ថ្ងៃទី២៧ ខែតុលា ឆ្នាំ២០២០ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោកជំទាវ អមដំណើដោយ ឯកឧត្តម ជា រដ្ឋលេខាធិការ ឯកឧត្តមប្រតិភូរាជរដ្ឋាភិបាល អគ្គនាយក អគ្គនាយករងក្រោមឱវាទក្រសួង និងវត្តមានលោក ង៉ាន់ ភិរុណ អភិបាលរងខេត្តនិងជាតំណាងដ៍ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានអញ្ជើញចុះពិនិត្យផលប៉ះពាល់ដំណាំកសិកម្ម ដោយគ្រោះជំនន់ទឹកភ្លៀង និងជួបសំណេះសំណាលជាមួយប្រជាពលរដ្ឋ និងចែកពូជស្រូវ-បន្លែនៅសង្កាត់ក្របីរៀល ក្រុងសៀមរាប និងនៅឃុំល្វាស្រុកពួកខេត្តសៀមរាបខេត្ត។
មានមតិសំណេះសំណាលនាឱកាសនោះ ឯកឧត្តម វេង សាខុន បានពាំនាំនូវការផ្តាំផ្ញើសួរសុខទុក្ខ និងការនឹករលឹកពីសម្តេចតេជោ ហ៊ុន សែន នាយករដ្ឋ មន្ត្រី សម្តេចកិត្តិព្រឹទ្ធបណ្ឌិត ហើយសម្តេចបានលើកកំលាំងចិត្តប្រជាពលរដ្ឋឲ្យខំតស៊ូជំនះរាល់ឧបសគ្គដើម្បីចាប់ផ្តើមស្តារផលដំណាំឡើងវិញ។ ជាមួយគ្នានោះដែរ រាជរដ្ឋាភិបាលកម្ពុជា ជាពិសេសសម្តេចតេជោមានការសោកស្តាយ អាណិតអាសូរ និងគិតគូ ខ្វល់ខ្វាយអំពីសុខទុក្ខរបស់បងប្អូនដែលរងគ្រោះដោយសារទឹកជំនន់ជាពន់ពេកណាស់។ ទឹកជំនន់គឺជាគ្រោះធម្មជាតិដែលមនុស្សលោកមិនអាចចៀសវាងបាន វាមិនគ្រាន់តែបំផ្លាញផលដំណាំ ហេដ្ឋារចនា សម្ព័ន្ធសំខាន់ៗ និងជីវិតមនុស្ស វាបានបន្សល់ទុកនូវបញ្ហាជាច្រើនគ្រប់បែបយ៉ាងសម្រាប់រយ: ពេលវែងដែលយើងត្រូវប្រឈម។ ហេតុនេះ អ្វីដែលសំខាន់ និងបន្ទាន់បំផុតបន្ទាប់ពីទឹកស្រកចុះ សម្តេចតេជោ ហ៊ុន សែន នាយករដ្ឋមន្រ្តីបានចេញបញ្ញាឲ្យក្រសួងកសិកម្ម រុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ ក្រសួងធនធានទឹក និងក្រសួងសាធារណ:ការ ត្រូវចុះមកធ្វើអន្តរាគមន៍ដោះស្រាយបញ្ហាជូនប្រជាពលរដ្ឋឲ្យបានទាន់ពេលវេលា និងមានប្រសិទ្ធភាព ធ្វើយ៉ាងណាស្តារផលិតកម្មស្បៀងឡើងវិញតាមដែលអាចធ្វើទៅបាន។
