នៅរសៀលថ្ងៃទី២៩ ខែ តុលា ឆ្នាំ២០២០ លោក លី សំរិទ្ធ អភិបាលរងខេត្ត តំណាងឯកឧត្តម ទៀ សីហាអភិបាលខេត្តសៀមរាប បានទទួលអំណោយសប្បុរសធម៌ ពីក្រុមកីឡាបាល់ទាត់កងយោធពលខេមរភូមិន្ទ និងស្ថានីយ៍ទូរទស្សន៍កងយោធពលខេមរភូមិន្ទប៉ុស្តិ៍លេខ៥ ដើម្បីជួយដល់ប្រជាពលរដ្ឋក្នុងខេត្តសៀមរាប ដែលបានរងគ្រោះដោយទឹកជំនន់ កាលពីពេលថ្មីៗនេះ។
លោក អភិបាលរងខេត្ត បានថ្លែងអំណរគុណដល់ទឹកចិត្តដ៏សប្បុរសធម៌ របស់គណៈប្រតិភូ នៃក្រុមបាល់ទាត់កងយោធពលខេមរភូមិន្ទ និង ស្ថានីយ៍ទូរទស្សន៍កងយោធពលខេមរភូមិន្ទ៍ប៉ុស្តិ៍លេខ៥ ដែលបានចូលរួមជាមួយរាជរដ្ឋាភិបាល ក្នុងការជួយសម្រួលការលំបាកដល់ប្រជាពលរដ្ឋរងគ្រោះ ដែលមានជីវភាពក្រីក្រ។ អំណោយទាំងអស់នេះ រដ្ឋបាលខេត្ត នឹងរៀបចំចែកជូនប្រជាពលរដ្ឋ ខ្វះខាត ឲ្យបានទាន់ពេលវេលា។
អំណោយសប្បុរសធម៌ ដែលទទួលបាននាពេលនេះ រួមមាន អង្ករចំនួន ៥តោន ,មី ៣០០កេស, ទឹកបរិសុទ្ធ ២០០យួរ , ថ្នាំពេទ្យ ២០០កញ្ចប់ និង អាវរងា ៤០០អាវ។
អត្ថបទ និង រូបភាព៖ ម៉ី សុខារិទ្ធ
កែសម្រួលអត្ថបទ៖ សេង ផល្លី
