កាលពីថ្ងៃទី២២ ខែតុលា ឆ្នាំ២០២០នេះ មន្ត្រីជំនាញអាជ្ញាធរជាតិអប្សរា បាននាំយកកុលាលភាជន៍បុរាណចំនួន១៩ ដែលបានប្រទះឃើញដោយចៃដន្យក្នុងបរិវេណប្រាសាទព្រះខ័ន ខេត្តសៀមរាប ទៅរក្សាទុក ដើម្បីជួសជុល ស្រាវជ្រាវ និងទុកជាសម្បត្តិជាតិ។
បើតាមមន្ត្រីជំនាញ នៃអាជ្ញាធរជាតិអប្សរា បង្ហាញថា៖ កុលាលភាជន៍បុរាណ ដែលបានប្រទះឃើញនេះ រួមមាន ថ្មដុសថ្នាំចំនួន២ អង្រែកិនថ្នាំ១ និងបំណែកុលាលភាជន៍ចំនួន៣០ និងមានសណ្ឋានខុសៗគ្នា ហើយគេសន្និដ្ឋានបឋមថា អាចស្ថិតក្នុងសម័យអង្គរ តែពុំច្បាស់ថាមានមនុស្សរស់នៅបរិវេណនេះ ឬអត់នោះទេ។
លោក ញ៉ែម រស្មី មន្ត្រីនាយកដ្ឋានគ្រប់គ្រងទឹក នៃអាជ្ញាធរជាតិអប្សរា បញ្ជាក់ថា កុលាលភាជន៍ទាំងនេះ ត្រូវបានក្រុមការងារស្តារប្រឡាយ នៅបរិវេណប្រាសាទព្រះខ័ន អំឡុងពេលស្ដារប្រឡាយប្រវែងេះ១៧០០ម៉ែត្រ កាលពីខែមីនា ឆ្នាំ២០២០។
លោក បញ្ជាក់បន្ថែមថា វត្ថុបុរាណទាំងអស់នេះ ត្រូវបានរកឃើញ ក្នុងជម្រៅជាង ១ម៉ែត្រ និងនៅរាយប៉ាយពីគ្នា។ ក្រោយប្រទះឃើញ ក្រុមការងារក៏បានរក្សាទុកវត្ថុបុរាណទាំងអស់ រហូតដល់បញ្ចប់ការស្តារប្រឡាយ ទើបប្រគល់ជូនមជ្ឈមណ្ឌលស្រាវជ្រាវនិងតម្កល់ឯកសារអង្គរយកទៅអភិរក្ស ដោយមានការចូលរួមពីនគរបាលបេតិកភណ្ឌខេត្ត។
អត្ថបទ និងរូបភាពដោយ៖ លោក បូ សាវី
កែសម្រួលដោយ៖ លោក សេង ផល្លី
