នៅថ្ងៃទី២៥ ខែតុលា ឆ្នាំ២០២០ លោក ហ៊ន់ ប្ញទ្ធិ ប្រធានគណ:កម្មាធិការអនុសាខាកាកបាទក្រហមកម្ពុជា ស្រុកស្រីស្នំ និងសហការី បាននាំយកអំណោយមនុស្សធម៌របស់សាខាកាកបាទក្រហមខេត្តសៀមរាប ផ្តល់ជូនគ្រួសាររងគ្រោះដោយសារគ្រោះជំនន់ទឹកភ្លៀងចំនូន២៨គ្រួសារ នៅគោកកៀនស្រែ ស្ថិតក្នុងភូមិព្រេច ឃុំត្រាំសសរ ស្រុកស្រីស្នំ។ អំណោយមនុស្សធម៌ដែលផ្តល់ជូនរួមមាន៖ អង្ករ៣០គីឡូក្រាម មុង១ ភួយ១ សារុង១ ក្រមា១ អាវយឺត១ ត្រីខ១យួរ មី១កេស កន្ទេល១ ឃីត១កញ្ចប់ និង ៥ម៉ឺនរៀល។
ក្នុងឱកាសនោះដែរ លោក ហ៊ន់ ប្ញទ្ធិ បានពាំនាំនូវការផ្តាំសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ដែលថ្នាក់ដឹកនាំទាំងពី តែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូបដោយមិនប្រកាន់ វណ្ណៈ ជំនឿសាសនា ឬ និន្នាការនយោបាយណាមួយឡើយ ដូចដែលលើកឡើងថា កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល។
លោក ហ៊ន់ ប្ញទ្ធិ ក៏បានរំលឹកផងដែរថា ដោយក្នុងស្រុកស្រីស្នំទាំងមូល កំពុងតែកើតមានឡើងនូវជំនន់ទឹកភ្លៀង ដូច្នេះសូមបងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ ទោះបីជាស្ថានភាពទឹកជំនន់ក្នុងស្រុកយើងបានស្រកបន្តិចក៏ដោយ តែសូមអោយមានការប្រុងប្រយ័ត្នចំពោះ សុខភាពពិសេសកូនចៅតូចៗ ដើម្បីជៀសផុតពី គ្រោះភ័យផ្សេងៗក្នុងអំឡុងពេលដែលប្រទេសកម្ពុជាយើងកំពុងរងឥទ្ធិពលព្យុះដែលបង្កជាបាតុភូតភ្លៀងផ្គរ រន្ទះ ខ្យល់កន្ត្រាក់ និងជំនន់ ទឹកភ្លៀង ដែលអាចបង្កជាគ្រោះថ្នាក់ជាយថាហេតុ ហើយប្រសិនបើបងប្អូនមានជំងឺ និងគ្រោះថ្នាក់ផ្សេងៗត្រូវ ប្រញ៉ាប់បញ្ជូនទៅមណ្ឌលសុខភាពដែលនៅជិតបំផុត៕
អត្ថបទនិងរូបភាព៖សាខាកាកបាទក្រហមខេត្តសៀមរាប
