អំណោយអង្ករចំនួន ១៥តោន របស់លោក William Warner Morse ជាអង្គការគាំទ្រសាលារៀនជនបទ(RSSO) ផ្តល់តាមរយៈឯកឧត្តមទេសរដ្ឋមន្ត្រី លី ធុច និង មីជាតិ ចំនួន ១០០ កេស អាវភ្លៀង ចំនួន ៥០០អាវ រួមទាំងកូដបញ្ចុះ តម្លៃសម្រាប់មន្ត្រីរាជការ នៅពេលហៅកង់បីជិះ ចំនួន ៣០០កូដ ស្មើទឹកប្រាក់ ៤លាន៥០០ ពាន់រៀល របស់ក្រុមហ៊ុន TADA MVL ដែលជាក្រុមហ៊ុន សម្រាប់ហៅកង់បី ជិះតាមកម្មវិធីទូរស័ព្ទ ត្រូវបានធ្វើការប្រគល់ជូនរដ្ឋបាលខេត្តសៀមរាប កាលពីរសៀលថ្ងៃទី ២៨ ខែ តុលា ឆ្នាំ២០២០ ក្រោមវត្តមានរបស់ឯកឧត្តម ង៉ាន់ ភិរុណ អភិបាលរងនៃគណៈ អភិបាលខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្ត និង មានការចូលរួមពីលោកនាយករដ្ឋបាលសាលាខេត្ត នាយកទីចាត់ការចំណុះសាលាខេត្តសៀមរាបផងដែរ ។
បន្ទាប់ពីតំណាងអង្គការ និង ក្រុមហ៊ុន បានធ្វើការបញ្ជាក់ពីទឹកចិត្តដ៏សប្បុរសធម៌របស់ខ្លួន ក្នុងពេលមានគ្រាលំបាក់ ក្នុងវប្បធម៌នៃការចែករំលែក ជូនដល់ជនរងគ្រោះ ក្នុងការចូលរួមជាមួយរាជរដ្ឋាភិបាល សំខាន់រដ្ឋបាលខេត្តសៀមរាប នៅ ពេលដែលប្រជាពលរដ្ឋនៅតាមបណ្តាក្រុង ស្រុង ទទួលរងគ្រោះដោយជំនន់ទឹកភ្លៀងនេះ ។ សូមបញ្ជាក់ផងដែរថា អង្ករ ១៥តោន ត្រូវបានប្រគល់ជូនបញ្ជាការដ្ឋានកងរាជអាវុធហត្ថខេត្តសៀមរាប ចំនួន ៥តោនផងដែរ ។
មានប្រសាសន៍នោះក្នុងនាមឯកឧត្តម ទៀ សីហា អភិបាលខេត្ត ឯកឧត្តម ង៉ាន់ ភិរុណ ក៏បានធ្វើការថ្លែងអំណរគុណដល់ទឹកចិត្តដ៏សប្បុរសធម៌ របស់លោក William Warner Morse និងឯកឧត្តមទេសរដ្ឋមន្ត្រី លី ធុច រួមទាំងក្រុមហ៊ុន TADA MVL ដែលបានផ្តល់អំណោយជាគ្រឿងឧបភោគបរិភោគផ្តល់ជូនដល់រដ្ឋបាលខេត្តសៀមរាប ក្នុងពេលដែលមានស្រុកមួយចំនួនបានទទួលរងផលប៉ះពាល់ដោយទឹកជំនន់ទឹកភ្លៀង ។ ឯកឧត្តមក៏បានជម្រាបជូន ដល់សប្បុរសជននិង តំណាងក្រុមហ៊ុនផងដែរថា ក្នុងករណីទឹកជំនន់នេះ អាជ្ញាធរខេត្តបានចុះទៅពិនិត្យដល់មូលដ្ឋានស្រុកមួយចំនួនដែល ទទួលរងគ្រោះធម្មជាតិដោយជំនន់ទឹកភ្លៀង បានធ្វើឲ្យប៉ះពាល់លំនៅដ្ឋាន និង ផលដំណាំប្រជាពលរដ្ឋយ៉ាងធ្ងន់ធ្ងរហើយមកដល់ថ្ងៃនេះ ស្ថានភាពបានធូរស្រាលហើយ តែតាមការផ្តល់ដំណឹងរបស់ក្រសួងធនធានទឹក ឧតុនិយម ថានៅថ្ងៃស្អែក ភូមិសាស្ត្រខេត្តមួយចំនួន រងនូវសម្ពាធអាកាសធាតុមិនល្អ ដែលធ្វើឲ្យស្ថានភាពទឹកនៅតាមបណ្តាស្រុក មួយចំនួនជួបរង ករណីនេះ ដែលនឹងធ្វើឲ្យភោគផលដំណាំរបស់បងប្អូនត្រូវរងការខូចខាតទៀតផង ដោយបច្ចុប្បន្នស្រូវបានកំពុងចេញផ្កា ហាលផ្លែ ។
ឯកឧត្តមបានបន្តទៀតថា ក្នុងនាមជាគណៈបញ្ជាការឯកភាពរដ្ឋបាលខេត្ត និង ជាអនុប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានដាក់នូវវិធានការមួយចំនួនដល់គណៈបញ្ជាការឯកភាពរដ្ឋបាលស្រុក ដើមី្បត្រៀមបង្កា ក្នុងការសង្រ្គោះប្រជាពលរដ្ឋ និង សត្វពាហនៈរបស់បងប្អូនទៅកាន់ទីទួលសុវត្ថិភាព ព្រមទាំងឲ្យយកចិត្តទុកដាក់ខ្ពស់លើបញ្ហាសុខភាពបងប្អូន និង មិនទុកឲ្យបងប្អូនណាម្នាក់ស្លាប់ដោយអាជ្ញាធរមិនដឹងនោះឡើយ ហើយក្នុងនោះដែរអាជ្ញាធរខេត្តក៏បានរៀបចំជាស្បៀង ដែលទទួលបានពីបងប្អូនសប្បុរសជនយកទៅផ្តល់ជូនដល់បងប្អូនប្រជាពលរងគ្រោះផងដែរ ។ ម៉្យាងទៀតឯកឧត្តមក៏បានសំណូមពរដល់ក្រុមហ៊ុន ក៏ដូចសប្បុរសជន បន្តនូវប្រពៃណីវប្បធម៌ចែករំលែកនេះ ទៅតាមបណ្តាខេត្ត ក្រុង ស្រុកឯទៀត ហើយអំណោយទាំងនេះឯកឧត្តមនឹងយកទៅចែកជូនដល់បងប្អូនប្រជាពលរដ្ឋរងគ្រោះ និង ងាយរងគ្រោះក្នុងពេលមានជំនន់ទឹកភ្លៀងនេះផងដែរ។ ម៉្យាងទៀតបើបងប្អូនសប្បុរសជន មានពេលវេលា សូមអញ្ជើញចូលរួមក្នុងការផ្តល់អំណោយដល់បងប្អូនរងគ្រោះនៅតាមបណ្តាមូលដ្ឋានផងដែរ ៕
អត្ថបទនិងរូបភាព៖ម៉ី សុខារិទ្ធ
