទ្យានជាតិព្រះជ័យវរ្ម័ននរោត្តម ភ្នំគូលែន ,៤.ពិនិត្យ ពិភាក្សា និងផ្តល់យោបល់បញ្ហាប្រឈមសន្តិសុខសណ្តាប់ធ្នាប់សាធារណៈ ,៥.ពិនិត្យ និងធ្វើបច្ចុប្បន្នភាព នៃការដោះស្រាយលើបញ្ជីសំណួរ -សំណូមពរ ដែលបានលើកឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ឆ្នាំ២០១៩ និង ៦.បញ្ហាផ្សេងៗ៕
អត្ថបទ និង រូបភាព៖យូ វង្ស
កែសម្រួល៖ អ៊ុន ណារាជ្យ
