យោងតាមព្រះរាជតម្រិះដ៏ខ្ពង់ខ្ពស់របស់ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត និងទទួលបានការអនុញ្ញាតពីសម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង នៅព្រឹកថ្ងៃទី២៥ ខែតុលា ឆ្នាំ២០២០ ឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង ជាព្រះរាជតំណាងដ៏ខ្ពង់ខ្ពស់របស់ ព្រះករុណាព្រះមហាក្សត្រ និងសម្តេចព្រះមហាក្សត្រី បានអញ្ជើញជួបសំណេះសំណាលសាកសួរសុខទុក្ខ និងចែកជូន នូវព្រះរាជអំណោយ ដ៏ឧត្តុងឧត្តម ដែលជាព្រះរាជទានដ៏ថ្លៃថ្លារបស់ ព្រះករុណាជាអម្ចាស់ ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ជូនដល់ប្រជារាស្រ្ត រស់នៅឃុំចំនួន២ ស្ថិតក្នុងស្រុកពួក ខេត្តសៀមរាប សរុប ១,១៥៣គ្រួសារ ដែលទទួលរងគ្រោះធ្ងន់ធ្ងរដោយជំនន់ទឹកភ្លៀង បណ្តាលឲ្យលិចលំនៅដ្ឋាន និងផលដំណាំ។
សំណេះសំណាល ក្នុងឱកាសដ៏ប្រសើរនោះ ឯកឧត្តម គុយ សុផល បានជម្រាបជូនពីព្រះរាជបណ្តាំដ៏ខ្ពង់ខ្ពស់ ពីព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុតនៃយើង ដែលសព្វថ្ងៃព្រះអង្គ កំពុងគង់សម្រាកពិនិត្យព្យាបាល ព្រះរាជសុខភាពនៅរដ្ឋធានីប៉េកាំង នៃសាធារណរដ្ឋប្រជាមានិតចិន ព្រះអង្គមានព្រះរាជហឫទ័យ នឹករលឹកសាកសួរសុខទុក្ខ ដោយព្រះរាជហឫទ័យអាណិត ស្រឡាញ់ដ៏ជ្រាលជ្រៅចំពោះកូនចៅ ចៅទួត របស់ព្រះអង្គដែលទទួលរងគ្រោះ ដោយទឹកជំនន់នៅខេត្តសៀមរាប និងកំពុងជួបប្រទះនូវការលំបាក ខ្វះខាតក្នុងជីវភាពជាខ្លាំង។
ហេតុនេះហើយទើបព្រះអង្គទាំងទ្វេ បានប្រោសព្រះរាជទាន ឯកឧត្តម គុយ សុផល នាំមកនូវព្រះរាជអំណោយដ៏ថ្លៃថ្លាចែកជូនប្រជារាស្រ្តដល់មូលដ្ឋាន ក្នុងឃុំយាង សរុប៥៨៨គ្រួសារ និងឃុំសសរស្ដម្ភ សរុប៥៦៥គ្រួសារ ដើម្បីជួយសម្រាលការលំបាកក្នុងជីវភាពប្រចាំថ្ងៃ។
ព័ត៌មានជាតិ ថ្មីៗ
ព្រះរាជអំណោយដ៏ថ្លៃថ្លា ដែលបានចែកជូន នាពេលនេះក្នុងគ្រួសារនីមួយៗ ទទួលបាន៖ អង្ករ ចំនួន១បាវ ស្មើ៥០គីឡូក្រាម, មីចំនួន១កេស ស្មើ៣០កញ្ចប់, ត្រីខចំនួន ១០កំប៉ុង, កៅស៊ូតង់ទំហំ ៤ម៉ែត្រ គុណ ៦ម៉ែត្រ ចំនួន ១ផ្ទាំង, ឃីត ចំនួន១កញ្ចប់ ក្នុងនោះមាន មុង១, ភួយ១, ក្រមា១, សារុង១ និង អាវយឺតមានស្លាកព្រះរាជអំណោយ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ចំនួន១ ព្រមទាំងថវិកា ព្រះករុណាព្រះមហាក្សត្រ ចំនួន២០០ពាន់រៀល និងថវិកាសម្ដេចព្រះមហាក្សត្រី ចំនួន២០០ពាន់រៀល។
អត្ថបទ និងរូបភាព: មន្ទីរព័ត៌មានខេត្តសៀមរាប