ឯកឧត្តមរដ្ឋមន្ត្រី មានប្រសាសន៍បន្តថា បន្ទាប់ពីទទួលបានបទបញ្ជានេះ ឯកឧត្តមរដ្ឋមន្ត្រីបាននាំយកពូជស្រូវ និងពូជបន្លែមកចែកជូនបងប្អូនដែលទទួលរងគ្រោះទូទាំងសង្កាត់ក្របីរៀល ក្រុងសៀមរាបចំនួន២០០ គ្រួសារ (១០០ ទទួលបានស្រូវពូជ និង ១០០គ្រួសារទៀតទទួលបានពូជបន្លែ) ដោយក្នុងមួយគ្រួសារទទួលបានស្រូវពូជ ១០០គ.ក្រ និង៣០០គ្រួសារ នៅឃុំល្វាស្រុកពួក មាន ២០០គ្រួសារទទួលបានពូជស្រូវ ១០០គ. ក្រ ក្នុង១គ្រួសារ និងថវិកា ២ម៉ីនរៀល និង ១០០គ្រួសារទៀតទទួលបានពូជបន្លែបួនមុខ ដោយក្នុង ១គ្រួសារ មានពោតដំណើប ត្រប់វែង ស្ពៃចង្កឹះ និងសណ្តែកកួរ រួមទាំងថវិកាឧបត្ថម្ភ ២ម៉ឺនរៀលផងដែរ។ឯកឧត្តម រដ្ឋមន្ត្រីបានបញ្ជាក់ជូនបងប្អូនប្រជាកសិករថា ការចែកពូជស្រូវ និងពូជបន្លែនាថ្ងៃនេះ គឺជាអំណោយដ៏ថ្លៃថ្លារបស់រាជរដ្ឋាភិបាល និងតាមការចង្អុលបង្ហាញផ្ទាល់ពីសម្តេចតេជោនាយករដ្ឋមន្រ្តី ចែកជូនបងប្អូនប្រជាកសិករ ដើម្បីស្តារផលិតកម្មស្បៀងឡើងវិញក្រោយពេលទឹកស្រក ហើយពូជនេះ មិនគួរយកទៅបុក ឬកិនយកអង្គរមកបរិភោគនោះទេ ផ្ទុយទៅវិញត្រូវយកទៅដាំដុះឲ្យបានទាន់ពេលវេលា ព្រោះជាពូជមិនប្រកាន់រដូវ និងអាយុកាលខ្លី សង្ឃឹមថា បងប្អូននឹងយកពូជនេះទៅដាំដុះបានផលផ្លែផ្កា គ្រាន់ទុកជាស្បៀងសម្រាប់ទ្រទ្រង់ជីវភាពគ្រួសារ ហើយក៏គួរដាំបន្លែ ដំណាំរួមផ្សំ និងចិញ្ចឹមមាន់ ឬត្រីបន្ថែមដើម្បីធានាសន្តិសុខស្បៀង និងបង្កើនប្រាក់ចំណូលគ្រួសារ។
ក្នងឱកាសនោះដែរ លោក ង៉ាន់ ភិរុណ បានជំរាបជូនអំពីស្ថានភាពទូទាំងខេត្តសៀមរាប ដែលបានទទួលរងនូវជំនន់ទឹកភ្លៀងកាលពីថ្ងៃទី១៧ដល់ថ្ងៃទី១៩ខែតុលាថ្មីៗនេះ បានបណ្តាលឱ្យប្រជាពលរដ្ឋជួបផលប៉ះពាល់ចំនួន៣៧២៧គ្រួសារ ក្នុងនោះប៉ះពាល់ធ្ងន់ធ្ងរចំនួន៩៧គ្រួសារនិងប៉ះពាល់មធម្យនិងតិចតួចចំនួន២២៨០គ្រួសារ។ ជាមួយគ្នានេះហេដ្ឋារចនាសម្ព័ន្ឋសាធារណៈនានាដូចជាផ្លូវថ្នល់កៅស៊ូ គ្រួសក្រហម ផ្លូវដីស សាលារៀន អគាររដ្ឋបាល សាលាស្រុក មន្ទីរពេទ្យបង្អែក ប្រព័ន្ឋធារាសាស្ត្រមួយចំនួន។ល។ហើយប៉ះពាល់ដំណាំស្រូវចំនួន១៤០០ហិកតា ខូចស្រូវ១២០៣ហិកតា ដំឡូងមី៩៩ហិកតា ព្រមទាំងខូចខាតផលដំណាំរួមផ្សំផ្សេងៗទៀតផងដែរ៕
អត្ថបទ និង រូបភាព៖ យូ វង្ស
