នាព្រឹកថ្ងៃទី២២ ខែតុលា ឆ្នាំ២០២០នេះ អាជ្ញាធរខេត្តសៀមរាប រួមជាមួយ អគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការនិងដឹកជញ្ជូន អគ្គលេខាធិការដ្ឋាននៃគណៈស្ថាបត្យករកម្ពុជារបស់ក្រសួងរៀបចំដែនដី នគរូបនីយកម្មនិងសំណង់ រួមទាំងមន្រ្តីជំនាញរបស់អង្គភាព-ស្ថាប័នទាំង៣នេះ បានជួបពិភាក្សាការងារ ដើម្បីពិនិត្យ និងពិភាក្សាគ្នាលើការងាររៀបចំហេដ្ឋារចនាសម្ព័ន្ធបណ្តាញលូ នៅក្នុងក្រុងសៀមរាប ដែលជាវត្ថុបំណងដ៏សំខាន់ គឺការបែងចែកឲ្យបានដាច់ស្រឡះពីគ្នា រវាងប្រព័ន្ធលូបង្ហូរទឹកកខ្វក់ និងប្រព័ន្ធលូរំដោះទឹកភ្លៀង។
លោក ពិន ប្រាកដ មានប្រសាសន៍ថា កិច្ចប្រជុំនាឱកាសនេះ គឺដើម្បីឆ្ពោះទៅរកការរៀបចំកសាងក្រុងសៀមរាប-អង្គរ ក្នុងដំណើរអភិវឌ្ឍជាទីក្រុងគំរូ-ឆ្លាត នាពេលអនាគត។ បញ្ហាបែកធ្លាយទឹកកខ្វក់ បង្ហូរចូលស្ទឹងសៀមរាប វាជាបញ្ហាប្រឈមដ៏រាំរ៉ៃ ដែលសង្ឃឹមថា តាមរយៈនៃគម្រោងថ្មីនេះ វានឹងត្រូវបានបញ្ចប់បញ្ហាប្រឈមទាំងនោះ ដោយស្របជាមួយនឹងការអនុវត្តគម្រោងកសាងផ្លូវ៣៨ខ្សែ ដែលជាអំណោយអភិវឌ្ឍន៍របស់រាជរដ្ឋាភិបាលម្ពុជា ផ្តល់ជូនខេត្តសៀមរាប។ ជាមួយគ្នានោះ ការងារសាងសង់ប្រព័ន្ធបណ្តាញលូនៅក្រុងសៀមរាបនេះ រួមមានគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែរបស់រាជរដ្ឋាភិបាល និងមានគម្រោងមួយចំនួនផ្សេងទៀត ដែលគាំទ្រដោយដែគូអភិវឌ្ឍផងដែរ។
លោក ពិន ប្រាកដ បានឲ្យដឹងទៀតថា ការពិភាក្សាក៏បានបង្ហាញអំពីក្តីព្រួយបារម្ភផងដែរ អំពីបញ្ហាប្រឈមនានាដែលនឹងអាចកើតមាននៅពេលបំពេញប្រតិបត្តិការនោះ ក៏ប៉ុន្តែទោះជាយ៉ាងណាក៏ដោយ ស្មារតីនៃកិច្ចប្រជុំ បានបង្ហាញនូវការប្តេជ្ញាចិត្តខ្ពស់លើឆន្ទៈការងារ ដោយវាយតម្លៃថា ការងារកាន់តែធំ ការលំបាកកាន់តែមានទម្ងន់ ក៏ប៉ុន្តែពុំមានបញ្ហាប្រឈមណាមួយ ដែលពុំមានដំណោះស្រាយនោះឡើយ។ ក្នុងនោះដែរកិច្ចពិភាក្សា បានផ្តោតជាសំខាន់ទៅលើបញ្ហាធំៗចំនួន៣គឺ បញ្ហាបច្ចេកទេស បញ្ហាផលប៉ះពាល់នៅពេលអនុវត្តគម្រោង និងយន្តការជម្រុញប្រើប្រាស់សេវាប្រអប់លូបង្ហូរទឹកកខ្វក់ ចេញពីលំនៅដ្ឋានប្រជាពលរដ្ឋ។
សូមបញ្ជាក់ផងដែរថា កន្លងមកនេះ ក្រុងសៀមរាបមានបណ្តាញលូប្រមូលទឹកភ្លៀង និងទឹកកខ្វក់មួយចំនួនរួចហើយ ក៏ប៉ុន្តែនៅមិនទាន់គ្រប់គ្រាន់នោះទេ រួមទាំងស្ថានីយចម្រោះទឹកកខ្វក់ផងដែរ។ គម្រោងថ្មីនេះ រួមមានការកសាងបន្ថែមបណ្តាញប្រព័ន្ធលូមេ លូរងខ្វែងរំដោះទឹកភ្លៀង និងបណ្តាញប្រព័ន្ធលូមេ លូរងខ្វែងរំដោះទឹកកខ្វក់ ព្រមទាំងភ្ជាប់បណ្តាញលូទឹកកខ្វក់ចេញពីលំនៅដ្ឋានប្រជាពលរដ្ឋផងដែរ ហើយអ្វីដែលចាំបាច់នោះនោះគឺ ការរៀបចំបណ្តាញលូ ញែកចេញពីគ្នា រវាងទឹកភ្លៀងនិងទឹកកខ្វក់៕
អត្ថបទ និង រូបភាព៖ ងិន គីមឡេង
កែសម្រួល៖ អ៊ុន ណារាជ្យ
