កាលពីព្រឹកថ្ងៃទី២៥ ខែតុលា ឆ្នាំ២០២០នេះ ប្រជាពលរដ្ឋក្រីក្រជាងជាង៣០០គ្រួសារ នៅសង្កាត់ចុងឃ្នៀស ក្រុងសៀមរាប ខេត្ដសៀមរាប បានទទួលអំណោយពីព្រះសង្ឃ និងសប្បុរសជនក្នុងអំឡុងជំងឺកូវីដ១៩។
អំណោយទាំងអស់នេះដែរ បានមកពីការកៀងគរចូលរួមពីព្រះចៅអធិការតាមបណ្តាវត្តជាច្រើនក្នុងខេត្តសៀមរាប រួមជាមួយការចូលរួមសប្បុរធម៌របស់សប្បុរសជនមួយចំនួនមកពីរាជធានីភ្នំពេញ និងក្រុងសៀមរាប ត្រូវបាននាំយកមកផ្តល់ជូនដល់គ្រួសារប្រជាពលរដ្ឋដែលងាយរងគ្រោះ និងជួបការលំបាកក្នុងជីវភាពនិងជួបផលលំបាកមិនអាចទៅរកការងារធ្វើបានដោយសារវិបត្តិមេរោគឆ្លងជំងឺកូវិដ១៩ផង និងដោយសារជួបនូវហានិភ័យដោយសារជំនន់ទឹកភ្លៀងនៅបណ្តាស្រុកមួយចំនួនក្នុងខេត្តនាពេលថ្មីនេះ ហើយអំណោយដែលផ្ដល់ពីសប្បុរសជននិងព្រះសង្ឃនេះ រួមមានអង្ករ មី ទឹកត្រី ទឹកស៊ីអ៊ីវ ស្កស អាវភ្លៀង ថវិកានិងសម្ភារជាច្រើនទៀត ។
ព្រះតេជគុណ ឡាច លាង ព្រះអនុគណក្រុងសៀមរាប និងជាព្រះចៅធិការវត្ដពោធិវង្ស មានសង្សដីកាថា ដើម្បីឆ្លើយតបនឹងតម្រូវការបញ្ហាជីវភាពប្រចាំថ្ងៃរបស់ពលរដ្ឋ ព្រះសង្ឃ និងសប្បុរសជន បានពាំនាំយកអំណោយនិងថវិកាមួយចំនួនចែកជូនប្រជាពលរដ្ឋទីទាល់ក្រចំនួន៣១២គ្រួសារ និងដល់ប្រជាការពារ ព្រមសមត្ថកិច្ចនៅសង្កាត់ចុងឃ្នៀស ក្រុងសៀមរាប ដើម្បីដោះស្រាយឱ្យទាន់ពេលវេលា ក្នុងអំឡុងពេលដែលពួកគាត់កំពុងជួបមានបញ្ហាជំងឺកូវីដ១៩នេះ។
ព្រះអង្គរ មានសង្សដីកាបន្ដថា អំណោយនេះមិនច្រើនណាស់ណានោះទេ ប៉ុន្ដែអាចដោះស្រាយបានមួយគ្រាៗដែរ ព្រោះនៅពេលនេះប្រទេសកម្ពុជាក៍ជួបគ្រោះទឹកជំនន់ និងមានវិបត្ដិសេដ្ឋកិច្ចដោយសារជំងឺកូវីដ១៩ផងដែរ។ អំណោយទាំងនេះ ជាទឹកចិត្ដជ្រះថ្លាពីព្រះសង្ឃ និងសប្បុរសជននៅក្នុងស្រុក ដែលជាវប្បធម៌ចែករំលែក ខ្មែរជួយខ្មែរ។ជាងនោះទៅទៀតការផ្ដល់អំណោយនេះ ក៍អាចជួយដោះបន្ទុកពីរាជរដ្ឋាភិបាលដែលកំពុងខ្វះខាតថវិកា យកទៅជួយឧបត្ថម្ភដល់ប្រជាពលរដ្ឋដែលកំពុងរងផលប៉ះពាល់ដោយសារទឹកជំនន់ផងដែរ។
ព្រះអង្គ បញ្ជាក់បន្ថែមថា ប្រជាពលរដ្ឋក្រីក្រនេះ មិនមែនមានតែក្នុងសង្កាត់ចុងឃ្នៀសនោះទេ គឺនៅតាមបណ្ដាស្រុកមួយចំនួនទៀតក្នុងខេត្តមួយចំនួនទៀត ហើយព្រះអង្គរក៍ត្រូវទៅចែកជូនពួកគាត់បន្ថែមទៀតដែរ។ ក្នុងនោះរាជរដ្ឋាភិបាលមិនទុកឲ្យប្រជាពលរដ្ឋណាម្នាក់ស្លាប់នោះឡើយ ព្រោះថា ទុក្ខលំបាករបស់ប្រជាពលរដ្ឋ គឺជាទុកលំបាករបស់ប្រមុខរាជរដ្ឋាភិបាល។ ជាមួយគ្នានោះ សំណូបពរដល់សប្បុរសជន ក្រុមហ៊ុននានា សូមបន្តនូវប្រពៃណីចែករំលែកនេះ ទៅដល់ប្រជាពលរដ្ឋដែលកំពុងខ្វះខាត នៅតំបន់ផ្សេងៗទៀត ក្នុងអំឡុងពេលនេះអំឡុងជំងឺកូវីដ១៩ និងប្រជាពលរដ្ឋដែល ដែលរងផលប៉ះពាល់ ក្នុងពេលមានជំនន់ទឹកភ្លៀងនេះ។ព្រះអង្គក៍បានអំពាវអោយប្រជាពលរដ្ឋចូលរួមទប់ស្កាត់ និងប្រយុទ្ធជំងឺឆ្លងកូវីដ១៩ផងដែរ៕
អត្ថបទ និង រូបភាព៖ យូ វង្ស ឈិត សាវី
