លោកស្រី យូ សុភា អភិបាលរងខេត្តសៀមរាប ប្រធានលេខាធិការដ្ឋាន នៃគណៈកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស លើកបង្ហាញនៅក្នុងកិច្ចប្រជុំនាព្រឹកថ្ងៃទី២៦ ខែតុលា ឆ្នាំ២០២០ ស្តីពីលទ្ធផល និងបញ្ហាប្រឈមនានា លើសកម្មភាពអនុវត្តការងារប្រចាំខែតុលា និងពិនិត្យមើលរបាយការណ៍រយពេល១០ខែ ឆ្នាំ២០២០នេះ ដោយបានបញ្ជាក់ថា ការគ្រប់គ្រងស្ថិតិបញ្ជូនជនរងគ្រោះកន្លងមក នៅមានចន្លោះខ្វះខាតដោយមិនមានការផ្ទៀងផ្ទាត់ជាមួយគ្នា រវាងស្ថាប័នសមត្ថកិច្ច និងអង្គការជាដៃគូដែលកំពុងប្រតិបត្តិការលើការងារនេះ ដូច្នេះហើយទើបធ្វើឲ្យទិន្នន័យនៃអំពើជួញដូរមនុស្សនៅកម្ពុជា ត្រូវបានប៉ោងឡើងខុសពីការពិត។
លោកស្រី យូ សុភា មានប្រសាសន៍បន្តថា ប្រទេសកម្ពុជា គឺជារដ្ឋអធិបតេយ្យមួយ នៅក្នុងចំណោមបណ្តាប្រទេសផ្សេងៗទៀត ដែលបានចុះហត្ថលេខាលើសច្ចាប័ននៅអង្គការសហប្រជាជាតិ ស្តីអំពីភេរវកម្ម ឧក្រឹដ្ឋកម្មឆ្លងដែន ប្រឆាំងអំពើជួញដូរមនុស្ស។ ឆ្នាំ២០២០នេះ របាយការណ៍របស់ក្រសួងមហាផ្ទៃ ដែលជាស្ថាប័នសេនាធិការរបស់រាជរដ្ឋាភិបាលកម្ពុជា និងរបាយការណ៍របស់បណ្តាអង្គការនានាជាដៃគូសហការ បានបង្ហាញទិន្នន័យជូនអង្គការសហប្រជាជាតិ មិនស៊ីសង្វាក់គ្នានោះឡើយ ដែលធ្វើឲ្យអន្តរជាតិវាយតម្លៃ ទម្លាក់ចំណាត់ថ្នាក់កម្ពុជា ពីលេខ២ មកលេខ២កន្លះ។
ក្រោមការបង្ហាញមតិគោលរបស់លោកស្រីប្រធានលេខាធិការដ្ឋាន កិច្ចប្រជុំបានឯកភាពទៅលើយន្តការអនុវត្ត ដើម្បីពង្រឹងការងារគ្រប់គ្រងទិន្ន័យជនរងគ្រោះ ដោយអំពើជួញដូរមនុស្ស។ គ្រប់បណ្តាអង្គភាព ស្ថាប័នពាក់ព័ន្ធ នគរបាលយុត្តិធម៌ អង្គការដៃគូទាំងអស់ ត្រូវចាត់បញ្ជូនជនរងគ្រោះទៅកាន់មន្ទីរសង្គមកិច្ច អតីតយុទ្ធជន ដើម្បីធ្វើកំណត់ត្រាបញ្ចូលទិន្នន័យ រួចទើបត្រូវបានប្រគល់បញ្ចូនត្រឡប់វិញ ក្នុងនោះលេខាធិការដ្ឋានត្រូវបានត្រួតពិនិត្យឡើងវិញជាប្រចាំខែ រវាងតួលេខដែលបានចុះក្នុងបញ្ជីសង្គមកិច្ច និងក្នុងបញ្ជីរបស់អង្គភាព ស្ថាប័ន បណ្តាអង្គការដៃគូប្រតិបត្តិការ ដើម្បីរកឲ្យឃើញទិន្នន័យដែលត្រឹមត្រូវ។ក៏ជាបញ្ហាដ៏សំខាន់សម្រាប់ការកត់ត្រាយកទន្នន័យនោះ ជនរងគ្រោះត្រូវរកឲ្យឃើញអត្តសញ្ញាណច្បាស់ពិតប្រាកដ ថាជាជនរងគ្រោះដោយអំពើជួញដូរមនុស្ស មិនមែនជាករណីផ្សេង។ យ៉ាងដូច្នោះដែរ ចំពោះមុខសញ្ញាជនសង្ស័យ ស្ថាប័នតុលាការ ត្រូវបានផ្តល់កិច្ចសហការ អនុវត្តតួនាទីរបស់ខ្លួន បង្ហាញអំពីធាតុផ្សំនៃបទល្មើស ដើម្បីរកយុត្តិធម៌ និងសុវត្ថិភាពជនរងគ្រោះ។ ធ្វើបានយ៉ាងដូច្នេះនៅគ្រប់បណ្តាខេត្ត-រាជធានី របាយការណ៍ថ្នាក់ជាតិ នឹងមានទិន្នន័យមួយដ៏ត្រឹមត្រូវ ស្របតាមគោលនយោបាយរបស់រាជរដ្ឋាភិបាល ដែលបានបង្កើតឲ្យមានគណៈកម្មាធិការជាតិ ប្រយុទ្ធប្រឆាំងអំពើជួយដូរមនុស្ស និងបានបង្ហាញទៅកាន់អន្តរជាតិផងដែរ អំពីលទ្ធផលនៃការខិតខំប្រឹងប្រែងទាំងនោះរបស់កម្ពុជា។
សូមបញ្ជាក់ថា កិច្ចប្រជុំនេះដែរ ត្រូវបានចូលរួមដោយសមាជិក និងក្រុមការងារទាំង៦របស់លេខាធិការដ្ឋាន រួមមានក្រុមការងារទប់ស្កាត់ ក្រុមការពារជនរងគ្រោះ ក្រុមការងារអនុវត្តច្បាប់ ក្រុមកិច្ចការយុត្តិធម៌ ក្រុមពង្រឹងកិច្ចសហប្រតិបត្តិការ និងក្រុមការងារកិច្ចការទេសន្តរប្រវេសន៍ និងតំណាងអង្គការជាដៃគូផងដែរ៕
អត្ថបទ និង រូបភាព៖ ងិន គីមឡេង
