សមាគមសណ្ឋាគារកម្ពុជា បើកចំកិច្ចប្រជុំដើម្បីសិក្សាស្វែងយល់ពីគម្រោងអភិវឌ្ឍខេត្តសៀមរាប នៅព្រឹកមិញនេះ
ថ្ងៃទី២៧ ខែតុលា ឆ្នាំ២០២០ សមាគមសណ្ឋាគារកម្ពុជា បើកចំកិច្ចប្រជុំដើម្បីសិក្សាស្វែងយល់ពីគម្រោងអភិវឌ្ឍខេត្តសៀមរាប និងដើម្បីផ្តល់ចំណេះដឹង លើកទឹកចិត្តដល់សមាជិកក្នុងខេត្តសៀមរាប បន្តអាជីវកម្មរបស់ខ្លួនទៅមុខ ទោះបីជាស្ថិតនៅក្នុងកំឡុងពេលវិស័យទេសចរណ៍ធ្លាក់ចុះយ៉ាងខ្លាំងព្រោះទទួលរងប៉ះពាល់នូវវិបត្តិកូវីឌ១៩។ ជាងនេះទៅទៀតគឺដើម្បីស្វែងរកសមាជិកបន្ថែមទៀតក្នុងខេត្តសៀមរាប។ សមាគមមានឆន្ទៈប្រមូលសមាជិកដែលពាក់ពន្ធ័ក្នុងវិស័យទេសចរណ៍ ដើម្បីធ្វើការក្នុងសំលេងតែមួយ ក្នុងគោលដៅលើកស្ទួយវិស័យទេសចរណ៍ក្នុងព្រះរាជាណាចក្រកម្ពុជាអោយកាន់តែ ល្បីរន្ទឺ និង ប្រសើរឡើងនៅលើពិភពលោក។
កិច្ចប្រជុំនេះប្រព្រឹត្តិទៅក្រោមអធិបតីភាព លោក ពៅ ពិសិដ្ឋអភិបាលរងខេត្ត និងេជាតំណាងដ៍ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ប្រធានសមាគមសណ្ឋាគារកម្ពុជា ប្រធាន សមាគមសណ្ឋាគារកម្ពុជាខេត្តសៀមរាប! ប្រធានសហព័ន្ធទេសចរណ៍កម្ពុជា ប្រធានសហព័ន្ធទេសចរណ៍កម្ពុជា ខេត្តសៀមរាប និងវត្តមាន លោក លោកស្រី ប្រធានមន្ទីរ-អង្គភាពពាក់ព័ន្ធ លោក អភិបាល នៃគណៈអភិបាលក្រុង លោក លោកស្រី ម្ចាស់សណ្ឋាគារ ដែល ជាសមាជិក សមាជិកាសមាគមសណ្ឋាគារ ជាច្រើនរូបផងដែរ។
លោក David Jaya PIOT ប្រធានសមាគមសណ្ឋាគារកម្ពុជាប្រចាំសាខាខេត្តសៀមរាប បានលើកឡើងថា៖ ខេត្តសៀមរាប មានសក្តានុពលក្នុងវិស័យឧស្សាហកម្មទេសចរណ៍យ៉ាងខ្លាំងសំរាប់អ្នកវិនិយោគ។ ជាពិសេសស្ថិតនៅក្រោមការដឹកនាំរបស់ឯកឧត្តមអភិបាលខេត្ត មានការពង្រីកហេដ្ឋារចនាសម្ព័ន្ធ ផ្លូវថ្នល់ ចំនួន ៣៨ខ្សែ គឺជួយសម្រួលដល់ការធ្វើដំណើរ ក៍ដូចជាបង្កើនសោភណ័ភាពដល់ខេត្តសៀមរាបអោយកាន់តែមានសម្រស់ ទាក់ទាញភ្ញៀវទេសចរណ៍ ជាតិ និង អន្តរជាតិមកទស្សនាប្រាសាទអង្គរវត្ត និង កន្លែងរមណីដ្ឋានវប្បធម៌ ក៏ធម្មជាតិផ្សេងទៀត កាន់តែច្រើនឡើងៗ។ លោកក៏បានកោតសរសើរដល់ការខិតខំប្រឹងប្រែងក្នុងការអភិវឌ្ឍន៍ខេត្តសៀមរាបរបស់អាជ្ញាធរខេត្តផងដែរ។
មានប្រសាសន៍ក្នុងឱកាសនោះដែរ លោក ពៅ ពិសិដ្ឋ បញ្ជាក់ថា ចាប់ពីដើមឆ្នាំ២០២០ រហូតដល់ពេលបច្ចុប្បន្ន ខេត្តសៀមរាប ក៏ដូចជាកម្ពុជា និងពិភពលោកទាំងមូល បានរងនូវផលប៉ះពាល់ដ៏ធ្ងន់ធរពីជំងឺកូវីដ-១៩។ ស្ថិតក្នុងស្ថានភាពដ៏លំបាក នៃផលប៉ះពាល់ជំងឺឆ្លងកូវីដ-១៩នេះ បានធ្វើឱ្យប៉ះពាល់យ៉ាងខ្លាំង ដល់សេដ្ឋកិច្ចសកលក៏ដូចជាសេដ្ឋកិច្ចជាតិ ពិសេសបងប្អូនប្រតិបត្តិករ និងអ្នកបម្រើការងារក្នុងវិស័យទេសចរណ៍។ ផលវិបាកនៃជំងឺកូវី-១៩ នេះបានធ្វើឱ្យខេត្តសៀមរាប ពិសេសតំបន់រមណីយដ្ឋានអង្គរ ដែលធ្លាប់តែទទួលបានភ្ញៀវទេសចរជាតិ-អន្តរជាតិ មកទស្សនាកម្សាន្តយ៉ាងច្រើនកុះករបែរជាមានភាពស្ងប់ស្ងាត់។
