កាលពីថ្ងៃទី២៧ ខែតុលា ឆ្នាំ២០២០ ឯកឧត្តម គុជ លីណា អនុប្រធានគណៈកម្មាធិការសាខា តំណាងដ៏ខ្ពង់ខ្ពស់ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប រួមនឹងសហការី បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនដល់ប្រជាពលរដ្ឋរងគ្រោះដោយជំនន់ទឹកភ្លៀងចំនួន៥៣គ្រួសារ នៅឃុំជីក្រែង ស្រុកជីក្រែង ខេត្តសៀមរាប។ អំណោយមនុស្សធម៌ដែលបានផ្ដល់ជូន គឺក្នុងមួយគ្រួសារទទួលបាន៖អង្ករ៣០គីឡូក្រាម មុង១ ភួយ១ សារុង១ ក្រមា១ អាវយឺត២ កន្ទេល១ ចានស្រាក់១ឈុត សាប៊ូ២ដុំ មី១កេស ត្រីខ១យួរ ទឹកស៊ីអ៊ី១ដប ទឹកត្រី១ដប ទឹកបរិសុទ្ធ១យួរ ទឹកក្រូច១យួរ និងថវិកា១សែនរៀល។
ក្នុងឱកាសនោះដែរ ឯកឧត្តម គុណ លីណា បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម ទៀ សីហា ប្រធានគណៈកម្មាធិការសាខា ដែលថ្នាក់ដឹកនាំទាំងពីរតែងតែយកចិត្តទុកដាក់គិតគួរខ្ពស់ចំពោះសុខទុក្ខប្រជាពលរដ្ឋយើងនៅមូលដ្ឋានជាពិសេសជនរងគ្រោះ និងជនងាយរងគ្រោះគ្រប់ប្រភេទ ដោយមិនប្រកាន់និន្នាការនយោបាយ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ពោលគឺ “ទីណាមានទុក្ខលំបាក ទីនោះមានកាកបាទក្រហមកម្ពុជា” “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា”។
ឯកឧត្តម បានប្រសាសន៍បន្តថា ចំពោះអំណោយមនុស្សធម៌ទាំងអស់នេះ វានឹងអាចជួយសម្រួលការខ្វះខាតរបស់បងប្អូនបានមួយរយៈពេលដែលកំពុងរងគ្រោះនេះបាន បើទោះជាមិនច្រើនណាស់ណាក៏ដោយ។ ទន្ទឹមនេះដែរ ឯកឧត្តមអនុប្រធានគណៈកម្មាធិការសាខា ក៏បានផ្ដាំផ្ញើដល់បងប្អូន សូមយកចិត្តទុក្ខដាក់ពីសុខភាពអនាម័យ ត្រូវបរិភោគអាហារដែលឆ្អិនល្អ ពិសាទឹកដាំពុះ ដើម្បីជៀសវាងកុំឆ្លងជំងឺអាសន្នរោគផ្សេងៗ និងសូមប្រុងប្រយ័ត្នក្មេងតូចៗកុំឱ្យលេងទឹកជំនន់ ឬទឹកភ្លៀងឱ្យសោះ ព្រោះវាអាចបណ្ដាលឱ្យមានគ្រោះថ្នាក់ដោយប្រការណាមួយជាយថាហេតុ។ ម្យ៉ាងវិញទៀត បងប្អូនប្រជាពលរដ្ឋ កុំមានការភ័យព្រួយបារម្មណ៍ ពីព្រោះអាជ្ញាធរមូលដ្ឋានគ្រប់លំដាប់ថ្នាក់ នៅចាំជួយបងប្អូនប្រជាពលរដ្ឋគ្រប់ពេល មិនឱ្យបងប្អូនប្រជាពលរដ្ឋណាម្នាក់ដាច់អាហារ គ្រោះថ្នាក់ដល់អាយុជីវិតនោះឡើយ។
ក្នុងនោះដែរ ឯកឧត្តម ក៏បានក្រើនរម្លឹកដល់បងប្អូនប្រជាពលរដ្ឋទាំងអស់ មិនត្រូវធ្វេសប្រហែសអំពីជំងឺកូវីដ-១៩ ដែលជាបញ្ហាប្រឈមរួមទូទាំងជាសកលលោកនាពេលនេះ ទោះបីចំនួនអ្នកឆ្លងនៅក្នុងប្រទេសយើងមានតិចក្តី តែយើងត្រូវបង្កើនការយកចិត្តទុកដាក់ខ្ពស់ និងត្រៀមទប់ស្កាត់គ្រប់ពេលវេលា ដោយត្រូវធ្វើអនាម័យសុខភាពឲ្យបានជាប្រចាំ ដើមី្បការពារអាយុជីវិតសម្រាប់ខ្លួនឯងផ្ទាល់ និងក្រុមគ្រួសារកុំឲ្យមានឆ្លងមេរោគកូវីដ-១៩ ក៏ដូចក្នុងសហគម សំខាន់ក្នុងការាចូលរួមប្រយុទ្ធប្រឆាំងបង្កាទប់ស្កាត់ជាមួយរាជរដ្ឋាភិបាល និង អនុវត្តនូវវិធានការ និងសេចក្ដីណែនាំរបស់ក្រសួងសុខាភិបាលគឺ ត្រូវដុសលាងសម្អាតដៃជាប្រចាំដោយនិងទឹកសាប៊ូ អាល់កុល ឬជែល និង ពាក់ម៉ាស់ឲ្យបានត្រឹមត្រូវ៕
អត្ថបទ និង រូបភាព៖ ងិន គីមឡេង គឿន វ៉េត ម៉ី សុខារិទ្ធ
