ព្រះវិជ័យរង្សីបណ្ឌិត ឡាច លាង ព្រះអនុគណក្រុងសៀមរាប រួមជាមួយព្រះចៅអធិការវត្តមួយចំនួន ដោយមានកិច្ចសហការ និង សម្របសម្រួលពីលោកអភិបាលស្រុក ជីក្រែង និងសហការី បាននាំយកស្បៀងអាហារ ដែលបានមកពីការកៀងគរ និងចូលរួមពីសំណាក់ព្រះចៅអធិការតាមបណ្តាវត្តជាច្រើនក្នុងខេត្តសៀមរាប រួមជាមួយការចូលរួមរបស់សប្បុរសជនមួយចំនួនក្នុងក្រុងសៀមរាប ចែកជូនដល់ប្រជាពលរដ្ឋរងផលប៉ះពាល់ខ្លាំងដោយជំនន់ទឹកភ្លៀងចំនួន៥៣គ្រួសារ នៅក្នុងឃុំជីក្រែង ស្រុកជីក្រែង កាលពីរសៀលថ្ងៃទី២៦ ខែតុលា ឆ្នាំ២០២០ម្សិលមិញនេះ ។
លោក ពៅ ប៊ុនធឿន អភិបាលស្រុកជីក្រែង បានឲ្យដឹងថា ៖ ស្រុកជីក្រែង ក៏ដូចជាស្រុកនានាក្នុងខេត្តសៀមរាបដែរ ដែលទទួលរងនូវជំនន់ទឹកភ្លៀង បណ្តាលឱ្យលិចលង់ផ្ទះសម្បែង ខូចខាតហេដ្ឋារចនាសម្ព័នជាច្រើន ហើយជំនន់ទឹកភ្លៀងនេះ បានធ្វើឱ្យប៉ះពាល់ផ្ទះសម្បែងបងប្អូនដែលរស់នៅតាមដងស្ទឹងក្នុងឃុំជីក្រែងជាង១ពាន់គ្រួសារ ក្នុងនោះប៉ះពាល់ធ្ងន់ធ្ងរចំនួន៥៣គ្រួសារ និងមួយចំនួនមិនធ្ងន់ទេតែជាគ្រួសារមានជីវភាពខ្វះខាត ។
ព្រះវិជ័យរង្សី បណ្ឌិត ឡាច លាង ព្រះ អនុគណ ក្រុងសៀមរាប មានថេរដីការថា សម្ភារនិងថវិកាទាំងនេះ ថ្វីត្បិតតែមិនឆ្លើយតបតាមតម្រូវការចាំបាច់ក្តី តែជាសមានចិត្តបង្ហាញពីការយកចិត្តទុកដាក់ អាណិតអាសូររបស់ព្រះសង្ឃនិងសប្បុរសជនចំពោះបងប្អូនដែលរងផលប៉ះពាល់ដោយសារគ្រោះមហន្តរាយជំនន់ទឹកភ្លៀង បណ្តាលឱ្យខូចខាតទ្រព្យសម្បត្តិ និងជួបការលំបាកផ្នែកជីវភាព ដូច្នេះបញ្ហាសំខាន់ ក្រោយពីទឹកស្រកទៅ សូមខិតខំបង្កបង្កើនផលដាំដំណាំចិញ្ចឹមរួមផ្សំ ដើម្បីជួយសម្រាលការលំបាកក្នុងជីវភាពគ្រួសារ និងសូមយកចិត្តទុកដាក់គិតគូពីសុខភាពផ្ទាល់ខ្លួននិងគ្រួសារឱ្យបានជាប្រចាំ រក្សាអនាម័យប្រយ័ត្នប្រយែងលើការបរិភោគ ដោយបរិភោគនូវទឹកដាំពុះ និងអាហារដែលចំអិនបានល្អ ដើម្បីចៀសវាងជំងឺរាគរុសផ្សេងៗ ជាពិសេស កុំភ្លេចមេរោគកូវីដ១៩ ចូរកុំធ្វេសប្រហែស ត្រូវប្រុងប្រយ័ត្នបង្ការ ការពារទប់ស្កាត់ទាំងអស់គ្នា និងណែនាំដល់កូនចៅអនុវត្តឱ្យបានត្រឹមត្រូវនូវការណែនាំរបស់ក្រសួងសុខាភិបាល ស្តីពីការការពារ ទប់ស្កាត់ បង្ការការចម្លងជំងឺកូវីដ១៩ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
