នៅព្រឹកថ្ងៃទី២៧ ខែតុលា ឆ្នាំ២០២០ ឯកឧត្តមនាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីន បានអញ្ជើញជាអធិបតីក្នុងពិធីបើកកិច្ចសិក្ខាសាលាបូកសរុបលទ្ធផលការងារឆ្នាំ២០២០ និងលើកទិសដៅឆ្នាំ២០២១ ដោយមានការចូលរួមពីថ្នាក់ដឹកនាំ មន្ត្រី បុគ្គលិករបស់អាជ្ញាធរមីន តំណាងអង្គការ UNDP និង DFID។
ឯកឧត្តមនាយឧត្តមសេនីយ៍ សែម សុវណ្ណនី មានប្រសាសន៍បញ្ជាក់ថា អង្គសិក្ខាសាលានេះ ត្រូវបានរៀបចំឡើងជារៀងរាល់ឆ្នាំ ដើម្បីស្តាប់នូវរបាយការណ៍សមិទ្ធផល សម្រេចបានរយៈពេល១ឆ្នាំកន្លងមក ការលើកទិសដៅការងារបន្ត និងការចែករំលែកព័ត៌មានសំខាន់ៗផ្សេងទៀត ពិសេស ការលើកទឹកចិត្តដល់មន្រ្តី-បុគ្គលិក ព្រមទាំងបុគ្គលិកគម្រោង ដើម្បីមានឱកាស ចែករំលែកបទពិសោធន៍គ្នាទៅវិញទៅមក និងបង្ហាញអំពីលទ្ធផលការងារដែលសម្រេចបាន ក្នុងក្របខ័ណ្ឌជាតិ និងអន្តរជាតិ សម្រាប់វិស័យសកម្មភាពមីន ក្រោមការដឹកនាំដ៏ឈ្លាសវៃរបស់ សម្តេចតេជោ នាយករដ្ឋមន្រ្តី បានធ្វើឲ្យវិស័យនេះ មានការរីកចម្រើនយ៉ាងខ្លាំង។ ជាមួយគ្នានោះដែរ ឯកឧត្តមក៏បានធ្វើការកោតសរសើរ និងវាយតម្លៃខ្ពស់ ចំពោះការខិតខំរបស់ថ្នាក់ដឹកនាំ មន្ត្រី បុគ្គលិក ទាំងអស់ដែលបានបំពេញការងារប្រកបដោយប្រសិទ្ធភាព និងប្រសិទ្ធផលខ្ពស់នាពេលកន្លងមក។
ក្នុងឱកាសនោះឯកឧត្តមក៏បានផ្តល់នូវអនុសាសន៍មួយចំនួនដូចខាងក្រោម៖១.បង្កើនស្មារតីទទួលខុសត្រូវ តម្កល់ប្រយោជន៍ជាតិខ្ពស់ សមូហភាពដឹកនាំបុគ្គលទទួលខុសត្រូវ តាមតួនាទីភារកិច្ចដែលប្រមុខរាជរដ្ឋាភិបាលប្រគល់ឱ្យ ,២.ពិភាក្សាស៊ីជម្រៅ រកអោយឃើញចំនុចខ្លាំង ពិសេសចំនុចខ្សោយ ដើម្បីរួមគ្នាដោះស្រាយ ,៣.ត្រូវចែករំលែកបទពិសោធន៍ រវាងបុគ្គល និងបុគ្គល រវាងនាយកដ្ឋាននិងនាយដ្ឋាន ពិសេស បទពិសោធន៍នៃការដឹកនាំពីបណ្តាប្រទេសជឿនលឿនលើពិភពលោក ដែលជាយន្តការដោះស្រាយងាយៗ ក្នុងការរួមចំណែកនៃការដឹកនាំប្រកបដោយចីរភាព ,៤.