លោក ពៅ ពិសិដ្ឋ មានប្រសាសន៍បន្តថា តាមរយៈកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី០៤ ខែកញ្ញា ឆ្នាំ២០២០ កន្លងទៅនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានប្រកាសសម្រេចកញ្ចប់ថវិកា ចំនួន ១៥០លានដុល្លារ សម្រាប់ស្ថាបនាផ្លូវ ចំនួន ៣៨ខ្សែ ក្នុងខេត្តសៀមរាបរបស់យើង។ ពាក់ព័ន្ធករណីនេះ រដ្ឋបាលខេត្តសៀមរាប បានសហការជា មួយមន្រ្តីជំនាញក្រសួងសាធារណការ និងដឹកជញ្ជូន សិក្សាប្លង់មេសម្រាប់សាងសង់ផ្លូវទាំង៣៨ខ្សែ រួចរាល់អស់ហើយ ហើយសង្ឃឹមថាយើងនឹងរៀបចំពិធីបើកការដ្ឋានសាងសង់ក្នុងពេលដ៏ខ្លីខាងមុខនេះ។ ការសម្រេចដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជានេះ គឺពិតជាជំរុញដល់កិច្ចអភិវឌ្ឍន៍ហេដ្ឋារចនាសម្ព័ន្ធក្នុងខេត្ត លើកកម្ពស់សោភ័ណភាពក្រុងសៀមរាប ពិសេសបានរួមចំណែកយ៉ាងខ្លាំងដល់សក្តានុពលទេសចរណ៍ និងអាជីវកម្ម វិនិយោគក្នុងខេត្តសៀមរាប ឱ្យកាន់តែល្អប្រសើរថែមទៀត សម្រាប់ភ្ញៀវទេសចរ និងបងប្អូនប្រជាពលរដ្ឋ ដែលកំពុងរស់នៅក្នុងខេត្តសៀមរាប ដោយអំណរសាទរជាទីបំផុត។
លោក អភិបាលរងខេត្ត បានបញ្ជាក់ផងដែរថា វិស័យទេសចរណ៍ គឺជាវិស័យងាយរងគ្រោះពីឥទ្ធិពលជំងឺកូវីដ-19ហើយបាន និងកំពុង ទទួលឥទ្ធិពលអវិជ្ជមានលើវិស័យទេសចរណ៍ សកលលោក ដូចនេះ យើងទាំងអស់គ្នាត្រូវចូលរួមទប់ស្កាត់ និងបង្ការជំងឺនេះ ដោយត្រូវអនុវត្តតាមការណែនាំរបស់ក្រសួងសុខាភិបាល ឱ្យបានជាប់ជាប្រចាំ ព្រោះថា «ទោះស្ថិតក្នុងស្ថានភាពនៃវិបត្តិក៏ដោយការ ធ្វើដំណើរនៅតែអាចមាន តែត្រូវអនុវត្តនូវវិធានការបង្ការ ទប់ស្កាត់ឱ្យបានខ្ជាប់ខ្ជួន តាមការណែនាំរបស់ក្រសួងសុខាភិបាល»។ដោយសារវិបត្តិកូវីដ-១៩ បានធ្វើឱ្យមានការផ្លាស់ប្តូរចំណង់ចំណូលចិត្តរបស់អ្នកទេសចរ ឱ្យងាកមករកការដើរកម្សាន្តតាមតំបន់ជនបទ សហគមន៍ទេសចរណ៍ តំបន់អេកូ-ទេសចរណ៍ និងតំបន់ធម្មជាតិនានា កាន់តែច្រើនឡើង ដែលបានធ្វើឱ្យវិស័យទេសចរណ៍ជនបទ បានចូលរួមចំណែកក្នុងការទប់ស្កាត់ចំណាកស្រុក តាមរយៈការបង្កើតការងារ ការអភិរក្សនិងលើកកម្ពស់វប្បធម៌ បេតិកភ័ណ្ឌ និងទំនៀមទំលាប់ប្រពៃណី ការពារ និងថែរក្សាធនធានធម្មជាតិ ព្រមទាំងនាំមកនូវនវានុវត្តន៍ និងគំនិតឆ្នៃប្រឌិតដល់ប្រជាពលរដ្ឋមូលដ្ឋាន៕
អត្ថបទ និង រូបភាព៖ យូ វង្ស
