កាលពីរសៀលថ្ងៃទី២៦ខែតុលាឆ្នាំ២០២០ម្សិលម៉ិញនេះ ព្រះគ្រូមុន្នីបញ្ញាញាណ ព្រហ្មជោត្តោ ស៊ុម ពិសិទ្ធិ ព្រះសមុហ៍គណខេត្តសៀមរាប បានដឹកនាំមន្រ្តីសង្ឃខេត្តសៀមរាប និងចៅអធិការវត្តមួយចំនួននៅក្នុងក្រុងសៀមរាបសហការជាមួយសាលាអនុគណស្រុកព្រះនេត្រព្រះ និងសាលាអនុគណស្រុកមង្គលបុរី ខេត្តបន្ទាយមានជ័យ បាននាំយកស្បៀងអាហារទៅផ្តល់ជូនដល់ប្រជាពលរដ្ឋដែលកំពុងរងគ្រោះដោយសារជំនន់ទឹកភ្លៀង ចំនួន៣៦គ្រួសារ ស្ថិតនៅភូមិខ្លាំខាំឆ្កែ ឃុំឡំ ស្រុកមង្គលបុរី ខេត្តបន្ទាយមានជ័យ ដែលក្នុងមួយគ្រួសារទទួលបានអង្ករ២៥គីឡូក្រាម , ថ្នាំបំបាត់ជំងឺផ្តាសសាយមួយប្រអប់ និងថវិកាមួយចំនួន ។
ព្រះតេជគុណ ស៊ុម ពិសិទ្ធិ បានមានថេរដីការថា ការផ្តល់ស្បៀងអាហាររបស់ព្រះសង្ឃនៅពេលនេះ គឺជាការចូលរួមជាមួយរាជរដ្ឋាភិបាលកម្ពុជា ក្នុងការជួយទៅដល់ប្រជាពលរដ្ឋដែលកំពុងជួបការលំបាក ជាពិសេស គឺរងគ្រោះដោយគ្រោះទឹកជំនន់នៅពេលនេះ ដែលបញ្ហានេះ ដោយសារប្រទេសកម្ពុជារងសម្ពាធទាបធ្វើឱ្យមានភ្លៀងធ្លាក់ច្រើនដែលធ្វើឱ្យផ្ទះសម្បែងនិងផលដំណាំរបស់ប្រជាពលរដ្ឋ នៃបណ្តាខេត្តមួយចំនួនបានរងការលិចនិងខូចខាត ប៉ុន្តែដោយសារតែមើលឃើញថា ខេត្តបន្ទាយមានជ័យជាខេត្តមួយដែលមានប្រជាជនរងគ្រោះដោយទឹកជំនន់នេះខ្លាំងជាងគេ ដូច្នេះហើយបានជាមន្រ្តីសង្ឃនៅខេត្តសៀមរាប និងខេត្តបន្ទាយមានជ័យបានរួមគ្នានាំយកស្បៀងអាហារមួយចំនួន មកផ្តល់ជូនប្រជាពលរដ្ឋដែលកំពុងតែជួបការលំបាក។
ព្រះតេជគុណ ស៊ុម ពិសិទ្ធិ មានថេរដីការបញ្ជាក់ថា ជីវភាពព្រះសង្ឃ គឺញោមញាតិជាអ្នកខ្វល់ខ្វាយជួយជ្រោមជ្រែង ដល់ឥឡូវនេះប្រជាពលរដ្ឋជួបការលំបាក ព្រះសង្ឃត្រូវតែខ្វល់ខ្វាយជួយជ្រោមជ្រែងញោមញាតិវិញម្តង ហើយតាមរយៈនេះ សូមអំពាវនាវឱ្យប្រជាពលរដ្ឋទាំងអស់ដែលកំពុងរងគ្រោះដោយទឹកជំនន់ត្រូវមានការប្រុងប្រយ័ត្នឱ្យខ្ពស់ចំពោះអគ្គិសនី សត្វមានពឹស និងក្មេងតូចៗជៀសវាងមានការគ្រោះថ្នាក់ ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
