ផ្លូវជនបទជិត២០០គីឡូម៉ែត្រ ស្ថិតក្នុងស្រុកចំនួន៤ នៃខេត្តសៀមរាប រួមមានស្រុកពួក វ៉ារិន អង្គរធំ និងស្រុកអង្គរជុំ ត្រូវបានរងការខូចខាតដោយជំនន់ទឹកភ្លៀងការពីពេលថ្មីៗនេះ ហើយក្នុងស្រុកអង្គរជុំ រងផលប៉ះពាល់ធ្ងន់ធ្ងរជាងគេ នេះបើតាមការឲ្យដឹងពី ឯកឧត្ដម ភួង សោភា រដ្ឋលេខាធិការក្រសួងអភិវឌ្ឍន៍ជនបទ ក្នុងពេលចុះពិនិត្យស្ថានភាពផ្លូវជនបទ ក្នុងខេត្តសៀមរាប នៅថ្ងៃទី២៩ ខែតុលា ឆ្នាំ២០២០។
តាមការវាយតម្លៃរបស់ ឯកឧត្ដម ភួង សោភា និងរបាយការណ៍របស់លោកប្រធានមន្ទីរអភិវឌ្ឍន៍ជនបទខេត្ត ផ្លូវជនបទ ក្នុងស្រុកអង្គរជុំ ដែលរងការខូចខាតដោយជំនន់ទឹកភ្លៀង នឹងត្រូវធ្វើការជួសជុលជាបន្ទាន់ ដោយសាងសង់ជាផ្លូវក្រាលគ្រួសក្រហមមួយខ្សែប្រវែងជាង ៧គីឡូម៉ែត្រ តភ្ជាប់ពីឃុំចារឈូក ដល់ឃុំគោល ស្រុកអង្គរជុំ។
ជាមួយនោះ ក្រុមការងារក៏បាន ចុះពិនិត្យផ្លូវមួយខ្សែទៀត បានរងការខូចខាតដោយសារជំនន់ទឹកភ្លៀងនេះដែរ ចាប់ពីឃុំក្តីរុន ដល់ឃុំព្រៃជ្រូក ស្រុកពួក ប្រវែងជាង១ គីឡូម៉ែត្រ ដែលផ្លូវនេះ បានជួយសម្រួលដល់ការចរាចរណ៍ ដឹកជញ្ជូនកសិផលរបស់ប្រជាពលរដ្ឋទៅកាន់ទីផ្សារ។
ឯកឧត្ដមរដ្ឋលេខាធិការ បានស្នើដល់ប្រជាពលរដ្ឋ ក្នុងខេត្តសៀមរាបមានការយោគយល់ ចំពោះការស្ដារ និងជួសជុលឡើងវិញ នូវផ្លូវជនបទ ដែលរងការខូចខាត ខណៈទឹកជំនន់នៅពុំទាន់ស្រក សម្រាប់បើកការដ្ឋានសាងសង់។ កង្វល់ទាំងនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តែងតែយកចិត្តទុកដាក់ខ្ពស់ និងដាក់បទបញ្ជាដល់ក្រសួងជំនាញ ចុះពិនិត្យ និងវាយតម្លៃ ដើម្បីធ្វើឲ្យការធ្វើដំណើរ និងប្រកបរបររបស់ប្រជាពលរដ្ឋមានលក្ខណៈល្អប្រសើរឡើងវិញ។
អត្ថបទ និង រូបភាព៖ បូ សាវី
កែសម្រួលអត្ថបទ៖ សេង ផល្លី
