អង្គកឋិនសាមគ្គី ដែលមូលមតិផ្តួចផ្តើមដោយក្រុមប្រឹក្សាខេត្ត រដ្ឋបាលខេត្តសៀមរាប គណ:កម្មការវត្តប្រាសាទគោកចក និងពុទ្ធបរិស័ទ ដង្ហែរទៅវត្តប្រាសាទគោកចក ទទួលបានថវិកាចំនួនជាង១ម៉ឺនដុល្លារ
នៅថ្ងៃទី២៣ ខែតុលា ឆ្នាំ២០២០ ឯកឧត្តម អ៊ាន ឃុន សមាជិកក្រុមប្រឹក្សាខេត្ត តំណាងដ៍ខ្ពង់ខ្ពស់ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងតំណាងឯកឧត្តម ទៀ សីហា អភិបាលខេត្តសៀមរាប បានដឹកនាំ ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត នាយករដ្ឋបាលខេត្ត ព្រមទាំងមន្ត្រីរដ្ឋបាលសាលាខេត្តជាច្រើនរូបទៀត និងពុទ្ធបរិស័ទ ដោយប្រមូលបានថវិការបស់រដ្ឋបាលចំនួន១០.៤៨៥.០០០រៀល និងប្រាក់ដុល្លារ ចំនួន១៥០ ព្រមទាំងត្រៃចីវរចំនួន២៨ត្រៃផងដែរ និងបច្ច័យគណៈកម្មការអាចារ្យ និងប្រជាពុទ្ឋបរិស័ទជិតឆ្ងាយមមួយចំនួនទៀតផងដែរ សរុបថវិកាទទួលបានពីអង្គកឋិនទានទាំងអស់ចំនួនជាង៦០លានរៀលនិង១,៥៤០ដុល្លារ ផាត់ចំណាយសព្វសារពើ នៅសល់ចំនួន៤០,៩៦០,០០០រៀល និង១,៥៤០ដុល្លារ អាមេរិក បានវេរប្រគេនព្រះភិក្ខុសង្ឃក្នុងវត្តដែលគង់ចាំវស្សាអស់រយៈពេលបីខែនាពេលកន្លងមក។ អង្គកឋិនទាននេះ ដែលផ្តួចផ្តើមដោយ រដ្ឋបាលខេត្ត គណៈកម្មការអាចារ្យនិងប្រជាពុទ្ឋបរិស័ទជិតឆ្ងាយផដែរ។
បើតាមការប្រកាសឱ្យដឹងក្នុងពិធីវេរប្រគេនដល់ព្រះសង្ឃ របស់ គណៈកម្មការអាចារ្យវត្តថា៖ អង្គកឋិនទានសម្រាប់វត្តឆ្នាំនេះ កើតឡើងដោយហេតុ៤យ៉ាង: ហេតុទី១ ដោយសារដូនជីតាជីប្រជាពុទ្ឋបរិស័ទបានស្តាប់ព្រះធម៌ ព្រះវិន័យ ព្រះពុទ្ឋសាសនា បានដឹងថាកឋិនទាន ជាកាលទានមានផលវិសេសជាងទានទាំងពួង ព្រោះបានផលដល់ទាយកម្ចាស់ទានផង បានអានិសង្ឍដល់ភិក្ខុជាបដិគ្គាហកៈអ្នកទទួលក្រាលគ្រង និងអ្នកអនុមោទនាផង និងបានឃើញព្រះសង្ឃគង់ចាំវស្សាក្នុងវត្តនេះបានបដិបត្តិ រៀនសូត្រធម៌វិន័យ ត្រឹមត្រូវតាមគន្លងព្រះពុទ្ឋសាសនា។បានដឹងផងដែរថាវត្តនេះមានភាពខ្វះខាតសម្ភារៈប្រើប្រាស់ក្នុងវត្តមួយចំនួន និងបានគិតពិចារណាដឹងច្បាស់ថាអាយុសង្ខាររបស់ខ្លួនមិនទៀងមិនស្ថិតស្ថេរ ទើបរៀបចំផ្តួចផ្តើមមូលមតិគ្នាជាឯកច្ចឆ័ន្ទធ្វើបុណ្យកឋិននេះឡើង។
ព្រះគ្រូវិចិត្រវង្សាញាតិធម្មោ ហែមគឹមសាន ព្រះគ្រូចៅអធិការវត្ត មានថេរៈដិការថា៖ បច្ច័យអមត្រៃដែលទទួលបានពីអង្គកឋិនទានចំនួន១ម៉ឹនដុល្លារនៅឆ្នាំនេះ នឹងយកទៅសងថ្លៃដែក ដែលបានជំពាក់គេកាលពីឆ្នាំ២០១៩ នៅខ្វះ៥ពាន់ដុល្លារទៀត នឹងប្រឹងប្រែងសន្សំសងម្ចាស់បំណុកជាបន្តបន្ទាប់ទៀត។ ព្រះអង្គរំលឹកថា ជំពាក់ថ្លៃដែកនេះដោយសារយកមកសម្រាប់សាងសង់សាលាធម្មសភា តែជាអកុសលនៅពេលចាក់បេតុងប្លង់សេ កាលពីថ្ងៃទី២ ខែធ្នូ ឆ្នាំ២០១៩ សាលាធម្មសភានេះត្រូវបានរលំទាំងស្រុង។ឯកឧត្តម អ៊ាន ឃុន សមាជិកក្រុមប្រឹក្សាខេត្ត ក្នុងនាម ក្រុមប្រឹក្សា អាជ្ញាធរខេត្ត បានថ្លែងកោតសរសើរចំពោះព្រះចៅអធិការ ព្រះសង្ឃ គណៈកម្មការ អាចារ្យវត្ត បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមទាំងកម្លាំងកាយ កម្លាំងចិត្ត និងលះទ្រព្យធន នាំគ្នារៀបចំជាអង្គកឋិនទាននេះឡើង ដើម្បីរួមចំណែកយ៉ាងសំខាន់ក្នុងការជួយឱ្យវិស័យពុទ្ឋចក្រកាន់តែរីកចំរើនតទៅទៀត។
ឯកឧត្តម បន្តថា៖ នៅកម្ពុជា វិស័យពុទ្ឋចក្រ និងវិស័យអាណាចក្រគឺតែងតែដើរទន្ទឹមគ្នាមិនអាចខ្វះមួយណាបានឡើយ។អាស្រ័យដោយប្រទេសយើងទទួលបានសុខសន្តិភាពពេញលេញ សង្គមជាតិទាំងមូលមានការអភិវឌ្ឍរីកចម្រើនយ៉ាងឆាប់រហ័ស ក្រោមកិច្ចដឹកនាំដ៍ឈ្លាសវៃនិងប៉ិនប្រសព្វ និងក្រោមគោលនយោបាយឈ្នះ ឈ្នះ របស់សម្តេចតេជោ ហ៊ុន សែនជានាយករដ្ឋមន្ត្រីនៃព្រះរាជាណាចក្រកម្ពុជា កម្ពុជា ទទួលបានការអភិវឌ្ឍរីកចម្រើនលើគ្រប់វិស័យទាំងវិស័យហេដ្ឋារចនាសម្ព័ន្ឋ សេដ្ឋកិច្ច និងសង្គមកិច្ច។ល។ ជាមួយគ្នានេះវិស័យពុទ្ធចក្រ ត្រូវបានកំណត់ដោយរដ្ឋធម្មនុញ្ញនៃព្រះរាជាណាចក្រកម្ពុជាយើង ថាព្រះពុទ្ឋសាសនាជាសាសនារបស់រដ្ឋ៕