រួមគ្នា និងសហការល្អ ជាមួយបណ្តាប្រទេសជាមិត្ត នឹងដៃគូអភិវឌ្ឍន៍ អង្គការនានា កៀរគររកជំនួយ ជាថវិកា មធ្យោបាយសម្ភារៈ និងការបណ្តុះបណ្តាលធនធានមនុស្ស សម្រាប់បម្រើឱ្យវិស័យសកម្មភាពមីន ,៥.ពិចារណា លើការរៀបចំគម្រោងផែនការ MoU ជាមួយបណ្តាប្រទេសជាមិត្ត ដើម្បីផ្លាស់ប្តូរបទពិសោសធន៍ និងការផ្លាស់ប្តូរទស្សនកិច្ចពីគ្នាទៅវិញទៅមក ,៦.យកចិត្តទុកដាក់សុខទុក្ខរបស់មន្រ្តីនៅក្រោមឱវាទ ពិសេសបញ្ហាជីវភាពរស់នៅ ទាំងមន្រ្តីជំនាន់ក្រោយ និងរៀមច្បងជំនាន់មុន ,៧.បន្តរួមគ្នាប្រយុទ្ធប្រឆាំងមេរោគ COVID-19 ដែលនាំចូលសុទ្ធសាធពីខាងក្រៅ ដើម្បីខ្លួនយើង ដើម្បីគ្រួសារ ពិសេសដើម្បីប្រទេសជាតិយើងទាំងមូល និង៨.ត្រូវព្រួតដៃគ្នាបន្តការពារសន្តិភាពឱ្យខានតែបាន ពិសេសសមិទ្ធផលនានា ក្រោមការដឹកនាំដ៏ឈ្លាសវៃរបស់សម្តេចតេជោនៃយើង។
គួរបញ្ជាក់ថា បើតាមរបាយការណ៍របស់អគ្គលេខាធិការដ្ឋានអាជ្ញាធរមីន បង្ហាញថា៖យោងតាមផែនការយុទ្ធសាស្រ្តជាតិសកម្មភាពមីន២០១៨-២០២៥ កម្ពុជាបានតាំងចិត្ត នឹងធ្វើការបោសសម្អាតមីនឱ្យអស់ទាំងស្រុង ពីដែនដីទាំងមូលនៅដំណាច់ឆ្នាំ២០២៥ ហើយក្នុងកាលៈទេសៈណាមួយសមស្របក្នុងឆ្នាំ២០២១ នឹងធ្វើការប្រកាសជាសាធារណៈ ចំនួនប្រមាណជាង ១៤០០ភូមិ ជាភូមិគ្មានការគម្រាមកំហែងដោយសារមីន។ ក្នុងន័យនេះ អាជ្ញាធរមីនដែលជាសេនាធិការឱ្យរាជរដ្ឋាភិបាល លើវិស័យសកម្មភាពមីននៅកម្ពុជា នៅមានបេសកកម្មចំបងៗច្រើនថែមទៀតដែលត្រូវបន្ត និងទាមទាឱ្យមន្ត្រី-បុគ្គលិកទាំងអស់ យកចិត្តទុកដាក់ខ្ពស់បំពេញការងារដោយឆន្ទៈ ក្នុងការសម្រេចលទ្ធផលតាមផែនការគ្រោងទុក តាមការតម្រង់ទិសពីថ្នាក់ដឹកនាំ។ ចាប់តាំងពីឆ្នាំ១៩៧៩ ដល់ខែតុលា ឆ្នាំ២០១៩ មានជនរងគ្រោះដោយសារមីន និងសំណល់ជាតិផ្ទុះពីសង្រ្គាម សរុបចំនួន ៦៤៨៤៩។ ដោយឡែកនៅដើមឆ្នាំ២០២០នេះ គិតត្រឹមខែកញ្ញា មានជនរងគ្រោះដោយសារមីន និងសំណល់ជាតិផ្ទុះពីសង្រ្គាមមានចំនួនតែ៥៥នាក់ ហើយតួលេខនេះមានការថយចុះគួរឱ្យកត់សម្គាល់ បើយើងប្រៀបធៀបជាមួយអត្រាជនរងគ្រោះជាធម្យមភាគប្រចាំឆ្នាំ ឃើញមានការថយចុះដល់ទៅ ៩៦.៥%។
អត្ថបទ និង រូបភាព៖ យូ វង្ស
